৫. |ও০.০০৪৫| ধাতুনিধানাধিকাৰো

ততো ৱিমংসেত্ৱা ভুমিভাগং গহেতুং ৱট্টতী’তি ভূমি ভাগং ৱীমংসেন্তো মঙ্গলসম্মতে অট্ঠ গোণে আহৰাপেত্ৱা গন্ধোদকেন নহাপেত্ৱা সিঙ্গেসু সুৱণ্ণকঞ্চুকং পতিমুঞ্চাপেত্ৱা গন্ধপঞ্চঙ্গুলিকং দাপেত্ৱা গীৱায মালাদামং বন্ধাপেত্ৱা অযোদামেন বন্ধাপেত্ৱা এৱং চিন্তেসি? যদি পন ভগৱতো নলাটধাতু যস্মিং ঠানে পতিট্ঠহিত্ৱা লোকত্থচৰিযং কৰোন্তী পঞ্চৱস্সসহস্সানি সাসনং পতিট্ঠহিস্সতি তস্মিং ঠানে গোণা সযমেৱ অযোদামতো মুঞ্চিত্ৱা থুপট্ঠানং সমন্ততো ৱিচৰিত্ৱা চতুসু দিসাসু সযন্তুতি অধিট্ঠহিত্ৱা পুৰিসে আণাপেসি. তে তথেৱ অকংসু. ততো ৱিভাতায ৰত্তিযা ৰাজাগোণে গাহাপনত্থায আযুত্তকে আণাপেসি. তে মনুস্সা গন্ত্ৱা গোণে অপস্সিত্ৱা ন পস্সাম দেৱা’তি ৰঞ্ঞো আৰোচেসুং. গচ্ছ ভণে, গোণানং গতট্ঠানং ওলোকেথা’তি আহ. তে গৱেসমানা বন্ধনট্ঠানে অদিস্ৱা পদানুপদং গন্ত্ৱা থূপকৰণট্ঠানং সমন্তা ৱিচৰিত্ৱা চতুসু দিসাসু সযিতগোণে দিস্ৱা সযিতট্ঠানতো নঙ্গুট্ঠাদীনি মদ্দন্তাপি উট্ঠাপেতুং অসক্কোন্তা গন্ত্ৱা ৰঞ্ঞো আৰোচেসুং; দেৱ, গোণা ন উট্ঠহন্তি, একং ঠানং সমন্তা ৱিচৰিত্ৱা চতুসু দিসাসু সযিতা’তি. তং সুত্ৱা ৰাজা সেনঙ্গপৰিৱুতো সযমেৱ গন্ত্ৱা’পি গোণে উট্ঠাপেতুং অসক্কোন্তো ৰাজা এৱং অধিট্ঠাসি; যদি ইমস্মিং ঠানে ধাতু পতিট্ঠাপেতব্বা ভৱেয্য গোণা উট্ঠহিত্ৱা গচ্ছন্তু’তি. গোণা চিত্তক্খণেযেৱ উট্ঠহিত্ৱা পলাযিংসু. ৰাজা তং অচ্ছৰিযং দিস্ৱা পসন্নমনো হুত্ৱা পুনেকদিৱসং ৱুত্তনিযামেনেৱ অস্সে |ও০.০০৪৬| অলঙ্কাৰাপেত্ৱা অযোদামেন বন্ধাপেত্ৱা ঠপেসি. অস্সাপি তে গোণা ৱিয গন্ত্ৱা নিপজ্জিংসু. ৰাজা গন্ত্ৱা তথেৱ অধিট্ঠহিত্ৱা অস্সে উট্ঠাপেসি. পুনেকদিৱসং হত্থীং অলঙ্কাৰাপেত্ৱা তথেৱ অধিট্ঠাসি. সোপি বন্ধদামে ছিন্দিত্ৱা পচ্ছিমযামসমনন্তৰে গন্ত্ৱা চেতিযকৰণট্ঠানে নিপজ্জি. পভাতায ৰত্তিযা ৰাজা হত্থীগোপকে পক্কোসাপেত্ৱা হত্থিং আনেথা’তি আহ. হত্থিগোপকা হত্থিং বন্ধনট্ঠানে অদিস্ৱা, হত্থিং বন্ধনট্ঠানে ন পস্সাম দেৱা’তি আহংসু. তেনহি ভণে, সীঘং উপধাৰেথা’তি ৱুত্তে হত্থিগোপকা পদানুপদং গৱেসমানা চেতিযট্ঠানে নিপন্নং হত্থিং দিস্ৱা আগন্ত্ৱা ৰঞ্ঞো আৰোচেসুং. তং সুত্ৱা ৰাজা হেট্ঠা ৱুত্তপ্পকাৰেন পটিপজ্জিত্ৱা হত্থিং পুৰে কত্ৱা আগচ্ছি.

এৱং তীহি ৱিমংসনাহি ৱীমংসেত্ৱা ভুমিগহিতভাৱং থেৰস্স সন্তিকং গন্ত্ৱা ৱন্দিত্ৱা উপট্ঠহমানো আৰোচেসি. তস্মিং কালে সেৰুনগৰে সিৱৰাজা বহূ পণ্ণাকাৰে গাহাপেত্ৱা ৰাজানং পস্সিস্সামি’তি আগন্ত্ৱা ৱন্দিত্ৱা একমন্তং অট্ঠাসি. ৰাজা তেন সদ্ধিং সম্মোদনীযং কথং কত্ৱা নিসিন্নকালে লোণনগৰে মহানাগৰাজা’পি বহুপণ্ণাকাৰং গাহাপেত্ৱা ৰাজানং পস্সিস্সামি’তি আগন্ত্ৱা ৱন্দিত্ৱা একমন্তং নিসীদি. তেন সদ্ধিং সম্মোদনীযং কথং অকাসি; ইমস্মিং ঠানে দসবলধাতুং পতিট্ঠাপেস্সামি, তুম্হে মম সহাযা হোথা’তি তে গহেত্ৱা গন্ত্ৱা ধাতুং ৱন্দথা’তি ৱন্দাপেসি. তস্মিং খণে ধাতুতো ছব্বণ্ণৰংসিযো উগ্গচ্ছিংসু. দেৱা সাধুকাৰং কৰোন্তা আকাসতো মালাযো খিপিংসু. ৰাজানো সোমনস্সপ্পত্তা অম্হাকং লঙ্কাযং দসবলস্স নলাটধাতু অম্হাকং ৰট্ঠে পতিট্ঠহিস্সতি. এসা ধাতু মহা জনস্স সত্থুকিচ্চং সাধেয্যাতি ৱন্দিত্ৱা গতা. ৰাজা তেসং গতকালে গিৰিঅভযং পক্কোসাপেত্ৱা তাত, ইট্ঠকং জনস্স পীড়নং অকত্ৱা কাৰাপেমা’তী আহ. মা চিন্তযিত্থ দেৱ, অহং |ও০.০০৪৭| ইট্ঠকং কাৰাপেস্সামীতি. এৱঞ্হি সতি পপঞ্চো ভৱিস্সতী’তি আহ. অম্হাকং সন্তিকে সুৱণ্ণৰজতানি মন্দানি কুতো লভিস্সামা’তি ৱুত্তে গিৰিঅভযো এৱমাহ; দেৱ, সত্থা মহাপুঞ্ঞো মহন্তং পূজাসক্কাৰসম্মানং লভিস্সতি. ত্ৱং অচিন্তেত্ৱা চেতিযকম্মং পট্ঠপেহী’তি আহ.

সো তস্স তং অচিন্তনীযং কথং সুত্ৱা সোমনস্সপ্পত্তো থেৰস্স সন্তিকে ধম্মং সুত্ৱা ধাতুং ৱন্দিত্ৱা নগৰং গন্ত্ৱা ভুত্তসাযমাসো সযনে নিপন্নো নিদ্দং ওক্কমি. ৱিভাতায ৰত্তিযা পবুজ্ঝিত্ৱা ইট্ঠকং চিন্তযমানস্স দোমনস্সং অহোসি. তস্মিং কালে সক্কো দেৱৰাজা ৱিস্সকম্মং দেৱপুত্তং আমন্তেত্ৱা; তাত, ৱিস্সকম্ম, কাকৱণ্ণতিস্সমহাৰাজা অম্হাকং সত্থুনো নলাট ধাতুং নিদহিত্ৱা মহন্তং চেতিযং কাৰাপেতুকামো ইট্ঠকং চিন্তযি. ত্ৱং গন্ত্ৱা ফাসুকট্ঠানে ইট্ঠকং মাপেহীতি আহ. তং সুত্ৱা ৱিস্সকম্মদেৱপুত্তো দুগ্গতস্স ব্ৰাহ্মণস্স খেত্তে ইট্ঠকং মাপেত্ৱা দেৱলোকমেৱ গতো. তস্মিং খণে খেত্তসামিকো দুগ্গতব্ৰাহ্মণো পাতোৱ অত্তনো খেত্তং ওলোকনত্থায গতো ইতোৱিতো ওলোকেন্তো ইট্ঠকৰাসিং দিস্ৱা চিন্তেসি; হীযো ৰাজা ইট্ঠকং কথং লভিস্সামীতি কথেসি. মহন্তং ৱত পণ্ণাকাৰং মযা লদ্ধন্তি তুট্ঠো দেৱ্ैট্ঠকানি কাজেন গহেত্ৱা ৰঞ্ঞো দস্সনত্থায গন্ত্ৱা ৰাজদ্ৱাৰে ঠত্ৱা সাসনং পহিণি. তং পক্কোসাপেত্ৱা কস্মা পাতো’ৱ আগতোসী’তি পুচ্ছি. দেৱ ময্হং খেত্তে ইট্ঠকৰাসিং দিস্ৱা পাতো’ৱ ইট্ঠকানি গহেত্ৱা আগতোম্হী’তি. ঈদিসানি ইট্ঠকানি চেতিযস্স অনুচ্ছৱিকানীতি দস্সেসি. ৰাজা পস্সিত্ৱা সোমনস্সপ্পত্তো ব্ৰাহ্মণস্স বহুং ধনং দাপেসি.

