৪৭. তদমিনাদীনি

তদমিনাদীনি নিপ্পজ্জন্তি. ‘‘য+দলক্খণিকং, তং নিপাতনা’’তি ঞাযা লক্খণন্তৰেন অৱিহিতা দেস+লোপা+গম+ৱিপল্লাসা, সব্বত্থ ইমিনাৱ দট্ঠব্বা. ইদঞ্চ পৰেসং পিসোদৰাদিমিৱ দট্ঠব্বং. ফুসিতং=জলবিন্দু, ফুসিত+মুদৰ+মস্স পিসোদৰং. ইস্স অকাৰে তং ইমিনা=তদমিনা, সকিং আগামী=সকদাগামী, ধস্স দকাৰে একং ইধ অহং=এক+মিদা+হং, ৱিধস্স ৱিদাদেসো সংৱিধায অৱহাৰো=সংৱিদাৱহাৰো, ৱাৰিসদ্দস্স ৱকাৰে, হস্স লকাৰে চ কতে ৱাৰিৱাহকো=ৱলাহকো, জীৱনস্স জীআদেসো, জীৱনস্স মুতো=জীমূতো. ছৱস্স সুআদেসে, সযনস্স সানাদেসে চ কতে ছৱস্স সযনং=সুসানং. উদ্ধস্স উদুআদেসে, খস্স খলআদেসে চ ‘‘সৰম্হা দ্ৱে’’তি দ্ৱিত্তাদিম্হি চ কতে উদ্ধং খং অস্স উদুক্খলং. পিসিতস্স পিআদেসে, অসস্স সাচাদেসে চ কতে পিসিতাসো=পিসাচো.

মহীসদ্দস্স মযূআদেসে, ৰৱতিস্স ৰাদেসে চ কতে মহিযং ৰৱতীতি মযূৰো. এৱ+মঞ্ঞেপি পযোগতো+নুগন্তব্বা. এত্থ চ –

ৱণ্ণাগমো ৱণ্ণৱিপৰিযাযো,

দ্ৱে চা+পৰে ৱণ্ণৱিকাৰ+নাসা;

ধাতুস্স অত্থাতিসযেন যোগো,

ত+দুচ্চতে পঞ্চৱিধং নিৰুত্তংতি.

যথা দ্ৱাৰে নিযুত্তো=দোৱাৰিকোতি ওকআগমো. হিংসসদ্দস্স সীহোতি ৱিপল্লাসো. নিজকো=নিযকোতি ৱিকাৰো. মেহনস্স খস্স মালা মেখলাতি ৱণ্ণলোপো, হ+ন+মকাৰানং লোপো. মযূৰোতি অত্থে ৰৱতিস্স অতিস্সযযোগোতি.

যথৰিৱ তথৰিৱেতি নিপাতাৱ. ‘‘জৰগ্গৱা ৱিচিন্তেসুং, ৱৰ+ম্হাকং ভুসামিৱে’’তি এত্থ ইৱসদ্দো এৱকাৰত্থো. নিগ্গহীতসন্ধি.

সন্ধিস্সৰানং পটিসেধসন্ধি,

অথো ব্যঞ্জন+সৰব্যঞ্জনানং;

সন্ধি চ+থো নিগ্গহীতস্স সন্ধি,

ভৱন্তি সন্ধি পন পঞ্চধা ৱে.

ইতি পযোগসিদ্ধিযং সন্ধিকণ্ডো পঠমো.