ইত্থিকণ্ড

২৯৫. আসা লোকিত্থিযো নাম, ৱেলা তাসং ন ৱিজ্জতি;

সাৰত্তা চ পগব্ভা চ, সিখী সব্বঘসো যথা;

তস্মা তাযো হিত্ৱান, ব্ৰূহেয্য ৱিৱেকং সুধী.

আসা লোকিত্থিযো নাম, ৱেলা তাসং ন ৱিজ্জতি;

সাৰত্থা চ পগব্ভা চ, সিখী সব্বঘসো যথা;

তা হিত্ৱা পব্বজিস্সামি, ৱিৱেকমনুব্ৰূহযং.

২৯৬. লোকে হি অঙ্গনা নাম, কোধনা মিত্তভেদিকা;

পিসুকা অকতঞ্ঞূ চ দূৰতো পৰিৱজ্জযে.

২৯৭. যথা নদী চ পন্থো চ, পানাগাৰং সভা পপা;

এৱং লোকিত্থিযো নাম, নাসং কুজ্ঝন্তি পণ্ডিতা.

২৯৮. সব্বা নদী ৱঙ্কগতী, সব্বে কট্ঠমযা ৱনা;

সব্বিত্থিযো কৰে পাপং, লভমানে নিৱাতকে.

২৯৯. ঘটকুম্ভসমা নাৰী, তত্থঙ্গাৰসমো পুমা;

তস্মা ঘতঞ্চ অগ্গিঞ্চ, নেকত্ৰ ঠপযে বুধো.

৩০০. ইত্থীনঞ্চ ধনং ৰূপং, পুৰিসানং ৱিজ্জা ধনং;

ভিক্খূনঞ্চ ধনং সীলং, ৰাজানঞ্চ ধনং বলং.

৩০১. পঞ্চাৰত্যা সুগন্ধব্বা, সত্তাৰত্যা ধনুগ্গহা;

একমাসা সুভৰিযা, অড্ঢমাসা সিস্সা মলা.

৩০২. জিণ্ণে অন্নং পসংসেয্য, দাৰঞ্চ গতযোব্বনে;

ৰণপুনাগতে সূৰং, সস্সঞ্চ গেহমাগতে.

৩০৩. দ্ৱিতিপতি নাৰী চেৱ, ৱিহাৰদ্ৱিতি ভিক্খু চ;

সকুণো দ্ৱিতিপাতো চ, কতমাযাবহুতৰা.

৩০৪. ৰত্তি ৱিনা ন চন্দিমা, ৱীচিৱিনা চ সাগৰো;

হংসৱিনা পোক্খৰণী, পতিৱিনা কঞ্ঞা সোভে.

৩০৫. অসন্তুট্ঠা যতী নট্ঠা, সন্তুট্ঠাপি চ পত্থি ৱা;

সলজ্জা গণিকা নট্ঠা, নিল্লজ্জা চ কুলিত্থিযো.

৩০৬. চোৰীনং বহুবুদ্ধীনং, যাসু সচ্চং সুদুল্লভং;

থীনং ভাৱো দুৰাজানো, মচ্ছস্সেৱো’দকে গতং.

৩০৭. অনলা মুদুসম্ভাসা, দুপ্পূৰা তা নদীসমা;

সীদন্তি নং ৱিদিত্ৱান, আৰকা পৰিৱজ্জযে.

৩০৮. আৱট্টনী মহামাযা, ব্ৰহ্মচৰিযৱিকোপনা;

সীদন্তি নং ৱিদিত্ৱান, আৰকা পৰিৱজ্জযে.

৩০৯. ইত্থীপি হি একচ্চিযা, সেয্যা পোস জনাধিপ;

মেধাৱিনী সীলৱতী, সস্সুদেৱা পতিব্বতা;

৩১০. তস্সা যো জাযতি পোসো,

সূৰো হোস দিসম্পতি;

তাদিসা সুভগিযা পুত্তো,

ৰজ্জম্পি অনুসাসতি.

৩১১. সল্লপে অসিহত্থেন, পিসাচেনাপি সল্লপে;

আসীৱিসম্পি আসীদে, যেন দট্ঠো ন জীৱতি;

ন ত্ৱেৱ একো একায, মাতুগামেন সল্লপে.

৩১২. ন হি সব্বেসু ঠানেসু, পুৰিসো হোতি পণ্ডিতো;

ইত্থীপি পণ্ডিতা হোতি, তত্থ তত্থ ৱিচক্খণা.

৩১৩. ন হি সব্বেসু ঠানেসু, পুৰিসো হোতি পণ্ডিতো;

ইত্থীপি পণ্ডিতা হোতি, লহুং অত্থৱিচিন্তিকা.

৩১৪. কূপোদকং ৱটচ্ছাযা, সামাথী ইট্ঠকালযং;

সীতকালে ভৱে উণ্হং, উণ্হকালে চ সীতলং.

৩১৫. ইত্থিযো একচ্চিযাপি, সেয্যা ৱুত্তাৱ মুনিনা;

ভণ্ডানং উত্তমা ইত্থী, অগ্গূপট্ঠাযিকা ইতি.