তস্মিং |ও০.০০৪৮| খণে অঞ্ঞং সাসনং আহৰি. মদনপট্টনদ্ৱাৰতো চতস্সো ৰজতনাৱা সুৱণ্ণভুমিতো চতস্সো সুৱণ্ণনাৱা উক্কমিংসূতি পট্টনমুখদ্ৱাৰে ৱিহৰন্তো আৰক্খক জেট্ঠকো ধম্মপালো নাম আগন্ত্ৱা ৰঞ্ঞো আৰোচেসি. ৰাজা তুট্ঠো সুৱণ্ণৰজতে আহৰাপেসি.

(ইট্ঠকং ৰজতঞ্চেৱ সুৱণ্ণঞ্চ মহাৰহং;

আহৰিত্ৱান তং সব্বং কম্মং আৰভি চেতিযে.

সত্থু পুঞ্ঞানুভাৱেন ৰঞ্ঞো পুঞ্ঞবলেন চ;

চিন্তিতচিন্তিতং সব্বং খণেনেৱ সমিজ্ঝতি.)

ততো ৰাজা চূড়পিণ্ডপাতিযতিস্সত্থেৰস্স সন্তিকং গন্ত্ৱা? অয্য ইট্ঠকভুমিং গমিস্সামীতি আহ. থেৰো সুত্ৱা তুট্ঠো অত্তনো পৰিৱাৰেহি পঞ্চসতভিক্খূহি সদ্ধিং ইট্ঠক ভূমিং গতো. ততো মহাসাগলত্থেৰো চ মহিন্দত্থেৰো চ অত্তনো পৰিৱাৰেহি ভিক্খুহি সদ্ধিং ইট্ঠকভুমিং গতা. সিৱ নগৰে ৰাজাপি ইট্ঠকভুমিং গতো. লোণনগৰে নাগৰাজাপি ইট্ঠকভুমিং গতো. সোমনগৰে গিৰিঅভযৰাজাপি অত্তনো সেনঙ্গেহি পৰিৱাৰেত্ৱা ইট্ঠকভুমিং গতো. তেসং সমণ ব্ৰাহ্মণানং ৰাজবড়ানঞ্চ সম্পিণ্ডিতত্তা সো পিট্ঠিপাসাণো বলৱাহনো নাম জাতো. তে সব্বে ইট্ঠকভুমিং সমোসৰিংসু. থেৰো ইট্ঠকৰাসিং ওলোকেত্ৱা ৰাজানং এৱমাহ? মহাৰাজ, অযং ইট্ঠকৰাসি চেতিযে সব্বকম্মত্থায পহোতী’তি. ৰাজা অত্তমনো সেনঙ্গপৰিৱুতো সযমেৱ পঠমং ইট্ঠকং গণ্হি. তং দিস্ৱা সেসৰাজানো চ অমচ্চাদযো চ পৰিসা চ সব্বে ভিক্খু চ ইট্ঠকানি গণ্হিংসু তস্মিং কালে ভাৰং উক্খিপিত্ৱা গমনং পপঞ্চং ভৱিস্সতী’তি ৰাজা চিন্তেসি. থেৰো তস্স চিত্তং জানিত্ৱা এৱমাহ? মা চিন্তযিত্থ মহাৰাজ, ইট্ঠকানি গহেত্ৱা গচ্ছ. পচ্ছা দেৱনাগাদযো ইট্ঠকভুমিতো পট্ঠায যাৱ চেতিযট্ঠানং নিৰন্তৰা ঠিতা আহৰিস্সন্তী’তি. তে আহৰিত্ৱা চেতিযট্ঠানে ৰাসিং কৰোন্তি. তেনেৱ |ও০.০০৪৯| নীযামেন যাৱ চেতিযস্স নিট্ঠঙ্গমা তাৱ দেৱনাগসুপণ্ণাদযো নিৰন্তৰং ঠত্ৱা ইট্ঠকানি আহৰিত্ৱা চেতিযকৰণট্ঠানেৱ চতুসু দিসাসু ৰাসিং অকংসু.

ততো ৰাজা সব্বে ইট্ঠকৱড্ঢকী ৰাসিং কাৰাপেত্ৱা তেসং ৱড্ঢকীনং অন্তৰে জযসেনং নাম ইট্ঠকৱড্ঢকিং পৰিগণ্হিত্ৱা তস্স পন সতসহস্সগ্ঘনকানি দ্ৱে সাটকানি কহাপণসতসহস্সানি চ সুৱণ্ণকুণ্ডলাদযো আভৰণানি চ দাপেসি. তস্স পৰিৱাৰানং ৱড্ঢকীনং অহতৱত্থাদীনি সব্বুপকৰণানি দাপেসি. অনেকৱিধং মহন্তং সম্মানং কাৰেত্ৱা থেৰেন সদ্ধিং মন্তেন্তো; অয্য অজ্জ ৱিসাখপুণ্ণমী উপোসথদিৱসো, তস্মা নলাটধাতুযা মঙ্গলং কৰিত্ৱা চেতিযট্ঠানে ইট্ঠকং পতিট্ঠাপেতুং ৱট্টতী’তি আহ. তং সুত্ৱা থেৰো; ভদ্দকং মহাৰাজ, বুদ্ধস্স ভগৱতো জাতদিৱসো’তি ৱত্ৱা চেতিযকম্মকৰণত্থায পঞ্চ জনে গণ্হি. তেসু একো ৱৰদেৱো নাম, একো সঙ্খো নাম, একো ৱিজ্জো নাম, একো পুস্সদেৱো নাম, একো মহাদেৱো নাম. ইমেসং ৱড্ঢকীনং মঙ্গলং কাৰাপেত্ৱা ছণৱেসং গহেত্ৱা সব্বালঙ্কাৰেন অলঙ্কাৰাপেত্ৱা ৰাজা সযম্পি সব্বালঙ্কাৰেন পতিমণ্ডিতো মঙ্গলৱিধানং কাৰাপেত্ৱা ভিক্খুসঙ্ঘং গন্ধমালাদীহি পূজেত্ৱা তিক্খত্তুং পদক্খিণং কত্ৱা চতুসু ঠানেসু পঞ্চপতিট্ঠিতেন ৱন্দিত্ৱা ৱিজম্হেত্ৱা সুৱণ্ণঘট্ঠানং পৱিসিত্ৱা সুৱণ্ণখচিতং মণিমুত্তাৰতনমযং পৰিব্ভমনদণ্ডং জীৱমানকমাতাপিতৰেন উভতোসুমণ্ডিতপসাধিতেন অভিমঙ্গলসম্মতেন অমচ্চপুত্তেন গাহাপেত্ৱা মহন্তং চেতিযং তত্থ কৰোন্তো সযম্পি পৰিব্ভমনদণ্ডং গহেত্ৱা পৰিকম্মকতভুমিযং পৰিব্ভমিত্ৱা একমন্তং অট্ঠাসি. ততো মহাৱড্ঢকী সুনক্খত্তেন সুমুহুত্তেন চেতিযট্ঠানে ইট্ঠকং পতিট্ঠাপেসি.

তস্মিং |ও০.০০৫০| খণে চতুনহুতাধিক দ্ৱিযোজন সতসহস্সবহুলা অযং মহাপথৱী সাধুকাৰং পৱত্তেন্তী ৱিয মহানাদং পৱত্তেসি. দেৱমনুস্সা দিৱসে দিৱসে পহোনক-মত্তিকং নিসদেন পিংসিত্ৱা সুপ্পেহি পপ্ফোঠেত্ৱা দেন্তি. এৱং কৰোন্তো কতিপযেনেৱ দিৱসেন পুপ্ফাধানত্তযং চিনিত্ৱা মহাভিক্খু সঙ্ঘস্স নিৱেদেসি. তং সুত্ৱা সঙ্ঘো চুন্দুত্তৰনামকে দ্ৱে সামণেৰে আণাপেসি? তুম্হে হিমৱন্তং গন্ত্ৱা মেদৱণ্ণপাসাণে আহৰথা’তি. তে পন সামণেৰা জাতিযা সোড়সৱস্সিকা ছড়ভিঞ্ঞাপ্পভেদেন পটিসম্ভিদপ্পত্তা. মহাখীণাসৱভিক্খুসঙ্ঘস্স সন্তিকা ভিক্খুসঙ্ঘস্স ৱচনং সম্পটিচ্ছিত্ৱা আকাসং অব্ভুগ্গন্ত্ৱা হিমৱন্ততো অত্তনো ইদ্ধিবলেন মেদৱণ্ণপাসাণে আহৰিংসু. এতেসু একং পাসাণং ধাতুগব্ভস্স ভুমিযং পত্থৰিত্ৱা চতুসু পস্সেসু চত্তাৰো পাসাণে পতিট্ঠাপেত্ৱা অপৰং ধাতুগব্ভং পিদহিতুং অদস্সনং কত্ৱা ঠপযিংসু.

