৪. অনন্তৰপচ্চযো

কতমো অনন্তৰপচ্চযো. অনন্তৰে খণে নিৰুদ্ধো চিত্ত চেতসিকধম্মসমূহো অনন্তৰপচ্চযো.

কতমো ধম্মো অনন্তৰপচ্চযস্স পচ্চযুপ্পন্নো. পচ্ছিমে অনন্তৰে এৱ খণে উপ্পন্নো চিত্তচেতসিকধম্মসমূহো তস্স পচ্চযস্স পচ্চযুপ্পন্নো.

একস্মিং ভৱে পটিসন্ধিচিত্তং পঠমভৱঙ্গচিত্তস্স অনন্তৰ পচ্চযো, পঠম ভৱঙ্গচিত্তং দুতিযভৱঙ্গচিত্তস্স অনন্তৰপচ্চযোতিআদিনা ৱত্তব্বো.

যদা পন ধম্মযমকে সুদ্ধাৱাসানং দুতিযে অকুসলে চিত্তে ৱত্তমানেতি ৱুত্তনযেন তস্স সত্তস্স অত্তনো অভিনৱং অত্তভাৱং আৰব্ভ এতং মম এসোহমস্মি এসো মে অত্তাতি পৱত্তং ভৱনিকন্তিক তণ্হাসহগতচিত্তং উপ্পজ্জতি. তদা পঠমং দ্ৱিক্খত্তুং ভৱঙ্গং চলতি. ততো মনোদ্ৱাৰাৱজ্জনচিত্তং উপ্পজ্জতি. ততো সত্ত ভৱনিকন্তিকজৱনানি উপ্পজ্জন্তি. ততো পৰং ভৱঙ্গৱাৰো.

অপি চ সো সত্তো তদা পচ্চুপ্পন্নভৱে কিঞ্চি ন জানাতি, পুব্বভৱে অত্তনা অনুভূতং আৰম্মণং অনুস্সৰমানো অচ্ছতি. ৱত্থুস্স পন অতিদুব্বলত্তা তঞ্চ আৰম্মণং অপৰিব্যত্তমেৱ হোতি. তং আৰব্ভ উদ্ধচ্চসহগতচিত্তমেৱ বহুলং পৱত্ততি.

যদা গব্ভো থোকং ৱড্ঢমানো হোতি অতিৰেকদ্ৱেমাসং গতো, তদা চক্খাদীনি ইন্দ্ৰিযানি পৰিপুণ্ণানি হোন্তি. এৱং সন্তেপি মাতুগব্ভে আলোকাদীনং পচ্চযানং অভাৱতো চক্খুৱিঞ্ঞাণাদীনি চত্তাৰি ৱিঞ্ঞাণানি নুপ্পজ্জন্তি, কাযৱিঞ্ঞাণমনোৱিঞ্ঞাণানি এৱ উপ্পজ্জন্তি. সো সত্তো মাতুযা ইৰিযাপথপৰিৱত্তনাদীসু বহূনি দুক্খদোমনস্সানি পচ্চনুভোতি. ৱিজাযনকালে পন ভুসং দুক্খং নিগচ্ছতিযেৱ. ৱিজাযিত্ৱাপি যাৱ ৱত্থুৰূপানি মুদূনি হোন্তি, পৰিপাকং ন গচ্ছন্তি, তাৱ সো অতিমন্দৰূপো উত্তানসেয্যকো হুত্ৱা অচ্ছতি. ন কিঞ্চি পচ্চুপ্পন্নং আৰম্মণং সল্লক্খেতি. যেভুয্যেন পুৰিম ভৱানুসাৰী এৱ তস্স ৱিঞ্ঞাণং হোতি. সচে সো নিৰয ভৱতো আগতো হোতি, সো ৱিৰূপমুখবহুলো হোতি. পুৰিমানি নিৰযাৰম্মণানি আৰব্ভ খণে খণে ৱিৰূপমুখমস্স পঞ্ঞাযতি. অথ দেৱলোকতো আগতো হোতি, দিব্বানি আৰম্মণানি আৰব্ভ ৱিপ্পসন্নমুখবহুলো হোতি, খণে খণে মিহিতমুখমস্স পঞ্ঞাযতি.

