৬৪. এক

ঘোচ ওচ ঘো ঘান্তওকাৰন্তা, নত্থি ঘো যেসন্তে অঘো, তেসং, সামঞ্ঞৱিধানতোতি কস্সচি লিঙ্গস্স অপৰামাসা সামঞ্ঞেন ৱিধানতো, নাদেকৱচনেসূতি নাদীসু একৱচনেসূতি অত্থো, হি হেতুম্হি, যস্মা কস্সচি এৱং দুট্ঠাধিপ্পাযো সিযা, তস্মা দুতিযমুদাহৰণন্তি অত্থো, দুতিযোপি হেতুম্হি, যস্মা সব্বেসং সঙ্গহণত্থং, তস্মা ন চ তথাধিপ্পেতন্তি অত্থো, সব্বেসমেকৱচনানং সঙ্গহণাভাৱে সুত্তানং ৱিৰচনপ্পকাৰমাহ-‘অঞ্ঞথা’তিআদি, উপৰিচাত্যাদীস্ৱযমধিপ্পাযো ‘‘সুত্তস্স ‘অংযোস্ৱঘোন’ন্তি ৱিৰচিতত্তা সামঞ্ঞেনে-কৱচনেস্ৱঘস্স নৰস্সত্তপ্পতীতি তপ্পটিসেধাভাৱা’দণ্ডি কুল’ন্তি ৰস্সত্তং ‘সিস্মিং নপুংসকে’তি ৱিধিসুত্তং ৱদেয্যা’’তি, ওকাৰন্তপ্পটিসেধন্তি ‘অঘোন’ন্তি ওকাৰন্তপ্পটিসেধং, আদেসন্তৰং ‘‘গোস্সা গসিহিনং সুগাৱগৱা’’ত্যাদিনা (২-৬৭) কৰীযমানং গাৱাদেসাদিকং, এত্থ পন নপুংসকে একৱচনন্তং দণ্ডি কুলন্তি ৱক্খমানত্তা নোদাহটং, যোসু পন ‘‘যোলোপনিসুদীঘো’’তি (২-৮৮) অদীঘস্সাপি দীঘৱিধানসামত্থিযা পঠমমেৱ দীঘস্স ৰস্সাভাৱেকাৱ কথাতি নোদাহটং, দণ্ডীদণ্ডীনি ইচ্চেৱ তু ভৱতি, নোস্সৱাতি পাঠো দিস্সতি, এত্থ ৱিজ্জমানে গে পৰে ওকাৰন্তস্স ৱা ৰস্সাপজ্জনদোসম্পসঙ্গতো নোস্সা’তি পাঠেন ভৱিতব্বং.