বালদুজ্জনকণ্ড

২০৬. কাযদুচ্চৰিতাদীহি, সম্পন্নো পাপমানুজো;

বালোতি লোকনাথেন, কিত্তিতো ধম্মসামিনা.

২০৭. দুচিন্তিতচিন্তী চেৱ, দুব্ভাসিতভাসীপি চ;

দুক্কটকম্মকাৰী চ, পাপকো বালমানুজো.

২০৮. অতিপিযো ন কাতব্বো, খলো কোতুহলং কৰো;

সিৰসা ৱহমানোপি, অড্ঢপূৰো ঘটো যথা.

২০৯. সপ্পো দুট্ঠো খলো দুট্ঠো, সপ্পা দুট্ঠতৰো খলো;

মন্তোসধেহি তং সপ্পং, খলং কেনুপসম্মতি.

২১০. যো বালো মঞ্ঞতি বাল্যং, পণ্ডিতো ৱাপি তেনসো;

বালো চ পণ্ডিতমানী, স ৱে বালোতি ৱুচ্চতি.

২১১. মধূৱ মঞ্ঞতি বালো, যাৱ পাপং ন পচ্চতি;

যদা চ পচ্চতি পাপং, অথ দুক্খং নিগচ্ছতি.

২১২. ন সাধু বলৱা বালো, সাহসা ৱিন্দতে ধনং;

কাযস্স ভেদা দুপ্পঞ্ঞো, নিৰযং সোপপজ্জতি.

২১৩. ঘৰে দুট্ঠো মূসিকো চ, ৱনে দুট্ঠো চ ৱানৰো;

সকুণে চ দুট্ঠো কাকো, নৰেদুট্ঠো চ ব্ৰাহ্মণো.

২১৪. দীঘা জাগৰতো ৰত্তি, দীঘং সন্তস্স যোজনং;

দীঘো বালানসংসাৰো, সদ্ধম্মং অৱিজানতং.

২১৫. তিলমত্তং পৰেসঞ্চ, অপ্পদোসঞ্চ পস্সতি;

নাড়িকেৰম্পি সদোসং, খলজাতো ন পস্সতি.

২১৬. নত্তদোসং পৰে জঞ্ঞা, জঞ্ঞা দোসং পৰস্সতু;

গুয্হো কুম্মাৱ অঙ্গানি, পৰদোসঞ্চ লক্খযে.

২১৭. লুদ্ধং অত্থেন গণ্হেয্য, থদ্ধং অঞ্জলিকম্মুনা;

ছন্দানুৱত্তিযা মূড়্হং, যথাভূতেন পণ্ডিতং.

২১৮. যথা উদুম্বৰপক্কা, বহি ৰত্তকা এৱ চ;

অন্তোকিমিল সম্পুণ্ণা, এৱং দুজ্জনহদযা.

২১৯. যাৱজীৱম্পি চে বালো, পণ্ডিতং পযিৰুপাসতি;

ন সো ধম্মং ৱিজানাতি, দব্বী সূপৰসং যথা.

২২০. চৰঞ্চে নাধিগচ্ছেয্য, সেয্যং সদিসমত্তনো;

একচৰিযং দড়্হং কযিৰা, নত্থি বালে সহাযতা.

২২১. অজাতমতমূড়্হানং, ৱৰমাদযো ন চন্তিমো;

সকিং দুক্খকৰাৱাদ-যোন্তিমো তু পদে পদে.

২২২. দুজ্জনেন সমং ৱেৰং, সখ্যঞ্চাপি ন কাৰযে;

উণ্হো দহতি চঙ্গাৰো, সীতো কণ্হাযতে কৰং.

২২৩. দুজ্জনো পিযৱাদী চ, নেতং ৱিস্সাসকাৰণং;

মধু তিট্ঠতি জিৱ্হগ্গে, হদযে হলাহলং ৱিসং.

২২৪. দুজ্জনো পৰিহাতব্বো, ৱিজ্জাযালঙ্কতোপি চ;

মণিনা ভূসিতো সপ্পো, কিমেসো ন ভযঙ্কৰো.

২২৫. নাড়িকেৰসমাকাৰা, দিস্সন্তেপি হি সজ্জনা;

অঞ্ঞে বদৰিকাকাৰা, বহিৰেৱ মনোহৰা.

যথাপি পন সপক্কা, বহি কণ্টকমেৱ চ;

অন্তো অমতসম্পুণ্ণা, এৱং সুজনহদযা.

যথা উদুম্বৰপক্কা, বহি ৰত্তকমেৱ চ;

এৱং কিমিলসম্পুণা, এৱং দুজ্জনহদযা.

২২৬. দোসভীতো অনাৰম্ভো, তং কা পুৰিসলক্খণং;

কোহ্যজিণ্ণভযা ননু, ভোজনং পৰিহীযতে.

২২৭. পযোপানং ভুজঙ্গানং, কেৱলং ৱিসৱড্ঢনং;

উপদেসো হি মূড়্হানং, পকোপায ন সন্তিযা.

২২৮. ন ঠাতব্বং ন গন্তব্বং, দুজ্জনেন সমং ক্ৱচি;

দুজ্জনো হি দুক্খং দেতি, ন সো সুখং কদাচিপি.

২২৯. অবদ্ধা তত্থ বজ্ঝন্তি, যত্থ বালা পভাসৰে;

বদ্ধাপি তত্থ মুচ্চন্তি, যত্থ ধীৰা পভাসৰে.

