৪১. অতো

সুত্তে ‘অতো’তি ৱুত্তং ‘অকাৰন্ততো’তি কথং ৱুত্তীতি আহ ‘অতো’তিআদি, আদেসা হোন্তীতি সেসো, যকাৰানংযেৱ সিযুং… আএআদেসানমেকৱণ্ণত্তা, লোপে কতেতি ওকাৰস্স লোপে কতে, তন্নেতি যথাৱুত্তং ধচাদ্যপ্পটিক্খিপতি, পটিক্খেপে কাৰণমাহ-‘পৰলোপস্সা’তিআদি, কাৰণন্তৰং ৱত্তুমাৰভতে ‘কিঞ্চা’তিআদি, নিচ্চম্পৰলোপোৱ সিযা, ন পুব্বলোপোপি আগমপ্পযোগানুকূল্যেনাতিপি সক্কা ৱত্তুন্তি আহ-‘নচা’তিআদি, নিচ্চম্পৰলোপোযেৱাতি ন চ সক্কা মন্তুন্তি সম্বন্ধো, এৱং সন্তেত্যাদিনা তত্থ ৱিৰোধমাহ, অতোসম্ভৱাতি আদেসাকাৰতো সম্ভৱা, ঝিস্সাকাৰৱিধানং ‘‘যোসু ঝিস্স পুমে’’তি (২-৯৩) এতদেৱপযোজনন্তিআদিনা ৱুত্তপ্পযোজনাভাৱে কাৰণমাহ-‘অনিট্ঠত্তা’তি, অনভিমতত্তাতি অত্থো, পযোজনাভাৱানভিমতত্তমেৱ দস্সেসুমাহ-‘এতদত্থমেৱা’তিআদি, ইমস্সাতি ‘‘অতো যোনং টাটে’’তী মস্স সুত্তস্স, ঝিস্মাত্ৱেৱাতি ‘ঝিস্মা’ ইতি এতাদিসং সুত্তমেৱ, ঝিস্মা যোনং টাটেতিৱাতি ‘‘ঝিস্মা যোনং টাটে’’তি সুত্তং ৱা, অতোতি ‘অতো’ ইতি সুত্তং, তাদিসস্সপযোগস্সাতি অগ্গা, অগ্গে ইতি পযোগস্স.