তদা ৰাজা ধাতুগব্ভে কম্মং নিট্ঠপেন্তো নৱ কোটিপ্পমাণং সুৱণ্ণং আহৰাপেত্ৱা সুৱণ্ণকাৰানং দত্ৱা ধাতুগব্ভস্স ইট্ঠকানি কৰোথা’তি আণাপেসি. তে সুৱণ্ণকাৰা দীঘতো ৰতনপ্পমাণং পুথুলতো ৱিদত্থীপ্পমাণং বহলতো চতুৰঙ্গুলপ্পমাণং ইট্ঠকং কত্ৱা ধাতুগব্ভং চিনিংসু. তং পন ধাতুগব্ভং উচ্চতো সোড়সহত্থং ৱিত্থাৰতোপি ইতোচিতো দসদসৰতনং কত্ৱা সুৱণ্ণিট্ঠকেহেৱ নিট্ঠপেত্ৱা ধাতুগব্ভস্স মজ্ঝে সত্তৰতনমযং সিনেৰুং কাৰাপেত্ৱা সিনেৰুস্স উপৰি জাতিহিঙ্গুলকেন পণ্ডুকম্বলসিলাসনং সত্তৰতনেন পাৰিচ্ছত্তকৰুক্খং ৰজতমযং সেতচ্ছত্তং ব্ৰহ্মুনা গাহাপেত্ৱা সত্থুনো পটিমায উপৰি ধাৰিযমানং কাৰেসি. সিনেৰুপাদমূলে গন্ধকললপূৰিত নীলুপ্পলৱিভুসিতসুৱণ্ণমযঅট্ঠুত্তৰসতঘটপন্তিযো ঠপাপেসি. তদনন্তৰং গন্ধকললপূৰিতৰত্নপদুমৱিভুসিতৰজতমযঅট্ঠুত্তৰ- |ও০.০০৫১| সতঘটপন্তিযো ঠপাপেসি. তদনন্তৰং গন্ধকললপূৰিত সেতুপ্পলমালাৱিভুসিতমণিমযঅট্ঠুত্তৰসতঘটপত্তিযো ঠপাপেসি. তদনন্তৰং গন্ধকললপূৰিতসেতুপ্পলৱিভুসিত-মসাৰগল্লময অট্ঠুত্তৰসতঘটপন্তিযো ঠপাপেসি. তদনন্তৰং গন্ধকললপূৰিতচম্পকপুপ্ফৱিভুসিতলোহিতঙ্কমযঅট্ঠুত্তৰসত ঘটপত্তিযো ঠপাপেসি. তদনন্তৰং গন্ধকললপূৰিতপঞ্চুপ্পলৱিভুসিতমত্তিকামযঅট্ঠুত্তৰসতঘটপন্তিযো ঠপাপেসি. তাসং ঘটপন্তীনং অন্তৰে গন্ধকললপূৰিতসত্তৰতনমযসৰাৱকে ঠপাপেসি. কঞ্চনময-সত্তৰতনময-ৱিচিত্তমালালতাপুণ্ণঘটসিৰিৱচ্ছনন্দিযাৱট্টভদ্দপীঠাদযো চ হত্থিঅস্সসীহৱ্যগ্ঘোসভপন্তিআদযো চ কাৰেসি. দেৱোৰোহণং যমকপাটিহীৰাদযো ধনপাল-অঙ্গুলিমাল-আড়ৱকদমনাদযো, সাৰিপুত্ত-মোগ্গল্লান-মহাকস্সপত্থেৰাদযো, অসীতিমহাসাৱকৰূপাদীনি চ কাৰাপেসি. সিনেৰুস্স মজ্ঝিমভাগে তাৰাগণপৰিৱাৰিতং ৰজতমযং চন্দমণ্ডলঞ্চ কাৰাপেসি. ৰংসিজালৱিভুসিতং কনকমযং সূৰিযমণ্ডলঞ্চ কাৰাপেসি.

ততো সিনেৰুস্স মত্থকে পাৰিচ্ছত্তকমুলে পণ্ডুকম্বলসিলাসনে অম্হাকং সত্থুনো পটিমং ঘনকোট্টিম ৰত্তসুৱণ্ণমযং কাৰাপেত্ৱা মাতুদেৱপামোক্খ দসসহস্স চক্কৱাড়দেৱতানং সত্তপ্পকৰণং অভিধম্মং দেসনাকাৰেন নিসীদাপেসি. তস্স ৱীসতিনখা অক্খিতলানং সেতট্ঠানানি জাতিফলিকমযানি. অঙ্গুলিযো সুৱণ্ণমযা হত্থপাদতলানি চ দন্তাৱৰণানি চ অক্খীনং ৰত্তট্ঠানানি চ জাতিপৱাড়মযানি, কেসমস্সুভমুকট্ঠানানি ইন্দনীলমযানি, সমচত্তালীস দন্তা ৱজিৰমযা অহেসুং. উণ্ণলোমং পন সুৱণ্ণ ভিত্তিযং ঠপিতৰজতবুব্বুড়ৱিলাসং ৰজতমযং অহোসি. ভগৱতো অনৱলোকিত মুদ্ধনি মত্থকে সত্তৰতনমযং ৱিচিত্তকিংকিণিজালং পৰিক্খিপাপেসি. মণ্ডপস্স অন্তো নৱসতসহস্সগ্ঘনকং মুত্তাকলাপমোলম্বকং মনোৰমং চেলৱিতানং বন্ধাপেত্ৱা মণ্ডপকোটিযং মুত্তাজালং তদনন্তৰং সত্ত ৰতনৱিচিত্তং কিংকিণিজালং পৰিক্খিপাপেসি.

অম্হাকং |ও০.০০৫২| ভগৱতো মাতুদেৱপুত্তম্পি সত্তৰতনেন কাৰাপেসি. তথা এৰাৱণৱিস্সকম্মদেৱপুত্তাদযো চ সপৰিৱাৰো সক্কো দেৱৰাজা চ চত্তাৰো মহাৰাজানো চ পঞ্চসিখদেৱপুত্তাদযো গন্ধব্বদেৱপুত্তা চ সহম্পতি মহা ব্ৰহ্মাদযো মহাব্ৰহ্মনো চ কাৰাপেসি. ৱেস্সন্তৰজাতকং কৰোন্তো সংজযমহাৰাজা ফুসতীদেৱী আদযো চ মদ্দীদেৱী দ্ৱে দাৰকে চ জূজকব্ৰাহ্মণাদযো চ কাৰাপেসি. ৱিধুৰ-সোণদত্ত মহানাৰদকস্সপ-সুতসোম-সুপ্পাৰক-সঙ্খপালজাতকাদীনি চ, ধম্মচক্কপ্পৱত্তন-মহাসমযসুত্তাদি দেসনাকাৰো চ, সুদ্ধোদনমহাৰাজা মহামাযা মহাপজাপতী গোতমী ভদ্দকচ্চানা ৰাহুলমাতাদেৱী চ ৰাহুলকুমাৰো চ ছন্নঞ্চ কন্থকঞ্চ মহাভিনিক্খমনং মহাবোধিমণ্ডলং অসীতিমহাসাৱকা কোসলমহাৰাজা অনাথপিণ্ডিকমহাসেট্ঠি চূড়অনাথপিণ্ডিক-ৱিসাখা সুপ্পৱাসা চ পচ্ছা চূড়পিণ্ডপাতিয তিস্সত্থেৰঞ্চ অত্তানঞ্চ কাৰাপেত্ৱা তে সব্বে ধাতু গব্ভে পতিট্ঠাপেসি.

ধাতুগব্ভৱণ্ণণা সমত্তা.

এৱং ধাতুগব্ভে পূজাৱিধানং সুৱিভত্তং সুমনোৰমং কাৰাপেত্ৱা থেৰেন সদ্ধিং কথেসি? ভন্তে ধাতুগব্ভে মযা কত্তব্বং নিট্ঠাপিতং. স্ৱে ৰোহিণীনক্খত্তেন ধাতু নিধানং কৰিস্সামী. অয্যা পন কেসধাতুযো গহেত্ৱা আগচ্ছন্তুতি. তিস্সত্থেৰস্স ভাৰমকাসি. থেৰো তং সুত্ৱা ভদ্দকং মহাৰাজ, কেসধাতুযো ৱিচিনিত্ৱা আহৰাপেস্সামাতি ৱত্ৱা অত্তনো সদ্ধিৱিহাৰিকং সিৱত্থেৰং পক্কোসাপেত্ৱা আৱুসো ভূমিন্ধৰনাগৱিমানে জযসেনো নাম নাগৰাজা ৱসতি. তস্স সন্তিকে (কেসধাতুযো সন্তি.) তপুস্স ভল্লিকানং দ্ৱেভাতিকৱাণিজানং পৰিচৰণকালে তেসং পমাদং ঞত্ৱা নাগৰাজা দ্ৱে কেসধাতুযো গহেত্ৱা নাগভৱনে ঠপেসি. ত্ৱং তা ধাতুযো আহৰিত্ৱা ৰঞ্ঞো দেহীতি আণাপেসি. থেৰো তং ৱচনং সম্পটিচ্ছিত্ৱা গতো.

