২৬. লভ ৱস+চ্ছিদ ভিদ ৰুদানং চ্ছঙ

লভাদীনং চ্ছঙ হোতি স্সেন সহ. লচ্ছতি লভিস্সতি, লচ্ছন্তি লভিস্সন্তি ইচ্চাদি. ক্ৰিযাতিপত্তিযং স্সাভাগস্স চ্ছঙাদেসে অলচ্ছা অলভিস্স ইচ্চাদি. ৱস=নিৱাসে, ৱচ্ছতি ৱসিস্সতি. কম্মে-বহুলাধিকাৰা ‘‘অস্সূ’’তি উকাৰো, পুব্বৰূপে ৱুস্সতি ৱুস্সিস্সতি ইচ্চাদি. তথা অৱচ্ছা অৱসিস্সা. ছিদ=দ্ৱেধাকৰণে, ছেচ্ছতি ছিন্দিস্সতি, ‘‘মঞ্চ ৰুধাদীনং’’তি মং লো চ. লস্স লোপো চ. ভিদ=ৱিদাৰণে, ভেচ্ছতি ভিন্দিস্সতি. অভেচ্ছা অভিন্দিস্সা. ৰুদ=ৰোদনে, ৰুচ্ছতি ৰোদিস্সতি. অৰুচ্ছা অৰোদিস্সা ইচ্চাদি.

অঞ্ঞপচ্চযেপি ছিদস্স ‘‘চ্ছঙ’’ ইতি যোগৱিভাগা চ্ছঙ, ভূতে ঊং পচ্চযে অচ্ছেচ্ছুং অচ্ছিন্দিংসু. ৱুত্ততো অঞ্ঞধাতূনঞ্চ, গম=গমনে, গচ্ছং গচ্ছিস্সং. অঞ্ঞপচ্চযেপি ৱচ=ব্যত্তৱচনে ইচ্চাদি, কম্মে-বহুলাধিকাৰা ত্যাদীসু পৰভূতেসুপি যথাগমং ৱচাদীনঞ্চস্স ‘‘ৱচাদীনং ৱস্সুট ৱা’’তি কম্মে উট চ ‘‘অস্সূ’’তি অস্স উ চ, তেন ধম্মো উচ্চতি ৱুচ্চতি, ৱুচ্চন্তি ইচ্চাদি, যস্স চ পুব্বৰূপং.