যদা পন ৱত্থুৰূপানি তিক্খানি হোন্তি, পৰিপাকং গচ্ছন্তি. ৱিঞ্ঞাণানি চস্স সুৱিসদানি পৱত্তন্তি. তদা অমন্দৰূপো হুত্ৱা কীড়ন্তো লীড়ন্তো মোদন্তো পমোদন্তো অচ্ছতি. পচ্চুপ্পন্নে আৰম্মণানি সল্লক্খেতি. মাতুভাসং সল্লক্খেতি. ইধ লোকানুসাৰী ৱিঞ্ঞাণমস্স বহুলং পৱত্ততি. পুৰিমজাতিং পমুস্সতি.

কিং পন সব্বোপি সত্তো ইমস্মিং ঠানে এৱ পুৰিমং জাতিং পমুস্সতীতি চে. ন সব্বোপি সত্তো ইমস্মিং ঠানে এৱ পমুস্সতি. কোচি অতিৰেকতৰং গম্ভৱাসদুক্খেন পৰিপীড়িতো গব্ভে এৱ পমুস্সতি. কোচি ৱিজাযনকালে, কোচি ইমস্মিং ঠানে পমুস্সতি. কোচি ইতোপৰম্পি দহৰকালে ন পমুস্সতি. ৱুড্ঢকালে এৱ পমুস্সতি. কোচি যাৱজীৱংপি ন পমুস্সতি. দ্ৱে তযো ভৱে অনুস্সৰন্তোপি অত্থিযেৱ. ইমে জাতিস্সৰসত্তা নাম হোন্তি.

তত্থ ৱিজাযনকালতো পট্ঠায ছদ্ৱাৰিকৱীথিচিত্তানি পৱত্তন্তি. পচ্চুপ্পন্নাৰম্মণং সল্লক্খণতো পট্ঠায ছদ্ৱাৰিকৱীথি চিত্তানি পৰিপুণ্ণানি পৱত্তন্তি. সব্বত্থপি পুৰিমং পুৰিমং অনন্তৰে নিৰুদ্ধং চিত্তং পচ্ছিমস্স পচ্ছিমস্স অনন্তৰে উপ্পন্নস্স চিত্তস্স অনন্তৰ পচ্চযো হোতি. অযঞ্চ অনন্তৰপচ্চযো নাম অনমতগ্গে সংসাৰে একস্স সত্তস্স একপ্পবন্ধো এৱ হোতি. যদা সত্তো অৰহত্ত মগ্গং লভিত্ৱা খন্ধপৰিনিব্বানং পাপুণাতি, তদা এৱ সো পবন্ধো ছিজ্জতি.

কেনট্ঠেন অনন্তৰো, কেনট্ঠেন পচ্চযোতি. অত্তনো অনন্তৰে অত্তসদিসস্স ধম্মন্তৰস্স উপ্পাদনট্ঠেন অনন্তৰো, উপকাৰকট্ঠেন পচ্চযো. তত্থ অত্তসদিসস্সাতি সাৰম্মণ ভাৱেন অত্তনা সদিসস্স. সাৰম্মণভাৱেনাতি চ যো ধম্মো আৰম্মণেন ৱিনা ন পৱত্ততি, সো সাৰম্মণো নাম, এৱং সাৰম্মণভাৱেন. ধম্মন্তৰস্স উপ্পাদনট্ঠেনাতি পুৰিমস্মিং চিত্তে নিৰুদ্ধেপি তস্স চিন্তনকিৰিযাৱেগো ন ৱূপসম্মতি, পচ্ছিমং চিত্তং উপ্পাদেত্ৱা এৱ ৱূপসম্মতি, এৱং পচ্ছিমস্স ধম্মন্তৰস্স উপ্পাদনট্ঠেন.

তত্থ পুৰিমা পুৰিমা মাতুপৰম্পৰা ৱিয অনন্তৰপচ্চযপৰম্পৰা দট্ঠব্বা. পচ্ছিমা পচ্ছিমা ধীতুপৰম্পৰা ৱিয তস্স পচ্চযুপ্পন্নপৰম্পৰা দট্ঠব্বা. এৱং সন্তে অৰহন্তানং সব্বপচ্ছিমং পৰিনিব্বানচিত্তম্পি পুন পটিসন্ধিচিত্তসঙ্খাতং ধম্মন্তৰং উপ্পাদেয্যাতি. ন উপ্পাদেয্য. কস্মা, তদা কম্মকিলেসৱেগানং সব্বসো পটিপ্পস্সদ্ধিভাৱেন অচ্চন্তসন্ততৰত্তা তস্স চিত্তস্সাতি. অনন্তৰপচ্চয দীপনা নিট্ঠিতা.