ততো ৰাজা অত্তনো ভগিনিযা সোমদেৱিযা চ ভাগিনেয্যস্স গিৰিঅভযৰঞ্ঞো চ সাসনং পেসেসি? স্ৱে ধাতুনিধানংকৰিস্সাম. তুম্হে সেনঙ্গং গহেত্ৱা আগচ্ছথা’তি. লোণনগৰে |ও০.০০৫৩| মহানাগৰঞ্ঞো চ সেৰু নগৰে সিৱৰঞ্ঞো চ তথেৱ সাসনং পেসেত্ৱা সযম্পি অত্তনো ৱিজিতে যেন ময্হং হত্থতো অন্তমসো এককৰীসমত্তম্পি লদ্ধং তদুপাদায সব্বেপি তুম্হে সদ্ধিং পৰিৱাৰেন আগচ্ছথা’তি ভেৰিং চৰাপেসি. তং সুত্ৱা সোমনস্সপ্পত্তা মহাজনা অত্তনো অত্তনো ৱিভৱানুৰূপেন অলঙ্কতপটিযত্তা অগমিংসু. ৰাজা পভাতায ৰত্তিযা সব্বে সেনিযো গন্ধমালাধূপধজাদযো গহেত্ৱা ধাতুনিধানং আগচ্ছন্তুতি ৱত্ৱা ভিক্খুসঙ্ঘস্স মহাদানং দত্ৱা তিৱীৱৰত্থায মহগ্ঘৱত্থাদীনি দত্ৱা সযম্পি সব্বালঙ্কাৰপতিমণ্ডিতো নানগ্গৰসভোজনং ভুঞ্জিত্ৱা উপোসথং অধিট্ঠায মণিকুণ্ডলমেখলানূপুৰ ৱলযাদিৱিচিত্তসব্বালঙ্কাৰৱিভূসিতাহি কোসেয্যাদিসুখুমনানাৱিধৱিচিত্তৱত্থনিৱত্থাহি নচ্চগীতৱাদিততুৰিযভণ্ডগহিত হত্থাহি দেৱচ্ছৰাপটিভাগনাটকিত্থীহি পৰিৱাৰিতো ৱুত্তপ্পকাৰেহি সদ্ধিং চেতিযট্ঠানং গন্ত্ৱা মহাভিক্খুসঙ্ঘং ৱন্দিত্ৱা অট্ঠাসি.

ততো সোমনগৰে গিৰিঅভযৰাজা’পি সব্বে নাগৰা অত্তনো অত্তনো ৱিভৱানুৰূপেন ধাতুনিধানট্ঠানং আগচ্ছন্তুতি নগৰে ভেৰিং চৰাপেত্ৱা সযং সব্বালঙ্কাৰপতিমণ্ডিতো সুসজ্জিতঅমচ্চগণপৰিৱাৰিতো নিক্খমি. সোম দেৱীপি সীসং নহাত্ৱা অহতৱত্থনিৱত্থা সব্বালঙ্কাৰপতিমণ্ডিতা দেৱচ্ছৰা ৱিয অত্তনো পৰিৱাৰা পঞ্চসতকুমাৰিযো নীলৱত্থেহি পৰিদহাপেত্ৱা তথেৱ অলঙ্কাৰেত্ৱা পুণ্ণঘটে গাহাপেত্ৱা তাসং অনন্তৰা পঞ্চসতকুমাৰিযো পীতৱত্থেহি পৰিদহাপেত্ৱা তথেৱ অলঙ্কাৰেত্ৱা পূজাভণ্ডানি গাহাপেত্ৱা, তাসং অনন্তৰা পঞ্চসত কুমাৰিযো ৰত্তৱত্থেহি পৰিদহাপেত্ৱা তথেৱ. অলঙ্কাৰেত্ৱা ৱিচিত্ৰপুপ্ফপূৰিতমঞ্জুসাযো গাহাপেত্ৱা তাসং অনন্তৰা পঞ্চসতকুমাৰিযো সেতৱত্থেহি পৰিদহাপেত্ৱা তথেৱ অলঙ্কাৰেত্ৱা ধূম কটচ্ছুকে গাহাপেত্ৱা এৱং পূজাৱিধানং সংৱিদহিত্ৱা পৰিৱাৰেন |ও০.০০৫৪| চেতিঙ্গণং গন্ত্ৱা মহাভিক্খুসঙ্ঘং পঞ্চপতিট্ঠিতেন ৱন্দিত্ৱা গন্ধমালাদীহি পূজং কত্ৱা অত্তনো সামিনা গিৰিঅভযৰাজেন সদ্ধিং একপস্সে ঠীতা.

লোণনগৰে মহানাগৰাজা’পি সব্বালঙ্কাৰেহি পতিমণ্ডিতো সব্বাভৰণেহি সুসজ্জীতঅমচ্চমণ্ডলপৰিৱুতো নচ্চগীততুৰীযানি পগ্গণ্হাপযমানো গন্ধমালা ধূমকটচ্ছু গাহাপেত্ৱা চেতিযট্ঠানং আগন্ত্ৱা ভিক্খুসঙ্ঘং ৱন্দিত্ৱা একমন্তং অট্ঠাসি.

সেৰুনগৰে সিৱৰাজা’পি অত্তানং সব্বালঙ্কাৰেহি অলঙ্কৰিত্ৱা মহন্তেন পৰিৱাৰেন পূজাৱিধানং গাহাপেত্ৱা চেতিযট্ঠানং আগন্ত্ৱা মহাভিক্খুসঙ্ঘং ৱন্দিত্ৱা একমন্তং অট্ঠাসি. ৰাজপৰিসা অত্তনো ৱিভৱানুৰূপেন ৱত্থালঙ্কাৰেহি চন্দন মালাদীহি চ সোভমানা নলাটে মুত্তাকলাপমোলম্বক ৱিচিত্তসুৱণ্ণপট্টানি বন্ধিত্ৱা হত্থাভৰণাদি অনেকাভৰণেহি দিব্বপৰিসা ৱিয সুমণ্ডিতপসাধিতা ৱেসানুৰূপানি ৱিৱিধাৱুধানি গহেত্ৱা একপস্সে ঠীতা. সীহৱ্যগ্ঘদীপিচম্মেহি পসাধিতসুৱণ্ণালঙ্কাৰসুৱণ্ণধজহেমজালসঞ্ছন্নে ৰথ ৱৰে চ সব্বালঙ্কাৰৱিভুসিতা ৰথিকা আৰুয্হ একপস্সে ঠীতা. ব্ৰাহ্মণপুত্তাদযো মণ্ডিতচম্মে পাৰুপিত্ৱা উপসোভযমানা একপস্সে ঠীতা. বহু অমচ্চা অত্তনো অত্তনো ৱেসানুৰূপেন মহগ্ঘৱত্থাভৰণৱিভূসিতা সপৰিৱাৰা একপস্সে ঠীতা. গন্ধোদক পূৰিত দক্খিণাৱত্ত সঙ্খং গহেত্ৱা উপৱীতসুত্তং একংসং কৰিত্ৱা ব্ৰাহ্মণৱেঠনং ৱেঠেত্ৱা পুৰোহিতব্ৰাহ্মণা মহন্তেন পৰিৱাৰেন পূজাৱিধানং গাহাপেত্ৱা চেতিযট্ঠানং আগন্ত্ৱা মহাভিক্খুসঙ্ঘং ৱন্দিত্ৱা জযঘোসং সাৱেন্তা এৱমাহংসু?

খেমং সুভিক্খং ভৱতু নিচ্চং জনপদং সিৱং;

সস্সানি সমুপ্পজ্জন্তু ৰঞ্ঞো এৱং জযা সিযুং.

অৱসেসা মহাজনা এৱমাহংসু? সমুদ্দপৰিযন্তং |ও০.০০৫৫| হি মহিং সাগৰকুণ্ডলং ৱসুন্ধৰং আৱসতু অমচ্চপৰিৱাৰিতো. এৱং ৱত্ৱা? অম্হাকং অয্যো কাকৱণ্ণতিস্সো মহা ৰাজা সদেৱকে লোকে একপুগ্গলস্স লোকনাথস্সনলাটধাতুং পতিট্ঠাপেতী’তি অত্তনো অত্তনো ৱিভৱানুৰূপেন সুমণ্ডিতপসাধিতা. খুজ্জৱামনকাদযো’পি সব্বে জনা পূজাভণ্ডানি গহেত্ৱা সাধুকাৰং দদমানা অট্ঠংসু. ইমস্মিং চেতিযট্ঠানে ৰাসীভূতা পৰিসা এৱং ৱেদিতব্বা? খত্তিযা ব্ৰাহ্মণা ৱেস্সা নেগমা চ সমাগতা পুপ্ফাদিগহিতা সব্বে অলঙ্কাৰৱিভূসিতা.

