১. ৰূপাদিৱগ্গ

পুচ্ছা – এককনিপাতেপি আৱুসো ৰূপাদিৱগ্গো নীৱৰণপ্পহানৱগ্গো অকম্মনিযৱগ্গোতিআদিনা ৱগ্গভেদৱসেন বহুৱিধা. তত্থ কতৰং ৱগ্গং পঠমং সংগাযিংসু.

ৱিস্সজ্জনা – এককনিপাতে ভন্তে ৰূপাদিৱগ্গো নীৱৰণপ্পহানৱগ্গোতিআদিনা ৱীসতিযা ৱগ্গেসু ৰূপাদিৱগ্গং পঠমং সংগাযিংসু.

পুচ্ছা – সাধু সাধু আৱুসো, মযম্পি দানি আৱুসো ততোযেৱ পট্ঠায সংগাহনত্থায সংগীতিপুব্বঙ্গমানি ধম্মপুচ্ছনৱিস্সজ্জনকিচ্চানি আৱহিতুং সমাৰভাম. তেনাৱুসো ভগৱতা জানতা পস্সতা অৰহতা সম্মাসম্বুদ্ধেন অঙ্গুত্তৰনিকাযে এককনিপাতে ৰূপাদিৱগ্গে পুৰিমানি পঞ্চ সুত্তানি কত্থ কং আৰব্ভ কথঞ্চ ভাসিতানি.

ৱিস্সজ্জনা – সাৱত্থিযং ভন্তে সম্বহুলে ভিক্খূ আৰব্ভ ৰূপাদিগৰুকানং পঞ্চন্নং পুৰিসানং অজ্ঝাসযৱসেন ‘‘নাহং ভিক্খৱে অঞ্ঞং একৰূপম্পি সমনুপস্সামি, যং এৱং পুৰিসস্স চিত্তং পৰিযাদায তিট্ঠতি, যথযিদং ভিক্খৱে ইত্থিৰূপং, ইত্থিৰূপং ভিক্খৱে পুৰিসস্স চিত্তং পৰিযাদায তিট্ঠতী’’তি এৱমাদিনা ভগৱতা ভাসিতানি.

নাহং ভিক্খৱে অঞ্ঞং একৰূপম্পি সমনুপস্সামি, যং এৱং পুৰিসস্স চিত্তং পৰিযাদায তিট্ঠতি, যথযিদং ভিক্খৱে ইত্থিৰূপং, ইত্থিৰূপং ভিক্খৱে পুৰিসস্স চিত্তং পৰিযাদায তিট্ঠতি.

পুচ্ছা – তত্থেৱ আৱুসো পচ্ছিমানি পঞ্চ সুত্তানি ভগৱতা কত্থ কং আৰব্ভ কথঞ্চ ভাসিতানি.

ৱিস্সজ্জনা – তস্মিংযেৱ ভন্তে সাৱত্থিযং সম্বহুলে ভিক্খূ আৰব্ভ ৰূপাদিগৰুকানং পঞ্চন্নং ইত্থীনং অজ্ঝাসযৱসেন ‘‘নাহং ভিক্খৱে অঞ্ঞং একৰূপম্পি সমনুপস্সামি, যং এৱং ইত্থিযা চিত্তং পৰিযাদায তিট্ঠতি, যথযিদং ভিক্খৱে পুৰিসৰূপং, পুৰিসৰূপং ভিক্খৱে ইত্থিযা চিত্তং পৰিযাদায তিট্ঠতী’’তি এৱমাদিনা ভগৱতা ভাসিতানি.

নাহং ভিক্খৱে অঞ্ঞং একৰূপম্পি সমনুপস্সামি, যং এৱং ইত্থিযা চিত্তং পৰিযাদায তিট্ঠতি, যথযিদং ভিক্খৱে পুৰিসৰূপং, পুৰিসৰূপং ভিক্খৱে ইত্থিযা চিত্তং পৰিযাদায তিট্ঠতি.

নীতত্থৱসেন, নেয্যত্থৱসেন

পুচ্ছা – ইমস্মিং আৱুসো ৰূপাদিৱগ্গে ভগৱতা নীতত্থৱসেন কিং কথিতং, নেয্যত্থৱসেন পন কিং ঞাপিতং.

ৱিস্সজ্জনা – ইমস্মিং ভন্তে ৰূপাদিৱগ্গে ভগৱতা নীতত্থৱসেন ৱট্টং কথিতং. নেয্যত্থৱসেন পন ৱিৱট্টম্পি ঞাপিতং.