২৩০. পৰিত্তং দাৰুমাৰুয্হ, যথা সীদে মহণ্ণৱে;

এৱং কুসিতমাগম্ম, সাধু জীৱিপি সীদতি;

তস্মা তং পৰিৱজ্জেয্য, কুসীতং হীনৱীৰিযং.

২৩১. সদ্ধাসীলাদিসম্পন্নো, সুমিত্তো সাধুমানুসো;

তাদিসং মিত্তং সেৱেয্য, ৱুদ্ধিকামো ৱিচক্খণো.

২৩২. দানাদিগুণসেট্ঠেহি, মিদিতব্বো মিত্তো হি খো;

তাদিসং অৱঙ্কেনেৱ, মনসা ভজেয্য সুধী.

৩৩৩. হিতক্কৰো পৰো বন্ধু, বন্ধুপি অহিতো পৰো;

অহিতো দেহজো ব্যাধি, হিতং অৰঞ্ঞমোসধং.

২৩৪. পৰোক্খে কিচ্চহন্তাৰং, পচ্চক্খে পিযৱাদিনং;

ৱজ্জযে তাদিসং মিত্তং, ৱিসকুম্ভং পযোমুখং.

১৩৫. ধনহীনে চজে মিত্তো, পুত্তদাৰা সহোদৰা;

ধনৱন্তেৱ সেৱন্তি, ধনং লোকে মহাসখা.

২৩৬. জানিযা পেসনে ভচ্চে, বন্ধৱে ব্যসনাগমে;

মিত্তঞ্চ আপদিকালে, ভৰিযঞ্চ ৱিভৱক্খযে.

২৩৭. উস্সৱে ব্যসনে চেৱ, দুব্ভিক্খে সত্তুৱিগ্গহে;

ৰাজদ্ৱাৰে সুসানে চ, যো তিট্ঠতি সো বন্ধৱা.

২৩৮. ন ২ ৱিস্সসে অমিত্তস্স, মিত্তঞ্চাপি ন ৱিস্সসে;

কদাচি কুপিতে মিত্তে, সব্বদোসং পকাসতি.

২৩৯. মাতা মিত্তং পিতা চেতি, সভাৱা তং তযং হিতং;

কম্মকৰণতো চঞ্ঞে, ভৱন্তি হিতবুদ্ধিযো.

২৪০. আপদাসু মিত্তং জঞ্ঞা, যুদ্ধে সূৰং ইণে সুচিং;

ভৰিযং খীণেসু ৱিত্তেসু, ব্যসনেসু চ বন্ধৱং.

২৪১. সকিং দুট্ঠঞ্চ যো মিত্তং, পুন সন্ধাতুমিচ্ছতি;

স মচ্চুমুপগণ্হাতি, গব্ভং অস্সতৰী যথা.

২৪২. ইণসেসো অগ্গিসেসো, ৰোগসেসো তথেৱ চ;

পুনপ্পুনং ৱিৱড্ঢন্তি, তস্মা সেসং ন কাৰযে.

২৪৩. পদুমংৱ মুখং যস্স, ৱাচা চন্দনসীতলা;

তাদিসং নো পসেৱেয্য, হদযে তু হলাহলং.

২৪৪. ন সেৱে ফৰুসং সামিং, ন চ সেৱেয্য মচ্ছৰিং;

ততো অপগ্গণ্হ সামিং, নেৱ নিগ্গহিতং ততো.

২৪৫. কুদেসঞ্চ কুমিত্তঞ্চ, কুকুলঞ্চ কুবন্ধৱং;

কুদাৰঞ্চ কুদাসঞ্চ, দূৰতো পৰিৱজ্জযে.

২৪৬. সীতৱাচো বহুমিত্তো, ফৰুসো অপ্পমিত্তকো;

উপমা এত্থ ঞাতব্বা, সূৰিযচন্দৰাজূনং.

২৪৭. অহিতা পটিসেধো চ, হিতেসু চ পযোজনং;

ব্যসনে অপৰিচ্চাগো, ইতিদং মিত্তলক্খণং.

২৪৮. পিযো গৰু ভাৱনীযো, ৱত্তা চ ৱচনক্খমো;

গম্ভীৰঞ্চ কথং কত্তা, নো চট্ঠানে নিযোজকো;

তাদিসং মিত্তং সেৱেয্য, ভূতিকামো ৱিচক্খণো.

পিযো গৰু ভাৱ নীযো, ৱত্তা চ ৱচনক্খমো;

গম্ভিৰঞ্চ কথং কত্তা, নো চট্ঠানে নিযোজকো.

যম্হি এতানি ঠানানি, সংৱিজ্জন্তিধ পুগ্গলে;

সো মিত্তো মিত্তকামেন, অত্থকামানুকম্পতো;

অপি নাসিযমানেন, ভজিতব্বো তথাৱিধো.

২৪৯. ওৰসং কতসম্বন্ধং, তথা ৱংসক্কমাগতং;

ৰক্খকো ব্যসনেহি, মিত্তং ঞেয্যং চতুব্বিধং.

২৫০. পিযো গৰু ভাৱনিযো, ৱত্তা চ ৱচনক্খমো;

গম্ভিৰঞ্চ কথং কত্তা, ন চট্ঠানে নিযোজকো;

তং মিত্তং মিত্তকামেন, যাৱজীৱম্পি সেৱিযং.

পিযো গৰু ভাৱনীযো, ৱত্তা চ ৱচনক্খমো;

গম্ভিৰঞ্চ কথং কত্তা, নো চট্ঠানে নিযোজকো;

তাদিসং মিত্তং সেৱেয্য, ভূতিকামো ৱিচক্খণো.