৮. নিস্সযপচ্চযো

তিৱিধো নিস্সযপচ্চযো, সহজাতনিস্সযো ৱত্থু পুৰেজাতনিস্সযো ৱত্থাৰম্মণপুৰেজাতনিস্সযো.

তত্থ কতমো সহজাতনিস্সযো. সব্বো সহজাত পচ্চযো সহজাতনিস্সযো. তস্মা তত্থ পচ্চযৱিভাগো চ পচ্চযুপ্পন্নৱিভাগো চ সহজাতপচ্চযে ৱুত্তনযেন ৱেদিতব্বো.

কতমো পন ৱত্থুপুৰেজাতনিস্সযো. ছ ৱত্থূনি চক্খু ৱত্থু সোতৱত্থু ঘানৱত্থু জিৱ্হাৱত্থু কাযৱত্থু হদযৱত্থু. ইমানি ছৱত্থূনি পৱত্তিকালে সত্তানং ৱিঞ্ঞাণধাতূনং ৱত্থুপুৰে জাতনিস্সযো.

ৱত্থুৰূপমেৱ পুৰেজাতং হুত্ৱা নিস্সযো ৱত্থুপুৰেজাত নিস্সযো. তত্থ চিত্তচেতসিকানং নিস্সযট্ঠানট্ঠেন ৱত্থু নাম. পুৰেজাতন্তি অত্তনো অত্তনো পচ্চযুপ্পন্নস্স ধম্মস্স উপ্পত্তিক্খণতো পুৰিমে খণে জাতং.

তত্থ পটিসন্ধিচিত্তং তদা পুৰেজাতস্স ৱত্থুৰূপস্স অভাৱতো অত্তনা সহুপ্পন্নমেৱ হদযৱত্থুৰূপং নিস্সায উপ্পজ্জতি. পঠম ভৱঙ্গচিত্তং পন পটিসন্ধিচিত্তেন সহুপ্পন্নহদয ৱত্থুৰূপং নিস্সায উপ্পজ্জতি. দুতিযভৱঙ্গচিত্তং পঠমভৱঙ্গচিত্তেন সহুপ্পন্নং নিস্সায উপ্পজ্জতি. এৱং ততিযভৱঙ্গচিত্তং দুতিয ভৱঙ্গচিত্তেন সহুপ্পন্নন্তিআদিনা যাৱমৰণাসন্নকালা দ্ৱিন্নং মনোধাতুমনোৱিঞ্ঞাণধাতূনং ৱত্থুপুৰেজাতনিস্সযো ৱেদিতব্বো.

যথা ৱীণাসদ্দা নাম ৱীণাতন্তীসু ৱীণাদণ্ডকেহি পহৰণৱেগেন এৱ জাযন্তি, নো অঞ্ঞথা. তথা পঞ্চৱিঞ্ঞাণানি নাম পঞ্চৱত্থুসঙ্খাতেসু পঞ্চদ্ৱাৰেসু পঞ্চন্নং আৰম্মণানং আপাতা গমনৱেগেন এৱ জাযন্তি, নো অঞ্ঞথা.

আপাতাগমনঞ্চ তেসং দ্ৱাৰাৰম্মণানং ঠিতিপত্তকালে এৱ হোতি. আপাতাগমনপচ্চযা চ দ্ৱিক্খত্তুং ভৱঙ্গং চলতি. ভৱঙ্গচলন পচ্চযা চ আৱজ্জনং উপ্পজ্জতি. আৱজ্জনপচ্চযা চ তানি পঞ্চৱিঞ্ঞাণানি উপ্পজ্জন্তি. তস্মা চক্খাদীনি পঞ্চৱত্থূনি পুৰে অতীতভৱঙ্গচিত্তস্স উপ্পাদক্খণে উপ্পন্নানি এৱ পঞ্চৱিঞ্ঞাণধাতূনং ৱত্থুপুৰেজাতপচ্চযা হোন্তি.

মৰণাসন্নকালে পন সব্বানি ছ ৱত্থূনি চুতিচিত্ততো পুৰে সত্তৰসমস্স ভৱঙ্গচিত্তস্স উপ্পাদক্খণে এৱ উপ্পজ্জন্তি, ততো পৰং ন উপ্পজ্জন্তি. তস্মা মৰণাসন্নকালে ভৱঙ্গচিত্তানি চ সব্বানি ছদ্ৱাৰিকৱীথিচিত্তানি চ চুতিচিত্তঞ্চ পুৰেতৰং উপ্পন্নানি তানিযেৱ অত্তনো অত্তনো ৱত্থূনি নিস্সায উপ্পজ্জন্তি. অযং ৱত্থুপুৰেজাত নিস্সযো.

কতমো পন ৱত্থাৰম্মণপুৰেজাতনিস্সযো. যদা অত্তনো অজ্ঝত্তং ৱত্থুৰূপং আৰব্ভ যং ৰূপং নিস্সায মম মনোৱিঞ্ঞাণং ৱত্ততি, এতং মম এসো হমস্মি এসো মে অত্তাতি এৱং তণ্হামান দিট্ঠীহি গহণৱসেন ৱা এতং অনিচ্চং এতং দুক্খং এতং অনত্তাতি এৱং সম্মসনৱসেন ৱা আৱজ্জনাদীনি মনোদ্ৱাৰিকৱীথি চিত্তানি পৱত্তন্তি. তদা তং তং ৱত্থুৰূপং পচ্চেকং তেসং নিস্সযৱত্থু চ হোতি তেসং আৰম্মণঞ্চ. তস্মা তং তং হদযৰূপং তস্স তস্স চিত্তুপ্পাদস্স ৱত্থাৰম্মণপুৰেজাতপচ্চযো হোতি. অযং ৱত্থাৰম্মণ পুৰেজাতনিস্সযো. এৱং নিস্সযপচ্চযো তিৱিধো হোতি.

ইধ সুত্তন্তনিস্সযোপি ৱত্তব্বো. ইমে মনুস্সা ৱা তিৰচ্ছানগতা ৱা ৰুক্খাদযো ৱা মহাপথৱিযং পতিট্ঠিতা, মহা পথৱী চ হেট্ঠা মহাউদকক্খন্ধে, মহাউদকক্খন্ধো চ হেট্ঠা মহাৱাতক্খন্ধে, মহাৱাতক্খন্ধো চ হেট্ঠা অজটাকাসে, মনুস্সা গেহেসু, ভিক্খূ ৱিহাৰেসু, দেৱা দিব্বৱিমানেসূতিআদিনা সব্বং লোকপ্পৱত্তিং ঞত্ৱা নিস্সযপচ্চযো ৱেদিতব্বো. নিস্সযপচ্চযদীপনা নিট্ঠিতা.