১৪. পুব্বপৰচ্ছক্কান+মেকানেকেসু তুম্হা+ম্হ+সেসেসু দ্ৱে দ্ৱে মজ্ঝিমু+ত্তম+পঠমা

একানেকেসু তুম্হঅম্হসদ্দৱচনীযেসু তদঞ্ঞসদ্দৱচনীযেসু চ কাৰকেসু পুব্বচ্ছক্কানং পৰচ্ছক্কানঞ্চ মজ্ঝিমু+ত্তম+পঠমা দ্ৱে দ্ৱে হোন্তি যথাক্কমং. তত্থতি অন্তীতি পঠমপুৰিসো, আদো নিদ্দিট্ঠত্তা. সি থ ইতি মজ্ঝিমপুৰিসো, মজ্ঝে নিদ্দিট্ঠত্তা. মি ম ইতি উত্তমপুৰিসো. উত্তমসদ্দো+যং সভাৱতো তিপভুতীন+মন্ত+মাহ. পৰচ্ছক্কেপি তে অন্তেতিআদিনা এৱং যোজেতব্বং. এৱং সেসেসু ভৱিস্সতিআদীসু সত্তসু পচ্চযৱিধানসুত্তেসুপি যোজেতব্বং.

ইদানি ভূৱাদীন+মট্ঠগণানং ভূৱাদিগণেসু ভূ=সত্তায+মিতি পঠমধাতুতো পৰা ত্যাদযো যোজীযন্তে. তত্থ ‘‘একম্হি ৱত্তব্বে একৱচনং’’তি ত্যাদীসু পৰভূতেসু কত্তু+কম্ম+ভাৱেসুযেৱ ক্যৱিকৰণলৱিকৰণা হোন্তীতি ‘‘ক্যো ভাৱকম্মেস্ৱ+পৰোক্খেসু মান+ন্ত+ত্যাদীসু’’ ‘‘কত্তৰি লো’’ ইচ্চাদিনা তেসং ৱিকৰণানং ৱিধানা ত্যাদযো কত্তু+কম্ম+ভাৱেস্ৱেৱ ৱিঞ্ঞাযন্তীতি কত্তৰি তিম্হিলো. কে তে ৱিকৰণা –

পুব্বাপৰভাগট্ঠানা, ভিন্নধাতুৱিভত্তিযো;

নিস্সায পচ্চযা হোন্তি, এতে ৱিকৰণা সিযুং.