কাযখমনীয-নিদ্দেস

২৩৪. অভিৱাদন-সীলিস্স,

নিচ্চং ৱুড্ঢাপচাযিনো;

চত্তাৰো ধম্মা ৱড্ঢন্তি,

আযু ৱণ্ণো সুখং বলং.

২৩৫. পঞ্চিমে ভিক্খৱে ধম্মা আযুস্সা, কতমে পঞ্চ. সপ্পায-কাৰী হোতি. সপ্পাযেচ মত্তং জানাতি. পৰিণত্তভোজী চ হোতি. কাল-চাৰী চ, ব্ৰহ্ম-চাৰীচ. ইমে খো ভিক্খৱে পঞ্চ ধম্মা আযুস্সাতি.

২৩৬. পঞ্চিমে ভিক্খৱে ধম্মা আযুস্সা, কতমে পঞ্চ. সপ্পায-কাৰী হোতি. সপ্পাযেচ মত্তং জানাতি. পৰিণতভোজীচহোতি. সীলৱাচ, কল্যাণ মিত্তোচ. ইমে খো ভিক্খৱে পঞ্চ ধম্মা আযুস্সাতি.

২৩৭. পঞ্চ-সীলং সমাদায,

সমং কত্ৱা দিনে দিনে;

সতিমা পঞ্ঞৱা হুত্ৱা,

চৰে সব্বিৰিযাপথে.

২৩৮. পঞ্চিমে ভিক্খৱে চঙ্কমে আনিসংসা, কতমে পঞ্চ, অদ্ধানক্খমো হোতি. পধানক্খমো হোতি. অপ্পাবাধো হোতি. অসিতংপীতংখাযিতংসাযিতং সম্মা পৰিণামং গচ্ছতি. চঙ্কমাধিগতো সমাধি চিৰট্ঠিতিকো হোতি. ইমেখো ভিক্খৱে পঞ্চ চঙ্কমে আনি সংসাতি.

২৩৯. পৰিস্সাৱন-দানঞ্চ,

আৱাস-দানমেৱ চ;

গিলান-ৱত্থু-দানঞ্চ,

দাতব্বং মনুজাধিপ.

২৪০. কাতব্বং জিণ্ণকাৱাসং,

পটিসঙ্খৰণং তথা;

পঞ্চ-সীল-সমাদানং,

কত্ৱা তং সাধু-ৰক্খিতং;

উপোসথোপৱাসো চ,

কাতব্বোপোসথে ইতি.

২৪১. অতি-ভোত্তা ৰোগ-মূলং,

আযুক্খযং কৰোতি ৱে;

তস্মা তং অতি-ভুত্তিংৱ,

পৰিহৰেয্য পণ্ডিতো.

২৪২. অ-জিণ্ণে ভোজনং ৱিসং,

দুল্লদ্ধে অ-ৱিচাৰকে;

জিণ্ণে সু-লদ্ধে ৱিচাৰে,

ন ৱজ্জং সব্ব-ভোজনং.

২৪৩. চত্তাৰো পঞ্চ আলোপে,

আভুত্ৱা উদকং পিৱে;

অলং ফাসু-ৱিহাৰায;

পহিতত্তস্স ভিক্খুনো.

২৪৪. মনুজস্স সদা সতিমতো,

মত্তং জানতো লদ্ধ-ভোজনং;

তনুকস্স ভৱন্তি ৱেদনা,

সনিকং জীৰতি আযু পালযং.

২৪৫. গৰূনং অড্ঢ-সোহিচ্চং,

লহূনং নাতি-কিত্তিযা;

মত্তা-পমাণং নিদ্দিট্ঠং,

সুখং জীৰতি তাৱতা.

২৪৬. তোযাভাৱে পিপাসত্তা,

খণা পাণেহি মুচ্চতে;

তস্মা সব্বাসুৱত্থাসু,

দেয্যং ৱাৰিং পিপাসযে.

২৪৭. সীতোদকং পযো খুদ্দং,

ঘতমেকেকসো দ্ৱিসো;

তিস্সো সমগ্গমথ ৱা,

পগে পিতং যুৱত্তদং.

২৪৮. অন্নং ব্ৰহ্মা ৰসে ৱিণ্হু,

ভুত্তে চেৱ মহেসৰো;

এৱং ঞত্ৱাতু যো ভুঞ্জে,

অন্ন-দোসং ন লিম্পতে.

২৪৯. কত্তিকস্সন্তিমো ভাগো,

যং চাদো মিগ-মাসজো;

তাৱুভো যম-দাঠাখ্যো,

লঘ্ৱাহাৰোৱ জীৱতি.

২৫০. সত্থানুকুল-চৰিযা,

চিত্তঞ্ঞাৱসৱত্তিনা;

বুদ্ধি-ৰক্খিলিতত্থেন,

পৰিপুণ্ণং ৰসাযনং.

২৫০. অ-জাতিযা অ-জাতানং,

জাতানং ৱিনিৱত্তিযা;

ৰোগানং যো ৱিধি দিট্ঠো,

তং সুখত্থী সমাচৰে.

২৫২. আৰোগ্যং পৰমা লাভা,

সন্তুট্ঠি পৰমং ধনং;

ৱিস্সাসা পৰমা ঞাতি,

নিব্বানং পৰমং সুখং.