৫. সমনন্তৰপচ্চযো

পচ্চযধম্মৱিভাগো চ পচ্চযুপ্পন্নধম্মৱিভাগো চ অনন্তপচ্চয সদিসো.

কেনট্ঠেন সমনন্তৰোতি. সুট্ঠু অনন্তৰট্ঠেন সমনন্তৰো. যথা সিলাথম্ভাদীসু ৰূপকলাপা একাবদ্ধা সমানাপি ৰূপ ধম্মভাৱেন সণ্ঠান জাতিকত্তা মজ্ঝে পৰিচ্ছেদৰূপসহিতা এৱ হোন্তি. দ্ৱিন্নং ৰূপকলাপানং মজ্ঝে অন্তৰং নাম ৱিৱৰং নাম অত্থিযেৱ. ন তথা পুৰিমপচ্ছিমানং দ্ৱিন্নং চিত্তচেতসিক কলাপানং মজ্ঝে. তে পন অৰূপধম্মভাৱেন অসণ্ঠান জাতিকত্তা মজ্ঝে পৰিচ্ছেদধম্মস্স নাম কস্সচি আকাসৱিৱৰস্স অভাৱতো সব্বসো অন্তৰ ৰহিতা এৱ হোন্তি. লোকস্সপি দ্ৱিন্নং কলাপানং অন্তৰং নাম ন দিস্সতি. ততো ইমে সত্তা চিত্তং নাম নিচ্চং ধুৱং থাৱৰং অৱিপৰিণামধম্মন্তি এৱং চিত্তে নিচ্চসঞ্ঞিনো হোন্তি. এৱং সুট্ঠু অনন্তৰট্ঠেন সমনন্তৰো. অনন্তৰট্ঠেনাতি চ অত্তনো অনন্তৰে অত্তসদিসস্স ধম্মন্তৰস্স উপ্পাদনট্ঠেনাতি পুব্বে ৱুত্তমেৱ.

এৱং সন্তে নিৰোধসমাপত্তিকালে পুৰিমচিত্তং নাম নেৱ সঞ্ঞানাসঞ্ঞাযতনচিত্তং, পচ্ছিমচিত্তং নাম অৰিযফলচিত্তং, দ্ৱিন্নং চিত্তানং অন্তৰে একৰত্তিদিৱম্পি দ্ৱেৰত্তিদিৱানিপি.ল. সত্তৰত্তিদিৱানিপি অচিত্তকো হোতি. অসঞ্ঞসত্তভূমিযংপি পুৰিমে কামভৱে চুতিচিত্তং পুৰিমচিত্তং নাম. পচ্ছিমে কামভৱে পটিসন্ধিচিত্তং পচ্ছিমচিত্তং নাম, দ্ৱিন্নং চিত্তানং অন্তৰে অসঞ্ঞসত্তভৱে পঞ্চকপ্পসতানি পুগ্গলো অচিত্তকো তিট্ঠতি. তত্থ দ্ৱে পুৰিমচিত্তানি অত্তনো অনন্তৰে অত্তসদিসস্স ধম্মন্তৰস্স উপ্পাদনপচ্চযসত্তিৰহিতানি হোন্তীতি. ন হোন্তি. মহন্তেহি পন ভাৱনাপণিধিবলেহি পটিবাহিতত্তা পুৰিমচিত্তানি চ নিৰুজ্ঝমানানি অনন্তৰে ধম্মন্তৰস্স উপ্পাদন সত্তিসহিতানি এৱ নিৰুজ্ঝন্তি. পচ্ছিমচিত্তানি চ উপ্পজ্জমানানি তস্মিং খণে একাবদ্ধভাৱেন অনুপ্পজ্জিত্ৱা চিৰকালে এৱ উপ্পজ্জন্তি. ন চ এত্তকমত্তেন পুৰিমচিত্তানং অনন্তৰে ধম্মন্তৰস্স উপ্পাদন সত্তিনাম নত্থীতি চ, তে অনন্তৰপচ্চযধম্মা নাম ন হোন্তীতি চ সক্কা ৱত্তুং. যথা তং ৰঞ্ঞো যোধা নাম অত্থি, কদাচি ৰাজা কালং ঞত্ৱা তুম্হে ইদানি মাযুজ্ঝথ, যুদ্ধকালো ন হোতি, অসুকস্মিং কালে এৱ যুজ্ঝথাতি ৱদেয্য. তে চ তদা অযুজ্ঝমানা ৱিচৰেয্যুং. এৱং সন্তেপি তেসং যুজ্ঝনসত্তি নাম নত্থীতি চ, তে যোধা নাম ন হোন্তীতি চ ন সক্কা ৱত্তুন্তি.

এত্থ ৱদেয্যুং, ইমস্মিং পচ্চযে তে পন অৰূপধম্মভাৱেন অসণ্ঠান জাতিকত্তা মজ্ঝেপৰিচ্ছেদধম্মস্স নাম কস্সচি অভাৱতো সব্বসো অন্তৰৰহিতা এৱ হোন্তীতি ৱুত্তং. এৱং সন্তে পুব্বে আৰম্মণ পচ্চযে ভেৰিসদ্দৱীণাসদ্দোপমাহি যো চিত্তানং খণে খণে উপ্পাদো চ নিৰোধো চ ৱুত্তো, সো অম্হেহি কথং পচ্চেতব্বোতি. অঞ্ঞমঞ্ঞৱিৰুদ্ধানং নানাচিত্তানং খণমত্তেপি পুব্বাপৰ পৰিৱত্তনস্স লোকে পঞ্ঞাযনতো. অযমত্থো পুব্বে চিত্ত যমকদীপনিযং ৱিত্থাৰতো ৱুত্তোযেৱাতি. সমনন্তৰপচ্চয দীপনা নিট্ঠিতা.