পকিণ্ণককণ্ড

৩১৬. কুলসীলগুণোপেতো, সব্বধম্মপৰাযণো;

পৱীণো পেসনাজ্ঝক্খো, ধম্মজ্ঝক্খো ৱিধীযতে.

৩১৭. ৱেদৱেদঙ্গতত্ৱঞ্ঞো, জপ্পহোমপৰাযণো;

আসীৱাদৱচোযুত্তো, এস ৰাজপুৰোহিতো.

কপ্পো ব্যাকৰণং জোতি – সত্থং সিক্খা নিৰুত্তি চ;

ছন্দোৱিচিতি চেতানি, ৱেদঙ্গানি ৱদন্তি ছ.

৩১৮. সকিং ৱুত্তগহিতত্তো, লহুহত্থো জিতক্খৰো;

সব্বসত্থসমালোকী, পকট্ঠো নাম লেখকো.

৩১৯. সমত্তনীতিসত্থঞ্ঞো, ৱাহনে পূৰিতস্সমো;

সূৰৱীৰগুণোপেতো, সেনাঝক্খো ৱিধীযতে.

৩২০. সুধী ৱাক্যপটু, পঞ্ঞো, পৰচিত্তোপলক্খণো;

ধীৰো যথাত্থৱাদী চ, এস দূতো ৱিধীযতে.

৩২১. পুত্তনত্তগুণোপেতো, সত্থঞ্ঞো ৰসপাচকো;

সূৰো চ কথিনো চেৱ, সূপকাৰো স ৱুচ্চতে.

৩২২. ইঙ্গিতাকাৰতত্তঞ্ঞো, বলৱাপিযদস্সনো;

অপ্পমাদী সদা দক্খো, পতীহাৰো স উচ্চতে.

৩২৩. ইত্থিমিস্সে কুতো সীলং, মংসভক্খে কুতো দযা;

সুৰাপানে কুতো সচ্চং, মহালোভে কুতো লজ্জা;

মহাতন্দে কুতো সিপ্পং, মহাকোধে কুতো ধনং.

৩২৪. সুৰাযোগো ৱেলালো চ, সমজ্জচৰণঙ্গতো;

খিড্ডা ধুত্তো পাপমিত্তো, অলসো ভোগনাসকা.

৩২৫. জীৱন্তাপি মতা পঞ্চ, ব্যাসেন পৰিকিত্তিতা;

দুক্খিতো ব্যাধিতি মূড়্হো, ইণৱা নিচ্চসেৱকো.

৩২৬. নিদ্দালুকো পমাদো চ, সুখিতো ৰোগৱালসো;

কামুকো কম্মাৰামো চ, সত্তেতে সত্থৱজ্জিতা.

৩২৭. গোণাহি সব্বগিহীনং, পোসকা ভোগদাযকো;

তস্মা হি মাতাপিতূৱ, মানযে সক্কৰেয্য চ.

৩২৮. যথা মাতা পিতা ভাতা, অঞ্ঞেৱাপি চ ঞাতকা;

গাৱো নো পৰমা মিত্তা, যাসু জাযন্তি ওসধা.

৩২৯. অন্নদা বলদা চেতা, ৱণ্ণদা সুখদা তথা;

এতমত্থৱসং ঞত্ৱা, নাসু গাৱো হনিংসু তে.

৩৩০. যে চ খাদন্তি গোমংসং, মাতুমংসংৱ খাদৰে;

মতেসু তেসু গিজ্ঝানং, দদে সোতে চ ৱাহযে.

৩৩১. দ্ৱিগুণো থীনমাহাৰো, বুদ্ধিচাপি চতুগ্গুণো;

ছগ্গুণো হোতি ৱাযামো, কামোত্ৱট্ঠগুণো ভৱে.

৩৩২. ন লোকে সোভতে মূড়্হো, কেৱলত্তপসংসকো;

অপি সম্পিহিতে কূপে, কতৱিজ্জো পকাসতে.

৩৩৩. কোসজ্জং ভযতো দিস্ৱা, ৱীৰিযাৰম্ভঞ্চ খেমতো;

আৰদ্ধৱীৰিযা হোথ, এসা বুদ্ধানুসাসনী.

৩৩৪. ৱিৱাদং ভযতো দিস্ৱা, অৱিৱাদঞ্চ খেমতো;

সমগ্গা সখিলা হোথ, এসা বুদ্ধানুসাসনী.

৩৩৫. পমাদং ভযতো দিস্ৱা, অপ্পমাদঞ্চ খেমতো;

ভাৱেথট্ঠঙ্গিকং মগ্গং, এসা বুদ্ধানুসাসনী.

৩৩৬. গৰহা চ পসংসা চ, অনিচ্চা তাৱকালিকা;

অপ্পকাচেকদেসাৱ, ন তা ইক্খেয্য পণ্ডিতো;

ধম্মাধম্মংৱ ইক্খেয্য, অত্থানত্থং হিতাহিতং.