নিগম পৰমত্থদীপনী

১৭২. চাৰিত্তেন কুলাচাৰেন সোভিতে ঞাতি মিত্ত ধন ভোগসম্পত্তিযা ৱিসালে কুলে উদযো ৱড্ঢি যস্স সোতি চাৰিত্তসোভিতৱিসালকুলোদযো. তেন. সদ্ধায অভিৱুড্ঢানং পৰিসুদ্ধানঞ্চ অত্তনো সীলসুতচাগাদিগুণানং উদযো ৱড্ঢি এতস্মিন্তি সদ্ধাতিৱুড্ঢপৰিসুদ্ধগুণোদযো. তেন. নম্পৱ্হযেনাতি নম্পনামকেন উপাসকেন. পণিধাযাতি ভুসং নিধায হদযে থপেত্ৱা উপাদায পটিচ্চ. পৰানুকম্পন্তি পৰেসং অত্তনো মন্দবুদ্ধীনং পচ্ছিমজনানং অনুকম্পং অনুদযং কাৰুঞ্ঞং পণিধাযাতি সম্বন্ধো. পত্থিতন্তি অভিযাচিতং. পুঞ্ঞেন তেন ৱিপুলেনাতি তেন ৱিপুলেন অভিধম্মত্থ সঙ্গহপকৰণস্স কৰণপুঞ্ঞেন. তুমূলসোমন্তি এৱং নামকং ৱিহাৰং. ৱুত্তঞ্হি খুদ্দসিক্খাটীকাযংসীহড়দীপে তুমূলসোমৱিহাৰে সঙ্ঘস্স পাকৱত্তংপি তাল পণ্ণং ৱিক্কিণিত্ৱা কৰীযতি. ন হি তত্থ পণ্ণেন অত্থো অত্থি. সব্বেপি ইট্ঠকচ্ছন্না পাসাদাদযোতি. এসো কিৰ ৱিহাৰো আদিতো অভযগিৰিৰঞ্ঞো অগ্গমহেসিভূতায সোমদেৱিযা কাৰাপিতত্তা যাৱজ্জতনাপি সোমৱিহাৰোত্ৱেৱ পঞ্ঞাযিত্থ. তুমূলসদ্দো পন ৱিপুলসদ্দপৰিযাযো.

অথেত্থ ৱত্ততি সদ্দো, তুমূলো ভেৰৱো মহা;

হত্থিনাগে পদিন্নম্হি, সিৱীনং ৰট্ঠৱড্ঢনেতি.

আদীসু

ৱিয. সোচ ৱিহাৰো সট্ঠিমত্তেহি মহাপৰিৱেণেহি সণ্ঠিতো হোতীতি অতিৱিয ৱিপুলো মহন্তো ৱিত্থিণ্ণো হোতি. তস্মা সো ৱিপুলত্তা মহন্তত্তা ৱিত্থিণ্ণত্তা তুমূল সোমোতি ৱুচ্চতি. তং তুমূলসোমং. অত্থতো মহাসোম ৱিহাৰন্তি ৱুত্তং হোতি. এতেন থেৰো অত্তনো আচৰিযৱংসস্স ৱসন ৱিহাৰং কিত্তেতি. অত্তনো ৱসনট্ঠানং পন নামৰূপপৰিচ্ছেদে কিত্তিতং. ধঞ্ঞাধিৱাসন্তি তস্মিং ৱিহাৰে আদিকম্মিকভূত মহিন্দত্থেৰাদীনং পুঞ্ঞৱন্তত্থেৰানং অজ্ঝাৱুট্ঠভূতং. দীপপসাদক মহামহিন্দত্থেৰস্স হি ৱংসে জাতত্তা তস্মিং ৱিহাৰে আদিকম্মিকভূতো মহাথেৰোপি মহিন্দত্থেৰোনামাতি ধাতুৱংসে ৱুত্তো. উদিতোদিতন্তি অতিৱিয উদিতং. নভমজ্ঝে পুণ্ণচন্দমণ্ডলং ৱিয সকলসীহড়দীপে অতিৱিয উগ্গতন্তি অত্থো. অৰিযমগ্গপঞ্ঞাৱসেন পৰিযত্তিৱেসাৰজ্জাদি পঞ্ঞাৱসেনৱা অৱদাতেহি পৰিযোদাতেহি গুণেহি সোতিতাতি পঞ্ঞাৱদাতগুণসোতিতা. তে এৱ লজ্জীপাপগৰহিনো. মঞ্ঞন্তূতি অনুস্সৰন্তু. পুঞ্ঞৱিভাৱোদয মঙ্গলাযাতি ৱিপুলানং পুঞ্ঞানং ৱড্ঢিসঙ্খাত মঙ্গলত্থায. তত্ৰাযং যোজনা, পুঞ্ঞেন তেন ৱিপুলেন ধঞ্ঞাধিৱাসং উদিতোদিতং তুমূলসোম ৱিহাৰঞ্চ তত্থ নিপাসিনো মহিন্দত্থেৰাদিকে পঞ্ঞাৱদাত গুণসোভিতে লজ্জিভূতে ভিক্খূচ পুঞ্ঞৱিভৱোদযমঙ্গলায আযুকন্তং মঞ্ঞন্তু পচ্ছিমা জনাতি. অথৱা, তংৱিহাৰং অঞ্ঞে পঞ্ঞাৱদাত গুণসোভিত লজ্জী ভিক্খূ মঞ্ঞন্তূতি যোজনা. এতেন থেৰো পচ্ছিমজনানং ছসু অনুত্তৰিযধম্মেসু অনুস্সতানুত্তৰিযসঙ্খাতং পুঞ্ঞৱিসেসঞ্চ মযংপি তাদিসগুণভাগিনো ভৱিস্সামাতি উস্সাহনুপাযঞ্চ পটিপাদেসীতি.