গণনা ৱীতিৱত্তা তে অনেকে চ মহাজনা;

সমুদ্দো পত্থৰন্তোৱ খত্তিযা সমুপাগতা.

অলঙ্কতো মহাৰাজা সৰাজপৰিৱাৰিতো;

দেৱৰাজা যথা সক্কো অট্ঠাসি চেতিযঙ্গণে.

সাধুৱাদেন সত্তানং পঞ্চঙ্গতুৰিযেহি চ;

হত্থস্সৰথসদ্দেন সমাকিণ্ণং মহীতলং.

ততো চূড়পিণ্ডপাতিযতিস্সত্থেৰো অত্তনো সদ্ধিৱিহাৰীকে পঞ্চসত খীণাসৱে পৰিৱাৰেত্ৱা চেতিযট্ঠানমেৱ আগতো. মহাসাগলত্থেৰো’পি পঞ্চসত খীণাসৱে পৰিৱাৰেত্ৱা চেতিযট্ঠানমেৱ আগতো. মহিন্দত্থেৰো’পি অত্তনো সাৱকে সট্ঠিমত্তে খিণাসৱে গহেত্ৱা চেতিযট্ঠানমেৱ আগতো. ইতি ইমিনা নিযামেনেৱ একো দ্ৱে তযো চত্তাৰো পঞ্চ খীণাসৱা আগচ্ছন্তা সত্ত সহস্সমত্তা অহেসুং. ততো চূড়পিণ্ডপাতিযতিস্সত্থেৰো এত্তকে ভিক্খূ পৰিৱাৰেত্ৱা চেতিযঙ্গণে নিসীদী. ততো ৰাজা আগন্ত্ৱা পঞ্চপতিট্ঠিতেন ৱন্দিত্ৱা থেৰেন সদ্ধিং কথেসি? |ও০.০০৫৬| কেসধাতু কুতো লভিস্সাম অয্যা’তি. তস্মিং খণে তিস্সত্থেৰো অত্তনো সদ্ধিৱিহাৰিকং সিৱত্থেৰং ওলোকেসি. সো ওলোকিতক্খণেযেৱ নিসিন্নট্ঠানতো উট্ঠায চীৱৰং পাৰুপিত্ৱা মহাভিক্খুসঙ্ঘং ৱন্দিত্ৱা ছড়ভিঞ্ঞো মহাখীণাসৱো চতুত্থজ্ঝানং সমাপজ্জিত্ৱা ততো ৱুট্ঠায পথৱিযং নিমুজ্জিত্ৱা ভুমিন্ধৰনাগৱিমানে পাতুৰহোসি.

(সুত্ৱাস্স সিৱথেৰো চ ৱসিপ্পত্তো ৱিসাৰদো;

পাকটো অভৱি নাগনগৰং পুৰতো খণে.)

তস্মিং খো পন সমযে জযসেনো নাগৰাজা অত্তনো ভাগিনেয্যং দ্ৱিকোটিমত্তে নাগে পৰিৱাৰেত্ৱা মহা যসং অনুভৱমানং নিসিন্নং ইঙ্গিতসঞ্ঞং দত্ৱা থেৰং দুৰতোৱ আগচ্ছন্তং দিস্ৱা চিন্তেসি? ইমস্মিং নাগভৱনে সমণেহি কত্তব্বকিচ্চং নত্থী. নিস্সংসযং কেসধাতুং নিস্সায আগতো ভৱিস্সতীতি উট্ঠায ধাতুঘৰং পৱিসিত্ৱা ধাতুকৰণ্ডকং গিলিত্ৱা কিঞ্চি অজানন্তো ৱিয নিসীদি. তস্মিং কালে থেৰো তস্স সন্তিকং অগমাসি. নাগৰাজা পচ্চুগ্গন্ত্ৱা পটিসন্থাৰং কৰোন্তো থেৰেন সদ্ধিং কথেসি. কস্মা অয্যো আগতো’তি ৱুত্তে এৱমাহ? তিলোকনাথস্স অম্হাকং সম্বুদ্ধস্স কেসধাতূনং অত্থায আগতো, তুয্হং সন্তিকে ঠপিতকেসধাতুযো পপঞ্চং অকত্ৱা ময্হং দেহি, তেযেৱ সন্ধায উপজ্ঝাযেন পেসিতোম্হী’তি ৱুত্তে অম্হাকং সম্মা সম্বুদ্ধস্স কেসধাতুযো মম সন্তিকে নত্থী’তি আহ. থেৰো ধাতুকৰণ্ডকং গিলিতভাৱং ঞত্ৱা গণ্হামি মহাৰাজা কেসধাতুযো’তি ৱুত্তে আম পস্সন্তো গহেত্ৱা গচ্ছাহীতি আহ. এৱং তযো ৱাৰে পটিঞ্ঞং গহেত্ৱা তথেৱ ঠীতো?

ইদ্ধিযা মাপযিত্ৱান ততো সো সুখুমং কৰং,

পৱেসেত্ৱা মুখে তস্স গণ্হী ধাতুকৰণ্ডকং;

নাগালযাভিনিক্খমি তিট্ঠ নাগা’তি ভাসিয.

তস্মিং |ও০.০০৫৭| খণে জযসেনো নাগৰাজা সমণং ৱঞ্চেত্ৱা পেসিতোম্হী’তি ৱত্ৱা তস্স গতকালে ধাতুকৰণ্ডকং ওলোকেত্ৱা ধাতু অপস্সিত্ৱা সমণেন নাসিতোম্হী’তি দ্ৱে হত্থে উক্খিপিত্ৱা ঠপেত্ৱা অত্তনো সকলনাগভৱনং এক কোলাহলং কত্ৱা মহন্তেন সদ্দেন পৰিদেৱন্তো? অম্হাকং চক্খুনি উপ্পাটেত্ৱা গতো ৱিয সদেৱকস্স লোকস্স পতিট্ঠানভূতস্স সম্মাসম্বুদ্ধস্স কেসধাতুযো অপাযদুক্খতো অমুঞ্চন্তানং অম্হাকং অভিভৱিত্ৱা ধাতুযো গহেত্ৱা গতসমণং অনুবন্ধিত্ৱা গণ্হিস্সামা’তি দ্ৱেকোটিমত্তে নাগে গহেত্ৱা অত্তনো ভাগিনেয্যেন সদ্ধিং তস্স পিট্ঠিতো পিট্ঠিতো অনুবন্ধিত্ৱা আকাসং উগ্গচ্ছিং (সু). তস্মিং খণে পন সিৱত্থেৰো অকাসতো ওতৰিত্ৱা পথৱিযং পাৱিসি. পুন তেপি পথৱিযং পৱিসিংসু. এৱং থেৰো তেহি সদ্ধিং উম্মুজ্জ নিমুজ্জং কৰোন্তো পাটিহাৰিযং দস্সেত্ৱা সেৰুনগৰস্স নাতিদূৰে পিট্ঠিপাসাণে উগ্গঞ্জি. তত্থেৱ তে সংৱেজেত্ৱা চেতিযঙ্গণে মহাভিক্খুসঙ্ঘস্স পুৰতো পাকটো অহোসি. নাগা তং গহেতুং অসক্কোন্তা মহন্তেন সদ্দেন ৰৱং পতিৰৱং দত্ৱা. ইতো পট্ঠায নট্ঠম্হা’তি তস্মিং পিট্ঠি পাসাণে সব্বে সমাগমং কত্ৱা মহাসদ্দেন পৰিদেৱিংসু? নট্ঠম্ভা ৱত ভো’তি. ততো পট্ঠায সো পিট্ঠিপাসাণো নাগানং ৰৱং পতিৰৱং দত্ৱা পৰিদেৱিতহাৱেন নাগগল্লং নাম অহোসি.

