ৰাজকণ্ড

২৫১. মহাজনং যো ৰঞ্জেতি, চতূহিপি ৱত্থূহি ৱা;

ৰাজাতি ৱুচ্চতে লোকে, ইতি সল্লক্খযে ৱিদ্ৱা.

২৫২. দানঞ্চ অত্থচৰিযা, পিযৱাচা অত্তসমং;

সঙ্গহা চতুৰো ইমে, মুনিন্দেন পকাসিতা.

দানম্পি অত্থচৰিযতঞ্চ, পিযৱাদিতঞ্চ সমানত্ততঞ্চ;

কৰিযচৰিযসুসঙ্গহং বহূনং, অনৱমতেন গুণেন যাতি সগ্গং;

দানঞ্চ পেয্যৱজ্জঞ্চ, অত্থচৰিযা চ যা ইধ;

সমানত্ততা চ ধম্মেসু, তত্থ তত্থ যথাৰহং;

এতে খো সঙ্গহা লোকে, ৰথস্সাণীৱ যাযতো.

২৫৩. দানং সীলং পৰিচ্চাগং, অজ্জৱং মদ্দৱং তপং;

অক্কোধং অৱিহিংসঞ্চ, খন্তী চ অৱিৰোধনং;

দসেতে ধম্মে ৰাজানো, অপ্পমত্তেন ধাৰয্যুং.

২৫৪. একযামং সযে ৰাজা, দ্ৱিযা মঞ্ঞেৱ পণ্ডিতো;

ঘৰাৱাসো তিযামোৱ, চতুযামো তু যাচকো.

২৫৫. অপুত্তকং ঘৰং সুঞ্ঞং, ৰট্ঠং সুঞ্ঞং অৰাজকং;

অসিপ্পস্স মুখং সুঞ্ঞং, সব্বসুঞ্ঞং দলিদ্দত্তং.

২৫৬. ধনমিচ্ছে ৱাণিজেয্য, ৱিজ্জমিচ্ছে ভজে সুতং;

পুত্তমিচ্ছে তৰুণিত্থিং, ৰাজামচ্চং ইচ্ছাগতে.

২৫৭. পক্খীনং বলমাকাসো, মচ্ছানমুদকং বলং;

দুব্বলস্স বলং ৰাজা, কুমাৰানং ৰুদং বলং.

২৫৮. খমা জাগৰিযুট্ঠানং, সংৱিভাগো দযিক্খণা;

নাযকস্স গুণা এতে, ইচ্ছিতব্বা সতং সদা.

২৫৯. সকিং ৱদন্তি ৰাজানো, সকিং সমণব্ৰাহ্মণা;

সকিং সপ্পুৰিসা লোকে, এস ধম্মো সনন্তনো.

২৬০. অলসো গীহি কামভোগী ন সাধু,

অসঞ্ঞতো পব্বজিতো ন সাধু;

ৰাজা ন সাধু অনিসম্মকাৰী,

যো পণ্ডিতো কোধনো তং ন সাধু.

২৬১. আযং খযং সযং জঞ্ঞা, কতাকতং সযং জঞ্ঞা;

নিগ্গহে নিগ্গহাৰহং, পগ্গহে পগ্গহাৰহং.

২৬২. মাতা পুত্তকতং পাপং, সিস্সকতং গুৰু তথা;

ৰাজা ৰট্ঠকতং পাপং, ৰাজকতং পুৰোহিতো.

২৬৩. অক্কোধেন জিনে কোধং, অসাধুং সাধুনা জিনে;

জিনে কদৰিযং দানেন, সচ্চেনালিকৱাদিনং.

২৬৪. অদন্তদমনং দানং, দানং সব্বত্থসাধকং;

দানেন পিযৱাচায, উন্নমন্তি নমন্তি চ.

অদন্তদমনং দানং, অদানং দন্তদূসকং;

দানেন পিযৱাচায, উন্নমন্তি নমন্তি চ.

২৬৫. দানং সিনেহভেসজ্জং, মচ্ছেৰং দোসনোসধং;

দানং যসস্সীভেসজ্জং, মচ্ছেৰং কপণোসধং.

২৬৬. ন ৰঞ্ঞা সমকং ভুঞ্জে, কামভোগং কুদাচনং;

আকপ্পং ৰসভুত্তং ৱা, মালাগন্ধৱিলেপনং;

ৱত্থসব্বমলঙ্কাৰং, ন ৰঞ্ঞা সদিসং কৰে.

২৬৭. ন মে ৰাজা সখা হোতি, ন ৰাজা হোতি সমকো;

এসো সামিকো ময্হন্তি, চিত্তে নিট্ঠং সণ্ঠাপযে.

২৬৮. নাতিদূৰে ভজে ৰঞ্ঞো, নচ্চাসন্নে পৱাতকে;

উজুকে নাতিনিন্নে চ, ন ভজে উচ্চমাসনে;

ছ দোসে ৱজ্জে সেৱকো, অগ্গীৱ সংযতো তিট্ঠে.

ন পচ্ছতো ন পুৰতো, নাপি আসন্নদূৰতো;

ন কচ্ছে নোপি পটিৱাতে, ন চাপি ওণতুণ্ণতে;

ইমে দোসে ৱিৱজ্জেত্ৱা, একমন্তং ঠিতা অহু –

২৬৯. জপ্পেন মন্তেন সুভাসিতেন,

অনুপ্পদানেন পৱেণিযা ৱা;

যথা যথা যত্থ লভেথ অত্থং,

তথা তথা তত্থ পৰক্কমেয্য.

২৭০. কস্সকো ৱাণিজো মচ্চো, সমণো সুতসীল ৱা;

তেসু ৱিপুলজাতেসু, ৰট্ঠম্পি ৱিপুলং সিযা.

২৭১. তেসু দুব্বলজাতেসু, ৰট্ঠম্পি দুব্বলং সিযা;

তস্মা সৰট্ঠং ৱিপুলং, ধাৰযে ৰট্ঠভাৰৱা.

২৭২. মহাৰুক্খস্স ফলিনো, আমং ছিন্দতি যো ফলং;

ৰসঞ্চস্স ন জানাতি, বীজঞ্চস্স ৱিনস্সতি.

২৭৩. মহাৰুক্খূপমং ৰট্ঠং, অধম্মেন পসাসতি;

ৰসঞ্চস্স ন জানাতি, ৰট্ঠঞ্চস্স ৱিনস্সতি.

২৭৪. মহাৰুক্খস্স ফলিনো, পক্কং ছিন্দতি যো ফলং;

ৰসঞ্চস্স ৱিজানাতি, বীজঞ্জস্স ন নস্সতি.

২৭৫. মহাৰুক্খূপমং ৰট্ঠং, ধম্মেন যো পসাসতি;

ৰসঞ্চস্স ৱিজানাতি, ৰট্ঠঞ্চস্স ন নস্সতি.