৬. সমী

‘‘অনু যং সমযা’’তি (২-১-১৫) চ ‘‘যস্স চাযামো’’তি (২-১-১৬) চ পাণিনিনো ৱচনদ্ৱযং, অযমেতেসমত্থো ‘‘যস্স সমযা সমীপৱাচী অনুসদ্দো, তেন সহ সমস্সতেতি চ, অনু যস্সাযামৱাচী, তেন স্যাদ্যন্তেন সহ সমস্সতে’’তি চ. ৱত্থুতো তু সামীপ্যাযামৱন্তানমনিদ্দেসেপি সামত্থিযা তদাক্খেপোতি দস্সেন্তো আহ-‘সমীপাযামান’মিচ্চাদি.

সম্বন্ধিত্তাতি সম্বন্ধিসদ্দা সকত্থমিৱ নিযতপটিযোগিনমাক্খপন্তি… তেন ৱিনা তেসং সকত্থাভাৱা. আযামো দীঘতা, ‘‘যস্স সমীপাযামেস্ৱনু’’তি যথাৱুত্তসুত্তদ্ৱযমাক্খেপেনুপদিসতি, ৱনস্স সামিপ্যমনুৱনং, ‘‘অসঙ্খ্যং ৱিভত্তিসম্পত্তিসমীপ’’ ইচ্চেৱ (৩-২) সিদ্ধেপুন সমীপগ্গহণং ৱিকপ্পত্থং, তেন ৱনস্সানুতি ৱাক্যেনাপি ভৱিতব্বং.

গঙ্গায আযামো অনুগঙ্গং, ভাগৱুত্তিকাৰো ‘‘লক্খণেনে’’তি ৱত্ততে. যস্সাযামৱাচী অনু, তেন লক্খণেন সমস্সতে অনুগঙ্গং বাৰাণসী, গঙ্গায লক্খণভূতায পসিদ্ধাযামগুণায বাৰাণসী লক্খীযতে যাৱাযতাযামা গঙ্গা তাৱাযম্পীতি সভাৱতো তূপমানোপমেয্যভাৱো সমাসে পতীযতে গঙ্গা ৱিয দীঘা’’তি লক্খিযলক্খণভাৱং ৱণ্ণেতি. এৱং সতি বাৰাণসীতি পঠমা নোপপজ্জতেতি মঞ্ঞমানো আহ-‘গঙ্গাযা মেন যুত্তা ‘‘ত্যাদি. অনুগঙ্গং বাৰাণসিযাতি বাৰাণসিযা গঙ্গাযামো লক্খণন্তি অত্থো.