সমুদ্দৱগ্গ

বাড়িসিকোপমসুত্ত

পুচ্ছা – সমুদ্দৱগ্গে পনাৱুসো ততিযং বাড়িসিকোপমসুত্তং ভগৱতা কত্থ কং আৰব্ভ ভাসিতং.

ৱিস্সজ্জনা – ৰাজগহে ভন্তে জীৱকম্বৱনে সম্বহুলে ভিক্খূ আৰব্ভ ‘‘সেয্যথাপি ভিক্খৱে বাড়িসিকো আমিসগতবড়িসং গম্ভীৰে উদকৰহদে পক্খিপেয্যা’’তি এৱমাদিনা ভগৱতা ভাসিতং.

আদিত্তপৰিযাযসুত্ত

পুচ্ছা – সড়াযতনৱগ্গসংযুত্তে সমুদ্দৱগ্গে পনাৱুসো পোৰাণকেহি ধম্মসংগাহকমহাথেৰেহি সংগীতং অট্ঠমং আদিত্তপৰিযাযসুত্তং ভগৱতা কং আৰব্ভ কথঞ্চ ভাসিতং.

ৱিস্সজ্জনা – সম্বহুলে ভন্তে ভিক্খূ আৰব্ভ ‘‘আদিত্তপৰিযাযং ৱো ভিক্খৱে ধম্মপৰিযাযং দেসেস্সামি, তং সুণাথ. কতমো চ ভিক্খৱে আদিত্তপৰিযাযো ধম্মপৰিযাযো. ৱৰং ভিক্খৱে তত্তায অযোসলাকায আদিত্তায সম্পজ্জলিতায সজোতিভূতায চক্খুন্দ্ৰিযং সম্পলিমট্ঠং, নত্ৱেৱ চক্খুৱিঞ্ঞেয্যেসু ৰূপেসু অনুব্যঞ্জনসো নিমিত্তগ্গাহো’’তিআদিনা ভগৱতা ভাসিতং.