৮০. দণ্ডাদিত্ৱি+ক+ঈ ৱাতি

ইক+ঈ হোন্তি ৱা মন্তত্থে. বহুলংৱিধানা কুতোচিসদ্দতো দ্ৱে হোন্তি, কুতো চে+কমেকংৱ. নিচ্চযুত্তো দণ্ডো অস্স অত্থীতি দণ্ডিকো দণ্ডী. গন্ধিকো গন্ধী. ৱাত্ৱেৱ, দণ্ডৱা.

‘‘উত্তমিণেৱ ধনা ইকো’’তি গণসুত্তেন ইকো ধনিকো. অঞ্ঞো ধনী ধনৱা.

‘‘অসন্নিহিতে অত্থা’’ অসন্নিহিতো অত্থো অস্স অত্থীতি অত্থিকো অত্থী. সন্নিহিতে অত্থৱা. ‘‘তদন্তা চ’’ পুঞ্ঞত্থো অস্স অত্থীতি পুঞ্ঞত্থিকো পুঞ্ঞত্থী.

‘‘ৱণ্ণন্তা ঈযেৱ’’. ব্ৰহ্মৱণ্ণং অস্স অত্থীতি ব্ৰহ্মৱণ্ণী, দেৱৱণ্ণী.

‘‘হত্থদন্তেহি জাতিযং’’. হত্থ+মস্স অত্থীতি হত্থী, দন্তী. অঞ্ঞত্ৰ হত্থৱা দন্তৱা.

‘‘ৱণ্ণতো ব্ৰহ্মচাৰিম্হি’’. ৱণ্ণো অস্স অত্থীতি ৱণ্ণিকো ব্ৰহ্মচাৰী.

‘‘পোক্খৰাদিতো দেসে’’. পোক্খৰং জলং পদুমং ৱা অস্স অত্থীতি পোক্খৰী, ‘‘যুৱণ্ণেহি নী’’তি নীম্হি ‘‘ঘৰণ্যাদযো’’তি ঈস্স অত্তং, নস্স ণো চ, পোক্খৰণী, উপ্পলিনী, কুমুদিনী, ভিসিনী, মুলালিনী, সালুকিনী.

‘‘ক্ৱচা+দেসেপি’’. পদুম+মস্স অত্থীতি পদুমী পদুমিনী পদুমিনীপণ্ণং. দেসতো+ঞ্ঞত্ৰ পোক্খৰৱা হত্থী.

‘‘নাৱাযি+কো’’ নাৱিকো. সিখী, বালী, সীলী, বলী.

‘‘সুখদুক্খা ঈ’’. সুখী দুক্খী. ‘‘বলা বাহূৰুপুব্বা চ’’. বাহুবলী, ঊৰুবলী.