১২. আসেৱনপচ্চযো

দ্ৱাদস অকুসলচিত্তানি সত্তৰস লোকিযকুসল চিত্তানি আৱজ্জনদ্ৱযৱজ্জিতানি অট্ঠাৰসকিৰিযচিত্তানীতি সত্ত চত্তালীসং লোকিযজৱনচিত্তানি আসেৱনপচ্চযো. তেসু নিৰন্তৰপ্পৱত্তং জৱনসন্ততিং পত্ৱা পুৰিমং পুৰিমং জৱনচিত্তং আসেৱন পচ্চযো. চতূহি মগ্গচিত্তেহি পচ্ছিমং পচ্ছিমং চিত্তং আসেৱনপচ্চযুপ্পন্নং.

কেনট্ঠেন আসেৱনন্তি. উপৰূপৰিপগুণভাৱৱড্ঢনত্থংথাম বলৱড্ঢনত্থঞ্চ পৰিৱাসগ্গাহাপনট্ঠেন.

তত্থ পগুণভাৱোতি পুনপ্পুনং সজ্ঝাযিতস্স পাড়িপাঠস্স সুখেন পৱত্তনং ৱিয জৱনট্ঠানজৱনকিচ্চসঙ্খাতে ঠানকিচ্চৱিসেসে পচ্ছিম পচ্ছিমচিত্তস্স সুখেন পৱত্তনং. পৰিৱাসো নাম কোসেয্যৱত্থং পুনপ্পুনং সুগন্ধেন পৰিৱাসনং ৱিয চিত্তসন্তানে পুনপ্পুন্নং ৰজ্জনদুস্সনাদিনা ৱা অৰজ্জন অদুস্সনাদিনা ৱা পৰিৱাসনং. পুৰিমস্মিং জৱনচিত্তে নিৰুদ্ধেপি তস্স জৱনৱেগো ন নিৰুজ্ঝতি, পচ্ছিমং চিত্তসন্তানং ফৰমানো পৱত্ততিযেৱ. তস্মা পচ্ছিমং পচ্ছিমং জৱনচিত্তং উপ্পজ্জমানং তেন ৱেগেন পগ্গহিতং বলৱতৰং হুত্ৱা উপ্পজ্জতি. এৱং পুৰিমচিত্তং অত্তনো পৰিৱাসং পচ্ছিমচিত্তং গণ্হাপেতি. পচ্ছিমঞ্চ চিত্তং পুৰিমস্স চিত্তস্স পৰিৱাসং গহেত্ৱা পৱত্ততি. এৱং সন্তেপি সো আসেৱনৱেগো পকতিযা সত্তহি চিত্তৱাৰেহি পৰিক্খযং গচ্ছতি, ততো পৰং তদাৰম্মণৱিপাক চিত্তং ৱা উপ্পজ্জতি, ভৱঙ্গ চিত্তৱাৰো ৱা পৱত্ততি.

ইধ সুত্তন্তাসেৱনপচ্চযোপি ৱত্তব্বো. সতিপট্ঠানং ভাৱেতি, সম্মপ্পধানং ভাৱেতি, সতিসম্বোজ্ঝঙ্গং ভাৱেতি, ধম্ম ৱিচযসম্বোজ্ঝঙ্গং ভাৱেতি, সম্মাদিট্ঠিং ভাৱেতি, সম্মাসঙ্কপ্পং ভাৱেতীতিআদিনা বহূসু ঠানেসু ৱুত্তো. তত্থ ভাৱেতীতি একংপি দিৱসং ভাৱেতি, সত্তপি দিৱসানি ভাৱেতি, একংপি মাসং ভাৱেতি, সত্তপি মাসানি ভাৱেতি, একংপি সংৱচ্ছৰং ভাৱেতি, সত্তপি সংৱচ্ছৰানি ভাৱেতীতি অত্থো.

পুৰিমপুৰিমেসু ভৱেসু আসেৱিতানি ভাৱিতানি বহুলী কতানি কুসলানি ৱা অকুসলানি ৱা পচ্ছিমপচ্ছিমেসু ভৱেসু বলৱতৰানং কুসলানং ৱা অকুসলানং ৱা উপ্পত্তিযা আসেৱন পচ্চযো.

কালন্তৰে ৱা ভৱন্তৰে ৱা তাদিসানং কুসলাকুসলানং উপ্পত্তিযা পচ্চযো উপনিস্সযপচ্চযো নাম. তেসংযেৱ বলৱতৰত্থায পচ্চযো আসেৱনপচ্চযো নাম.

লোকেপি মহন্তেসু চিত্তভাৱনাকম্মেসু ৱাচা ভাৱনাকম্মেসু কাযভাৱনাকম্মেসু অঙ্গপচ্চঙ্গভাৱনাকম্মেসু কম্মাযতনসিপ্পাযতনৱিজ্জাঠানেসু চ আসেৱনা ভাৱনা বহুলীকম্মানং নিস্সন্দগুণা নাম সন্দিস্সন্তিযেৱ.

সব্বেসং খণিকধম্মানং মজ্ঝে এৱৰূপস্স আসেৱন পচ্চযস্স ৱিজ্জমানত্তা পুৰিসবলপুৰিসথামানং উপৰূপৰি ৱড্ঢন ৱসেন চিৰকালং পৱত্তিতানি পুৰিসকম্মানি নিপ্ফত্তিং পাপুণন্তি, সব্বঞ্ঞুবুদ্ধভাৱংপি গচ্ছন্তি. আসেৱনপচ্চযদীপনা নিট্ঠিতা.