২১. সঙ্খ্যা

অথ ‘‘সমাহাৰে নপুংসক’’ন্তি (৩-২০) ৱিজ্জমানে কিং ‘‘সঙ্খ্যাদী’’ তি ইমিনা সত্থগাৰৱকৰেনাতি আসঙ্কিয চোদেতি ‘ননুচে’চ্চাদি. তথাহিচ্চাদিনা ‘‘সমাহাৰে নপুংসক’’ন্তেৱ সিজ্ঝনং সমত্থেতি. যথাৱুত্তচোদনাচালনে পৰাধিপ্পাযং পৰিকপ্পেন্তো’চত্থে’তিআদিমাহ.

নেতি ইমিনা চত্থেতিআদিনা কতপৰিকপ্পনা ন সিজ্ঝতীতি দস্সেতি, তত্থ হেতুমাহ- ‘সম্বন্ধস্স পুৰিসাধীনত্তা’তি, সতিচেচ্চাদিনা ‘সমাহাৰে নপুংসক’ন্তেত্থ ৱিসেসনগ্গহণে পযোজনং ৱত্ৱা ‘সঙ্খ্যাদী’তি ইমস্স নিৰত্থকত্তমেৱ থিৰীকৰোতি.

পযোজনেতি লাঘৱপ্পযোজনে;

সম্বন্ধীযতীতি ৱিসেসনগ্গহণং সম্বন্ধীযতি;

এত্থাতি এতস্মিং ‘সঙ্খ্যাদী’সুত্তে;

তন্নেতি ইমিনা যথাৱুত্তং চোদনং নিৱত্তেতি.

‘সঙ্খ্যাদী’তি সুত্তস্স সাত্থকত্তমাহ- ‘চত্থসমাসানন্তৰ’মিচ্চাদিনা. একত্তব্যপদেসো কাতব্বোতি ‘‘সঙ্খ্যাপুব্বো দিগূ’’তি (২-১-৫২) সঙ্খ্যাপুব্বস্স সমাসস্স দিগুসঞ্ঞং ৱিধায তদত্থস্স ‘‘দিগুৰেকৱচন’’ন্তীমিনা (২-৪-১) একত্তব্যপদেসো পৰেহি ৱিয কাতব্বো.

সমাহৰণং সমাহাৰোতি ইমিনা ভাৱসাধনো-যং সমাহাৰসদ্দো. যদি সমাহৰীযতীতি সমাহাৰোতি কম্মসাধনো সিযা, তদা পঞ্চ কুমাৰিযো সমাহটাতি ৱাক্যস্সাত্থে ৱুত্তি সিযা পঞ্চকুমাৰীত্যেত্থ সকপদত্থপ্পধানত্তা বহুৱচনং সিযা ‘‘ঘাপস্সান্তস্সাপ্পধানস্সা’’তি (৩-২৪) অপ্পধানৰস্সত্তঞ্চ ন সিযা… সমাহটানমেৱ কুমাৰীনং পধানত্তা, তস্মা পঞ্চ গাৱো স মাহটাত্যেতস্মিং ৱাক্যে সমাসোৱ নত্থি কম্মসাধনস্সানুপগমতো. পঞ্চন্নং গুন্নং সমাহাৰো, চতুন্নং পথানং সমাহাৰোতি ৱাক্যে পন অত্থি, সমাহাৰস্সেকত্তা তু সতং যূথং ৱনন্তি এত্থ ৱিয সাভাৱিকমেকৱচনং সিদ্ধমেৱেতি ৱিঞ্ঞাপেতি.