নাগো থেৰস্স পিট্ঠিতোযেৱ অনুবন্ধিত্ৱা চেতিযঙ্গণং গন্ত্ৱা ৰাজানং এৱমাহ? দেৱ, এসো ভিক্খু মযা অদিন্নধাতু গহেত্ৱা আগতো’তি. তং সুত্ৱা ৰাজা? সচ্চং কিৰ অয্য নাগস্স ৱচনন্তি ৱুত্তে নহেৱ মহাৰাজ, ইমিনা দিন্নং এৱ ধাতুং অগ্গহেসিন্তি ৱুত্তে? নাগো তৱ সক্খিং দেহীতি আহ. থেৰো তস্স ভাগিন্যেং সমণুপ্পল নাগৰাজানং সক্খিং অকাসি. ৰাজা তস্স ভাগিনেয্যস্স সব্বৱচনং সুত্ৱা সদ্দহি. তস্মিং কালে দুক্খাভিভূতো নাগৰাজা গন্ত্ৱা বহি ঠীতো. ততো পট্ঠায সো নাগৰাজা |ও০.০০৫৮| বহি হুত্ৱা নিসিন্নত্তা বহিনাগৰাজা নাম অহোসি. তস্স পন ভাগিনেয্যং অন্তো চেতিযঙ্গণে নিসীদাপেসি. ইমস্স পন চেতিযস্স আৰক্খং গহিতনাগা কথেতব্বা. সুমননাগৰঞ্ঞো পৰিৱাৰা ছকোটিমত্তা নাগা, জযসেনস্স পৰিৱাৰা কোটিসতমত্তা নাগা, সমণুপ্পলনাগৰঞ্ঞো পৰিৱাৰা দ্ৱিকোটিমত্তা নাগা অহেসুং. সব্বে ধাতুযা আৰক্খং গণ্হিংসু. ৰাজা থেৰস্স হত্থতো কেসধাতুং গহেত্ৱা ৰতনচঙেগাটকে ঠপেত্ৱা মহিন্দস্স নাম অমচ্চস্স অদাসি. তস্মিং সমাগমে তিপিটকমহাফুস্সদেৱত্থেৰস্স সদ্ধিৱিহাৰিকা পটিসম্ভিদপ্পত্তা চত্তাৰো সামণেৰা অহেসুং. তেসু একো মলয ৰাজপুত্তো সুমনসামণেৰো নাম, একো সেৰুনগৰে সিৱৰাজভাগিনেয্যস্স পুত্তো উত্তৰ সামণেৰো নাম. একো মহাগামে মালাকাৰপুত্তো চুন্দ সামণেৰো নাম একো মহাগামে একস্স কুটুম্বিকস্স পুত্তো মহাকস্সপসামণেৰো নাম, ইমে চত্তাৰো সামণেৰা অজ্জ কাকৱণ্ণতিস্সমহাৰাজা মহাচেতিযে ধাতু নিধানং কৰিস্সতি, মযং হিমৱন্তং গন্ত্ৱা সুকুসুমানি আহৰিস্সামাতি থেৰং ৱন্দিত্ৱা আকাসতো হিমৱন্তং গন্ত্ৱা চম্পকনাগসললাদযো পূজনীযমালং গহেত্ৱা তাৱতিংসদেৱ লোকং গতা.

তস্মিং কালে সক্কো দেৱৰাজা সব্বাভৰণপতিমণ্ডিতো দ্ৱিসু দেৱলোকেসু দেৱতাযো গহেত্ৱা এৰাৱণহত্থীক্খন্ধমাৰুয্হ অড্ঢতেয্যকোটিদেৱচ্ছৰাপৰিৱাৰিতো সুদস্সনমহা ৱীথিযং ৱিচৰন্তো সৱঙ্গোটকে তে চত্তাৰো সামণেৰে দুৰতোৱ আগচ্ছন্তে দিস্ৱা হত্থীক্খন্ধতো ওৰুয্হ পঞ্চ পতিট্ঠিতেন ৱন্দিত্ৱা তেসং হত্থে মালাচঙ্গোটকে দিস্ৱা? কিং অয্যা তুম্হাকং হত্থে’তি পুচ্ছি. তং সুত্ৱা সামণেৰা মহাৰাজ, কিং ত্ৱং ন জানাসি. লঙ্কাযং কাকৱণ্ণতিস্স মহাৰাজা দসবলস্স নলাটধাতুং গহেত্ৱা মহাৱালুকগঙগায দক্খিণপস্সে সেৰু নাম দহস্স অন্তে ৱৰাহ নাম সোণ্ডিমত্থকে চেতিযং কাৰাপেতুং তুম্হাকং নিযোগেন ৱিস্সকম্মদেৱপুত্তেন নিম্মিত্ैট্ঠকানি গহেত্ৱা চেতিযং কাৰাপেত্ৱা অজ্জ ধাতুনিধানং কৰোতি. তত্থ পূজনত্থায হিমৱন্ততো আনীতপুপ্ফমিদন্তি ৱত্ৱা ইতোপি কুসুমং গহেতুং আগতম্হা’তি ৱদিংসু. সক্কো তেসং ৱচনং সুত্ৱা?

অয্য |ও০.০০৫৯| তুম্হাকং হত্থে পুপ্ফানি চূড়ামণিচেতিযে পুজেত্ৱা অম্হাকং উয্যানতো পুপ্ফানি গহেত্ৱা গচ্ছথাতি ৱত্ৱা তেহি সদ্ধিং গন্ত্ৱা তেসং পুপ্ফেহি চূড়ামণিচেতিযং পূজেসি. ততো পপঞ্চং ন ভৱিতব্বন্তি সক্কস্স নিৱেদেসুং. তং সুত্ৱা সক্কো সামণেৰানং পঞ্চমহাউয্যানতো পাৰিচ্ছত্ত-কোৱিড়াৰাদীনি পুপ্ফানি চ চন্দনচুণ্ণঞ্চ গহেত্ৱা দাপেসি. সামণেৰা পুপ্ফানি গহেত্ৱা দেৱলোকতো ওতৰিত্ৱা হিমৱন্তং পৱিসিত্ৱা সুৱণ্ণমণিপব্বতে সন্তচ্ছাযায নসীদিত্ৱা দিৱাৱিহাৰং কত্ৱা নক্খত্তৱেলায সম্পত্তায মণী গৱেসমানা চত্তাৰো মণযো অদ্দসংসু. তেসং একো ইন্দনীলমণী, একো পহস্সৰজোতিৰঙ্গ মণী, একো ৱেলুৰিযমণি, একো মসাৰগল্লমণি, চত্তাৰো মণযো চ দিব্বপুপ্ফানি চ গহেত্ৱা থেৰানং দস্সেসুং. থেৰো? মহাৰাজ, ইমে সামণেৰা পাৰিচ্ছত্তককোৱিড়াৰাদীনি পুপ্ফানি চ চন্দনচুণ্ণঞ্চ চত্তাৰো মণযো চ গহেত্ৱা আগতা’তি ৰঞ্ঞো আৰোচেসুং.

ৰাজা তং সুত্ৱা সোমনস্সজাতো সামণেৰে পঞ্চ পতিট্ঠীতেন ৱন্দিত্ৱা তেসমাহতমণযো গহেত্ৱা মহানন্দ নাম অমচ্চস্স দত্ৱা থেৰেহী সদ্ধিং মহন্তেন পৰিৱাৰেন চেতিযঙ্গণং গন্ত্ৱা মণিকৰণ্ডকেন ধাতুং গহেত্ৱা অত্তনো সীসে ধাতুং ঠপেত্ৱা উপৰি সেতচ্ছত্তং কাৰাপেত্ৱা চেতিযং তিক্খত্তুং পদক্খিণং কত্ৱা পাচীনদ্ৱাৰে ঠীতো? অযং দসবলস্স নলাটধাতু অম্হেহি কাৰাপিতায বুদ্ধপটিমায নলাটে উণ্ণলোমাকাৰং হুত্ৱা পতিট্ঠহতূতি অধিট্ঠাসি. তস্স চিন্তিতক্খণেযেৱ ধাতু কৰণ্ডতো নভমুগ্গন্ত্ৱা আকাসে সত্ততালপ্পমাণে ঠত্ৱা ছব্বণ্ণ ৰংসিযো ৱিস্সজ্জেসি. তা ৰংসিযো কুটেন আসিঞ্চমানৱিলীন সুৱণ্ণং ৱিয অন্তলিক্খতো নিক্খন্তসুৱণ্ণৰসধাৰা ৱিয সকললঙ্কাদীপং |ও০.০০৬০| ৰংসিজালেহি একোভাসং কত্ৱা গণ্হিংসু. তস্মিং কালে যমকপাটিহাৰিযসদিসং পাটিহাৰিযং অহোসি. মহাকাৰুণিকস্স ভগৱতো অদিট্ঠপুব্বং পাটিহাৰিযং দিস্ৱা মহাজনা তথাগতস্স ৰূপকাযং পচ্চক্খভুতা ৱিয অহেসুং.

অদিট্ঠপুব্বং সত্থুস্স পাটিহীৰং মহাজনা;

দিস্ৱা পীতিপৰা জাতা পসাদমজ্ঝগুং জিনে.

পূজেসুং গন্ধমালঞ্চ অলঙ্কাৰং সকং সকং;

সব্বে ৱন্দিংসু সিৰসা-চেতিযং ঈদিসং ৱৰং.

তস্মিং সমাগমে একো পণ্ডিতপুৰিসো জিনং থোমেন্তো এৱমাহ?

নিব্বুতস্সাপি বুদ্ধস্স যসো ভৱতি ঈদিসো;

ঠীতস্স লোকনাথস্স কীদিসা আসি সম্পদা.

অনুভাৱমিদং সব্বং পুঞ্ঞেনেৱ মহেসিনো;

কৰেয্য ঞত্ৱা পুঞ্ঞং তং পত্থেন্তো বোধিমুত্তমং.

