১১৩. ঝলা ৱা

ঝলতো যোনং নি হোতি ৱা নপুংসকে. অট্ঠীনি. ‘‘লোপো’’তি যোলোপে দীঘো, অট্ঠী. ভো অট্ঠি অট্ঠী, অট্ঠীনি অট্ঠী. অট্ঠিং, অট্ঠীনি অট্ঠী. অট্ঠিনা ইচ্চাদি মুনিসদ্দসমং. এৱং পচ্ছি+অক্খি+দধি+সত্থি+ৱাৰি+অচ্চিআদযো.

ইকাৰন্তং.

দণ্ডি, নপুংসকত্তা ‘‘একৱচনে’’চ্চাদিনা ৰস্সে সিলোপো. দণ্ডীনি দণ্ডী. ‘‘গে ৱা’’তি ৰস্সে ভো দণ্ডি দণ্ডী, দণ্ডীনি দণ্ডী. ‘‘নং ঝীতো’’তি নং. দণ্ডিনং দণ্ডিং, দণ্ডীনি দণ্ডী. সেসং পুল্লিঙ্গে দণ্ডীসমং. এৱং সুখকাৰী+সীঘযাযীআদযো.

ঈকাৰন্তং.

চক্খু, চক্খূনি চক্খূ. সেসং অট্ঠিসমং. এৱং আযু+ৱসু+ধনু+দাৰু+তিপু+মধু+সিঙ্গু+হিঙ্গু+ৱত্থু+জতু+অম্বু+ অস্সুআদীনি. আযুসদ্দতো নাস্স কোধাদিত্তা সাৱ ৱিসেসো.

উকাৰন্তং.

গোত্ৰভু, ৰস্সে সিলোপো. গোত্ৰভূনি গোত্ৰভূ. ভো গোত্ৰভু গোত্ৰভূ, গোত্ৰভূনি গোত্ৰভূ. গোত্ৰভুং, গোত্ৰভূনি গোত্ৰভূ ইচ্চাদি পুল্লিঙ্গে ৱেস্সভূসমং. এৱং সযম্ভূ+অভিভূ+ধম্মঞ্ঞূ আদযো.

ঊকাৰন্তং.

ৱিসদা+ৱিসদাকাৰ-ৱোহাৰো+ভযমুত্তকো;

পুমাদিজাননে হেতু-ভাৱতো লিঙ্গ+মীৰিতো.

থন+কেসাৱতী নাৰী, মস্সুৱা পুৰিসো সিযা;

উভিন্ন+মন্তৰং এতং, ইতৰো+ভযমুত্তকো.

এসে+সা এত+মীতি চ,

পসিদ্ধিঅত্থেসু যেসু লোকস্স;

থী+পুম+নপুংসকানী+তি,

ৱুচ্চন্তে তানি নামানি.

নপুংসকলিঙ্গং.

অথ সব্বাদীনং ৰূপনযো নিদ্দিসিযতে,

সব্ব কতৰ কতম উভয ইতৰ অঞ্ঞ অঞ্ঞতৰ অঞ্ঞতম, পুব্ব+পৰা+পৰ+দক্খিণু+ত্তৰা+ধৰানি ৱৱত্থায+মসঞ্ঞাযং. ‘‘ঊনপূৰত্থ+মধিকপদোদাহৰণ+মজ্ঝাহাৰো’’তি ঞাযা সব্বাদীসু পঠীযন্তেতি যোজেতব্বং. য ত্য ত এত ইম অমু কিং এক তুম্হ অম্হ ইচ্চেতে সব্বাদযো. কচ্চাযনে অদস্সিতস্সাপি ত্যসদ্দস্স –

খিড্ডা পণিহিতা ত্যাসু, ৰতি ত্যাসু পতিট্ঠিতা;

বীজানি ত্যাসু ৰুহন্তি, যদিদং সত্তা পজাযৰেতি –

পাড়িযং দিস্সমানত্তা ইধ সঙ্গহো.

তত্থ সব্বসদ্দো নিৰৱসেসত্থো. কতৰ+কতমসদ্দা পুচ্ছনত্থা. উভযসদ্দো দ্ৱিঅৱযৱসমুদাযৱচনো. ইতৰসদ্দো ৱুত্তপটিযোগীৱচনো. অঞ্ঞসদ্দো অধিকতাপৰৱচনো. অঞ্ঞ- তৰ+অঞ্ঞতমসদ্দা অনিযমত্থা. পুব্বাদযো দিসাদিৱৱত্থাৱচনা. যসদ্দো অনিযমত্থো. ত্য+তসদ্দা পৰম্মুখৱচনা. এত+ইম+অমু+কিং ইচ্চেতে সমীপ+অচ্চন্তসমীপ+দূৰ+পুচ্ছনত্থৱচনা. একসদ্দো সংখ্যাদিৱচনো. তুম্হ+অম্হসদ্দা পৰ+অত্ত নিদ্দেসৱচনা.

সব্বো, সিস্স ও,