৩২. সত্তম্যা+ধাৰে

কত্তুকম্মট্ঠানং নিসজ্জ+পচনাদিক্ৰিযানং যো আধাৰো, তং আধাৰকাৰকং নাম. কথং কটে নিসীদতি দেৱদত্তো, থালিযং ওদনং পচতি, দেৱদত্ত+তণ্ডুলানং কত্তু+কম্মানং ধাৰণতো তদট্ঠআসন+পচনক্ৰিযং কট+থালিযো ধাৰেন্তি নাম, তস্মিং সত্তমীৱিভত্তি হোতি.

সো ব্যাপিকো, ওপসিলেসিকো, ৱেসযিকো, সামীপিকোতি চতুব্বিধো. তত্থ যো আধেয্যস্স নিস্সেসাধাৰভূতো, সো ব্যাপিকো, যথা তিলেসু তেলং অত্থি, খীৰেসু জলং, দধিম্হি সপ্পি. পচ্চেকসিদ্ধানং ভাৱানং যং আধেয্যভাৱেন উপসিলেসনং অল্লীযনং অত্থি, সো ওপসিলেসিকো. যথা আসনে নিসিন্নো সঙ্ঘো, থালিযং ওদনং পচতি, ঘটে উদক+মত্থি, দূৰে ঠিতো, সমীপে ঠিতো. যত্থ সমীপে সমীপীৱোহাৰং কত্ৱা তদাযত্ততাদীপনত্থং আধাৰভাৱো উপচৰীযতি, তং সামীপিকং, যথা গঙ্গাযং ঘোসো, গঙ্গায সমীপে ৱজোত্যত্থো. সাৱত্থিযং ৱিহৰতি জেতৱনে. যত্থ অঞ্ঞথাভাৱৱসেন দেসন্তৰাৱচ্ছেদৱসেন ৱা আধাৰপৰিকপ্পো, সো ৱেসযিতো. যথা আকাসে সকুণা চৰন্তি, ভূমিযং মনুস্সা, জলে মচ্ছা, পাসাদেসু পতিতো, পাপস্মিং ৰমতী মনো, পসন্নো বুদ্ধসাসনে, পঞ্ঞায সাধু, ৱিনযে নিপুণো, মাতৰি সাধু, পিতৰি নিপুণো.

কিৰিযা কত্তু+কম্মট্ঠা, আধাৰীযতি যেন সো;

আধাৰো চতুধা ৱুত্তো, ব্যাপকাদিপ্পভেদতো.

ব্যাপকো তিলখীৰাদি, কটো ওপসিলেসিকো;

সামীপিকো তু গঙ্গাদি, আকাসো ৱিসযো মতো.