১৫. আহাৰপচ্চযো

দুৱিধো আহাৰপচ্চযো ৰূপাহাৰপচ্চযো অৰূপাহাৰ পচ্চযো.

তত্থ ৰূপাহাৰপচ্চযো নাম কবড়ীকাৰাহাৰসঙ্খাতং ওজ ৰূপং ৱুচ্চতি. সো চ অজ্ঝত্তাহাৰো বহিদ্ধাহাৰোতি দুৱিধো. কবড়ীকাৰাহাৰভক্খানং সত্তানং সব্বেপি চতুসমুট্ঠানিকৰূপধম্মা তস্স দুৱিধস্স ৰূপাহাৰস্স পচ্চযুপ্পন্না.

অৰূপাহাৰো পন তিৱিধো ফস্সাহাৰো মনোসঞ্চেতনা হাৰো ৱিঞ্ঞাণাহাৰো চ. তযোপেতে ধম্মা সহজাতানং নামৰূপধম্মানং আহাৰপচ্চযো হোন্তি. সহজাতা চ নামৰূপ ধম্মা তেসং পচ্চযুপ্পন্না.

কেনট্ঠেন আহাৰোতি. ভুসং হৰণট্ঠেন আহাৰো. ভুসং হৰণট্ঠেনাতিচ দড়্হং পৱত্তাপনট্ঠেন, চিৰকালং ঠিতিযা ৱুড্ঢিযা ৱিৰুড়্হিযা ৱেপুল্লায উপত্থম্ভনট্ঠেনাতি ৱুত্তং হোতি. জননকিচ্চযুত্তোপি আহাৰো উপত্থম্ভনকিচ্চপ্পধানো হোতীতি.

তত্থ দুৱিধো ৰূপাহাৰো অজ্ঝত্তসন্তানে চতুসমুট্ঠানিকং ৰূপকাযং উপব্ৰূহযন্তো ভুসং হৰতি, দড়্হং পৱত্তেতি, চিৰং অদ্ধানং গমেতি, তং তং আযুকপ্পপৰিযোসানং পাপেতীতি আহাৰো.

ফস্সাহাৰো আৰম্মণেসু ইট্ঠানিট্ঠৰসং নীহৰন্তো সম্পযুত্তধম্মে ভুসং হৰতি. মনোসঞ্চেতনাহাৰো কাযৱচী মনোকম্মেসু উস্সাহং জনেন্তো সম্পযুত্তধম্মে ভুসং হৰতি. ৱিঞ্ঞাণাহাৰো আৰম্মণৱিজাননট্ঠেন পুব্বঙ্গমকিচ্চং ৱহন্তো সম্পযুত্তধম্মে ভুসং হৰতি, দড়্হং পৱত্তেতি, চিৰং অদ্ধানং গমেতীতি আহাৰো. সম্পযুত্তধম্মে ভুসং হৰন্তো সহজাতৰূপধম্মেপি ভুসং হৰতিযেৱ.

ইধ সুত্তন্তনযোপি ৱত্তব্বো. যথা সকুণা নাম চক্খূহি দিসাৱিদিসং ৱিভাৱেত্ৱা পত্তেহি ৰুক্খতো ৰুক্খং ৱনতো ৱনং আকাসেন পক্খন্দিত্ৱা তুণ্ডকেহি ফলাফলানি তুদিত্ৱা যাৱজীৱং অত্তানং যাপেন্তি. তথা ইমে সত্তা ছহি ৱিঞ্ঞাণেহি আৰম্মণানি ৱিভাৱেত্ৱা ছহি মনোসঞ্চেতনাহাৰেহি আৰম্মণৱত্থুপ্পটিলাভত্থায উস্সুক্কনং কত্ৱা ছহি ফস্সাহাৰেহি আৰম্মণেসু ৰসং পাতুভৱন্তং কত্ৱা সুখদুক্খং অনুভৱন্তি. ৱিঞ্ঞাণেহি ৱা আৰম্মণানি ৱিভাৱেত্ৱা নামৰূপ সম্পত্তিং সাধেন্তি. ফস্সেহি আৰম্মণেসু ৰসং পাতুভৱন্তং কত্ৱা আৰম্মণৰসানুভৱনং ৱেদনং সম্পাদেত্ৱা তণ্হাৱেপুল্লং আপজ্জন্তি. চেতনাহি তণ্হামূলকানি নানাকম্মানি পসৱেত্ৱা ভৱতো ভৱং সংসৰন্তি. এৱং আহাৰধম্মানং মহন্তং আহাৰকিচ্চং ৱেদিতব্বন্তি. আহাৰপচ্চযদীপনা নিট্ঠিতা.