তস্মিং কালে নানাৰতনৱিচিত্তং অনেকালঙ্কাৰপতিমণ্ডিতং মহাৰহং সমুস্সিতধজপতাকং নানাৱিধকুসুমসমাকিণ্ণং অনেকপূজাৱিধানং গহেত্ৱা মনুস্সা ছণৱেসং গণ্হিংসু. অনেকৱিধতুৰিযসঙ্ঘুট্টং অহোসি. তস্মিং খণে দেৱতাযো পুপ্ফৱস্সং ৱস্সাপেন্তি. মহানুভাৱসম্পন্না নাগা পূজং কৰোন্তি. এৱং সব্বে দেৱা নাগা মনুস্সা সাধুকাৰং দেন্তি, অপ্ফোটেন্তি, ৱেলুক্খেপং কৰোন্তি, হত্থীনো কুঞ্চনাদং নদন্তি. অস্সা তুট্ঠিৰৱং ৰৱন্তি, বহলঘন মহাপথৱী যাৱ উদকপৰিযন্তং কম্পি. দিসাসু ৱিজ্জুল্লতা নিচ্ছৰিংসু. সকললঙ্কাদীপে সুমনকূটাদযো মহানগা কুসুমগণসমাকিণ্ণা অহেসুং. সব্বে জলাসযা পঞ্চৱিধ পদুমসঞ্ছন্তা, দেৱতানমন্তৰে মনুস্সা, মনুস্সানং অন্তৰে যক্খনাগসুপণ্ণাদযো চ অহেসুং. ভিক্খুভিক্খুনীউপাসক উপাসিকা অপৰিমাণা অহেসুং. মহন্তেন সাধুকাৰেন মহা নিগ্ঘোসেন সকললঙ্কাদীপে তিব্বৱাতাভিহতসমুদ্দো ৱিয একনিন্নাদং |ও০.০০৬১| একনিগ্ঘোসং অহোসি. ইমিনা পূজাৱিধানেন পসাদকভূতমহাজনকাযমজ্ঝে ধাতু পাটিহাৰিযং দস্সেত্ৱা আকাসতো ওতৰিত্ৱা বুদ্ধপটিমায নলাটে পুণ্ণচন্দসস্সিৰীকং অভিভৱন্তমিৱ ৱিৰোচমানা পতিট্ঠাসি.

ৰাজা মহানন্দনামকস্স অমচ্চস্স হত্থতো কেসধাতুং গহেত্ৱা ৱিহাৰদেৱিযা দত্ৱা ত্ৱং ইমা কেসধাতুযো দসবলস্স অনৱলোকিত মত্থকে পতিট্ঠাপেহী’তি আহ. সা কেসধাতুযো গহেত্ৱা তত্থেৱ পতিট্ঠহন্তু’তি অধিট্ঠানং অকাসি. তস্মিং খণে কেসধাতুযো কৰণ্ডতো নভং উগ্গন্ত্ৱা মযূৰগীৱসংকাসনীলৰংসিযো ৱিস্সজ্জেন্তী আকাসতো ওতৰিত্ৱা বুদ্ধপটিমায উত্তমঙ্গে সিৰস্মিং পতিট্ঠহিংসু.

ততো ৰাজা থেৰেন সদ্ধিং ধাতুগব্ভং পৱিসিত্ৱা দিব্বচন্দনচুণ্ণসমাকিণ্ণং পাৰিচ্ছত্তককোৱিড়াৰাদি সুগন্ধপুপ্ফসন্থৰং ৱিযূহিত্ৱা পভাসমুদযসমাকিণ্ণে চত্তাৰো মণি পাসাণে ঠপেসি. তেসং আলোকাভিভূতো ধাতুগব্ভো অতিৱিয ৱিৰোচিত্থ. সব্বনাটকিত্থীযো অত্তনো অত্তনো আভৰণানি ওমুঞ্চিত্ৱা ধাতুগব্ভেযেৱ পূজেসুং. ততো ৰাজা ধাতুনিধানং কত্ৱা বুদ্ধৰূপস্স পাদতলে সীসং ঠপেত্ৱা নিপন্নো এৱং পৰিদেৱি; ময্হং পিতুপিতামহপৰম্পৰাগতাধাতু অজ্জ আদিং কত্ৱা ইতো পট্ঠায ৱিযোগা জাতা অহং দানি তুম্হাকং অতিচিৰং (ঠীতা) ৰমণীযা ৰোহণজনপদা আহৰিত্ৱা ইমস্মিং ঠানে পতিট্ঠাপেসিন্তি ৱত্ৱা সিনেৰু মুদ্ধনি |ও০.০০৬২| সমুজ্জলমহাপদীপো ৱিয তুম্হে ইধেৱ ঠীতা. ইদানি ন গমিস্সাম মযং খমথ ভগৱা’তি পৰিদেৱমানো ধাতু গব্ভেযেৱ পতিত্ৱা আহ?

অহো ৱিযোগং দুক্খং মে এতা বাধেন্তি ধাতুযো;

ৱত্ৱা সো পৰিদেৱন্তো ধাতুগব্ভে সযী তদা.

মৰিস্সামি নো গমিস্সং অয্যং হিত্ৱা ইধেৱ’হং;

দুল্লভং দস্সনং তস্স সংসাৰে চৰতো মমা’তি.

ৱত্ৱা পৰিদেৱন্তো নিপজ্জি. তস্স পন ভিক্খুসঙ্ঘস্স অন্তৰে সহদেৱো নাম থেৰো ৰাজানং ধাতুগব্ভে ৰোদমানং নিপন্নং দিস্ৱা কিমজ্ঝাসযো এতস্সা’তি চেতোপৰিযঞাণেন সমন্তাহৰিত্ৱা ইধ নিপন্নো মৰিস্সামী’তি নিপন্নভাৱং জানিত্ৱা ইদ্ধিযা সংসৰং পিযৰূপং মাপেত্ৱা ধাতুগব্ভতো তং বহি অকাসি.

(ইদ্ধিযা সো ৱসিপত্তো ছড়ভিঞ্ঞো ৱিসাৰদো;

তং খণঞ্ঞেৱ সপ্পঞ্ঞো ৰাজানং তং বহিং অকা.)

ততো পঠমানীতজোতিৰঙ্গ পাসাণং ধাতুগব্ভস্স উপৰি ৱিতানং ৱিয ঠপেত্ৱা অৰহন্তা? ধাতুগব্ভো সমন্ততো চতুৰস্সমঞ্চং ৱিয একঘনো হোতু. ধাতু গব্ভে গন্ধা মা সুস্সন্তু, পুপ্ফানি মা মিলাযন্তু, ৰতনানি মা ৱিৱণ্ণা হোন্তু, পূজনীযভণ্ডানি মা নস্সন্তু, পচ্চত্থিকপচ্চামিত্তানং ওকাসো ৱা ৱিৱৰো ৱা মা হোতু’তি অধিট্ঠহিংসু. ততো ৰাজা ধাতুযো মহন্তং পূজং কত্ৱা মঙ্গলচেতিযে চতুৰস্সকোট্ঠকং অতিমনোৰমং ছত্তকম্মঞ্চ কেলাসকূটং ৱিয সুধাকম্মঞ্চ ৱালুকপাদতো পট্ঠায সব্বঞ্চ কত্তব্বং কম্মং নিট্ঠাপেসি. সো পন সেত নিম্মলচন্দৰংসি ৱিয উদকবুব্বুড়কেলাসকূটপটিভাগো ছত্তধৰো |ও০.০০৬৩| অচলপ্পতিট্ঠিতো সুজনপ্পসাদকো অঞ্ঞতিত্থীয মদ্দনকৰো মঙ্গলথূপো ৱিৰোচিত্থ.

ৱিলাসমানো অট্ঠাসি তোসযন্তো মহাজনে;

মঙ্গলকেলাসথূপো অচলো সুপ্পতিট্ঠিতো.

সুজনপ্পসাদনকৰো তিত্থিযদিট্ঠিমদ্দনো;

ভৱি সদ্ধাকৰো সেট্ঠো সব্বজনপসাদকো.

চেতিযো পৱৰো লোকে মহাজননিসেৱিতো;

ধজপুপ্ফসমাকিণ্ণো সদা পূজাৰহো ভৱি.

বহূ জনা সমাগম্ম নানা দেসা সমাগতা;

পূজেসুং তং মহাথূপং সব্বদাপি অতন্দিতা.

ঈদিসো পতিৰূপৱাসো সো দেসো দুল্লভো ভৱে;

অপ্পমত্তা সদা সন্তা ৱিনাথ কুসলং বহুন্তি.

