৫৩. সীলা+ভিক্খঞ্ঞা+ৱস্সকেসু ণী

ক্ৰিযত্থা ণী হোতি সীলাদীসু. সংস=পসংসনে, পিযপুব্বো, পিযং পসংসতি সীলেনাতি পিযপসংসী ৰাজা. অথ ৱা পিযং পসংসতি সীলেন ৱা ধম্মেন ৱা তস্মিং সাধু ৱাতি পিযপসংসী, পিযপসংসনী, পিযপসংসি কুলং, আৱুদ্ধিম্হি তথা সচ্চৱাদী, ধম্মৱাদী. সীঘযাযীতি ‘‘অস্সা+ণাপিম্হী যুক’’ ইতি যুক. পাপকাৰী, মালকাৰী ইচ্চাদি. উণ্হং ভুঞ্জতি সীলেনাতি উণ্হভোজী, ‘‘লহুস্সুপন্তস্সা’’তি ওকাৰো.

আভিক্খঞ্ঞে-পুনপ্পুন খীৰং পিৱতীতি খীৰপাযী, যুক. অৱস্সং কৰোতীতি অৱস্সকাৰী. ‘‘স্যাদি স্যাদিনে+কত্থং’’তি সমাসে ৱিভত্তিলোপে চ কতে ‘‘লোপো’’তি নিগ্গহীতলোপো. সতন্দাযীতি এত্থ বহুলংৱিধানা ৱিভত্তিঅলোপে অমাদিসমাসপটিসেধে চ কতে ৱগ্গন্তং.

অঞ্ঞস্মিং অত্থেপি ‘‘ণী’’তি যোগৱিভাগেন সিদ্ধং. সাধুকাৰী, ব্ৰহ্মচাৰী, অস্সদ্ধভোজী. পণ্ডিতং অত্তানং মঞ্ঞতীতি পণ্ডিতমানী, বহুস্সুতধাৰী ইচ্চাদি.

সাধুকৰণং সাধুকাৰো, সো অস্স অত্থীতি সাধুকাৰীতি ঘণন্তা ঈ.