পৰমত্থদীপনী নিগমকথা

এত্তাৱতাচ –

নগৰে দীপৰঙ্গম্হি, গামে তি নামকে;

অট্ঠসুঞ্ঞদ্ৱযেকম্হি, সাকে জাতেন যা মযা.

মুংৰ্ৱাগামে অৰঞ্ঞম্হি, লঙ্ঘতীতি ৱিস্সুতালযে;

ৱসতা মহতো ভিক্খু, গণস্স হিতকাৰিনা.

পৰমত্থদীপনীনাম, সঙ্খতা সাৰদস্সিনা;

সাৰেসীনং হিতত্থায, সাৰাসাৰৱিৱেকিনং.

সুনিট্ঠিতা অযং টীকা, নিব্ভযা নিৰুপদ্দৱা;

নৱপঞ্চদ্ৱযেকম্হি, সাকে কোমুদসাৰদে.

তথা কল্যাণসঙ্কপ্পা, সাধূনং অমতপ্ফলা;

নিট্ঠং গচ্ছন্তু সব্বেপি, নিব্ভযা নিৰুপদ্দৱা.

যথা লোকম্হি জোতন্তি, উভো চন্দিমসূৰিযা;

তথেৱ পৰমত্থেসু, অযং পৰমত্থদীপনী.

পাড়িযত্তেসু সা সুভা, সদ্দনিৰুত্তিদীপনী;

উভো লোকম্হি জোতন্তু, সদ্ধম্মো যাৱ তিট্ঠতীতি.

তত্থ নগৰে দীপৰঙ্গম্হীতি দীপৱাসিমহাজনং ৰঞ্জেতীতি দীপৰঙ্গন্তি লদ্ধনামে নগৰে. গামে নামকেতি ৰোহিতমিগানং নিৱাসভূমিতলে পতিট্ঠিতত্তা এৱংনামকে মহাগামে. সাকেতি কলিযুগে. যা মযাতি পৰমত্থদীপনীনাম যাটীকা মযা সঙ্খতাতি সম্বন্ধো. লঙ্ঘতীতি ৱিস্সুতালযেতি এৱংৱিস্সুতে অৰঞ্ঞৱিহাৰে. সাৰেসীনন্তি সাৰগৱেসীনং. সাৰাসাৰৱিৱেকিনন্তি অযং সাৰো অযং অসাৰোতি এৱং সাৰঞ্চ অসাৰঞ্চৱিৱে চেত্ৱা জানিতুং সমত্থানং. সাকেতি কলিযুগে. কোমুদসাৰ দেতি কুমুদপুপ্ফযুত্তে সৰদউতু পৰিযাপন্নেপচ্ছি মকত্তিকমাসে. অমতপ্ফলাতি নিব্বানপযোজনা. সুভাতি অত্থব্যঞ্জনসম্পত্তিযা সোভণা. সদ্ধম্মোতি তিৱিধং সত্থুসাসনং ৱুচ্চতীতি.

ইতি অভিধম্মত্থসঙ্গহপকৰণস্স চতুত্থসংৱণ্ণনা

ভূতা পৰমত্থদীপনীনামা যংটীকা

সব্বাকাৰেন নিট্ঠিতা.