ৰাজা কপ্পাসিকসুখুমৱত্থেন মহাৰহং চেতিযং ৱেঠেত্ৱা, সিৰিৱড্ঢনং নাম মহাবোধিং পতিট্ঠপেত্ৱা তত্থ বোধিঘৰঞ্চ কাৰাপেত্ৱা তিভূমকং উপোসথাগাৰং কাৰাপেত্ৱা ৰত্তিট্ঠান দিৱাট্ঠানাদীনি কত্ৱা সব্বং ৱিহাৰে কত্তব্বং কাৰেসি. এত্তকং কাৰাপেত্ৱা ৱিহাৰং দক্খিণোদকং দস্সামী’তি চিন্তেত্ৱা অসীতিসহস্সমত্তানং ভিক্খূনং সত্তদিৱসানি নানাৱিধ সূপৱ্যঞ্জনেহি মহাদানং দত্ৱা সত্তমে দিৱসে মহাভিক্খু সঙ্ঘস্স তিচীৱৰত্থায ৱত্থানি দাপেত্ৱা পাতোৱ পাতৰাসভত্তং ভুঞ্জিত্ৱা থেৰস্স সন্তিকং গন্ত্ৱা ৱন্দিত্ৱা একমন্তং ঠীতো এৱমাহ? অয্যা, চাতুদ্দসিকে মহাভিক্খুসঙ্ঘস্স দক্খিণং দাতুমিচ্ছামী’তি. সো পনাযস্মা এৱমাহ; উপকট্ঠ পুণ্ণমাযং উপোসথদিৱসে অস্সযুজনক্খত্তেন দক্খিণং ধাতুং ভদ্দকন্তি. সো থেৰস্স ৱচনং সুত্ৱা পঞ্চপতিট্ঠিতেন থেৰং ৱন্দিত্ৱা সোমনগৰে অত্তনো ভগিনিং দেৱিং কথেসি? ভগিনি, দসবলস্স নলাটধাতুং নিদহিত্ৱা মঙ্গলমহাচেতিযানুৰূপং |ও০.০০৬৪| পাসাদং অলঙ্কতদ্ৱাৰট্টালকতোৰণং সেত ৱত্থ অনেকধজসমাকিণ্ণং ৱিহাৰঞ্চ কাৰাপেত্ৱা দক্খিণং দস্সামী’তি অয্যস্স কথেসিং. সো পনাযস্মা; উপকট্ঠ পুণ্ণমায উপোসথদিৱসে দাতুং যুত্তন্তি আহা’তি. দেৱ, কিং কথেসি, অয্যস্স কথীতনিযামেনেৱ উপকট্ঠ পুণ্ণমায উপোসথদিৱসে দক্খিণং দেহী’তি আহ. সো তস্সা কথং সুত্ৱা সোমনস্সপত্তো সাধু ভদ্দে’তি সম্পটিচ্ছিত্ৱা সোমনগৰে ৱিহৰন্তো, উপকট্ঠ পুণ্ণমায উপোসথে সম্পত্তেযেৱ অজ্জুপোসথো’তি ঞত্ৱা গিৰিঅভযং পক্কোসাপেত্ৱা, তাত স্ৱে দক্খিণং দাতব্বং ত্ৱং সেনঙ্গং অলঙ্কৰিত্ৱা স্ৱে অম্হেহি সদ্ধিং এহী’তি ৱত্ৱা সেৰুনগৰে সিৱৰঞ্ঞো লোণনগৰে মহানাগৰঞ্ঞো পণ্ণং পহিণী. স্ৱে তুম্হাকং হত্থিঅস্সৰথপত্তাদীনি সুৱণ্ণালঙ্কাৰেহি অলঙ্কৰিত্ৱা স্ৱে অম্হেহি সদ্ধিং ছণ ৱেসং গাহাপেত্ৱা অয্যস্স তিস্সত্থেৰস্স দক্খিণং দীযমানং সমোসৰন্তুতি. তে পন ৰাজানো সাসনং সুত্ৱা অত্তনো অত্তনো ৱিভৱানুৰূপেন হত্থিঅস্সৰথপত্তাদীনি অলঙ্কৰিত্ৱা গন্ধপঞ্চঙ্গুলিকং দত্ৱা সুৱণ্ণমালাদীনি পিলন্ধাপেত্ৱা মহা গোণেপি তথেৱ অলঙ্কৰিত্ৱা সিঙ্গেসু সুৱণ্ণকঞ্চুকং (পটি) মুঞ্চাপেত্ৱা অমচ্চগহপতি-ব্ৰাহ্মণপুত্ত-অজগোপক-খুজ্জৱামনক-সেনাপতিআদযো চ ৱিচিত্তৱত্থানি নিৱাসেত্ৱা নানাৱিধৱিলেপনানি ৱিলিম্পেত্ৱা আগন্ত্ৱা ৰঞ্ঞো দস্সযিংসু. ৰাজাপি চতুৰঙ্গিনিযা সেনায পৰিৱুতো অলঙ্কতহত্থিক্খন্ধং আৰুহি. সেসৰাজানো চ অত্তনো অত্তনো সেনঙ্গেহি পৰিৱাৰেত্ৱা হত্থিক্খন্ধে নিসীদিত্ৱা ৰাজানং মজ্ঝে কত্ৱা ৱামদক্খিণপস্সতো নমস্সমানা নিক্খমিংসু. তস্স পন গমনং অজাতসত্তুনো তথাগতস্স দস্সনত্থায জীৱকম্বৱনগমনং ৱিয তিংসযোজনপ্পমাণং এৰাৱণহত্থিক্খন্ধং আৰুহিত্ৱা দ্ৱীসু দেৱলোকেসু দেৱেহি পৰিৱাৰেত্ৱা সক্কস্স দেৱানমিন্দস্স নন্দনৱনগমনকালো ৱিয চ অহোসি. সো ৱড্ঢমাসকচ্ছাযায |ও০.০০৬৫| সম্পত্তায সোমনগৰতো নিক্খমিত্ৱা সেৰুদহস্স অন্তে নানাৱিধ অলঙ্কতপটিযত্তনাটকিত্থীনং পঞ্চঙ্গিকতুৰিযং পগ্গণ্হাপযমানো অট্ঠাসি.

মহাপথৱী ভিজ্জমানা ৱিয পব্বতা পৰিৱত্তমানা ৱিয মহাসমুদ্দো (থলং) অৱত্থৰিত্ৱা ভিজ্জমানকালো ৱিয চ অহোসি. ব্ৰাহ্মণা জযমুখমঙ্গলিকা সোত্থি ৱচনং ৱদিংসু. সব্বালঙ্কাৰপতিমণ্ডিতা নাটকিত্থিযো পঞ্চঙ্গিকতুৰিযং পৱত্তযিংসু. মহাজনো ৱেলুক্খেপসহস্সানি পৱত্তেসি. ততো ৰাজা বহূ গন্ধদীপধূপাদযো গাহাপেত্ৱা উট্ঠায সেনায পৰিৱুতো থেৰস্স ৱসনট্ঠানং পৱিসিত্ৱা থেৰং ৱন্দিত্ৱা নিসিন্নো আহ? অয্য ৰাজানো চ সম্পিণ্ডিত্ৱা দক্খিণোদকস্স দীযমানস্স কালো’তি. থেৰো তস্স কথং সুত্ৱা ভদ্দকং মহাৰাজা’তি সম্পটিচ্ছি. তস্মিং দক্খিণোদকস্স দানদিৱসে নানাৱিধৱিচিত্তমণিদণ্ডকেসু নানাৱিধ ধজপতাকাদীনি বন্ধাপেত্ৱা সমুস্সিতানি অহেসুং. পুৰিমাদী দিসাসু মনুঞ্ঞৱাতা ৱাযিংসু. তথা মহাৰংসিজালসমুজ্জলিতো সহস্সৰংসিভাকৰো অত্থঙ্গতো অহোসি. ৱিপ্ফুৰিতকিৰণৰজধূমৰাহুঅব্ভাদীহি উপৰোধেহি ৱিৰহিতো তাৰাগণপৰিৱুতো পুণ্ণচন্দো সমুজ্জলৰজতমযং আদাসমণ্ডলং ৱিয পাচীনদিসতো সমুগ্গতো. তস্মিং খণে দণ্ডদীপিকাদযো সমুজ্জলাপেসুং. মহামঙ্গলচেতিযং পন জাতিসুমনমালাদামেন পৰিক্খিপিত্ৱা একমালাগুণং ৱিয অলঙ্কৰি. যথা তাৰাগণপৰিৱুতো পুণ্ণচন্দো তথা পদীপমালালঙ্কতো মহাচেতিযো অতিৱিয ৱিৰোচতি. সকল লঙ্কাদীপে পন সব্বে ৰুক্খাপি ৱিচিত্তধজেন অলঙ্কতা ৱিয অকালফলপল্লৱেহি ৱিচিত্তা অহেসুং. মহাসমুদ্দলোণসাগৰাদযো’পি পঞ্চৱিধপদুমসঞ্ছন্না অহেসুং.

ৱিচিত্ৰৱত্থাভৰণেহি সব্বে,

অলঙ্কতা দেৱসমানৱণ্ণা;

অনেকসঙ্খ্যা সুমনা পতীতা,

জনা সমন্তা পৰিৱাৰযিংসু.

সব্বেৱ |ও০.০০৬৬| উজ্জলাপেসুং দণ্ডদীপং মনোৰমং;

সকলম্পি ইদং দীপং আসি ওভাসিতং তদা.

তাৰাগণসমাকিণ্ণো পুণ্ণচন্দোৱ জোতযী;

সাৰদে নভমজ্ঝম্হি ঠিতো ৰুচিৰৰংসিযা.

তথা অযং থূপৱৰো সুপ্পভাসো অলঙ্কতো;

মালাপদীপমজ্ঝম্হি ভাতি ভুতিলকুত্তমো.

সব্বে’পি পাদপা অস্স লঙ্কাদীপস্স সব্বসো;

ধজেহি’ৱ সমাকিণ্ণা আসুং পুপ্ফফলন্দদা.

সচেতনা যথা সব্বে অকা পূজং অকা তদা;

তথা অচেতনা সব্বে অকা পূজং অনপ্পকং.

যেভুয্যেন ভুমট্ঠে দেৱে উপাদায যাৱ অকণিট্ঠকা দেৱা ব্ৰহ্মা দিব্বমালাপাৰিচ্ছত্তককোৱিড়াৰচন্দনচুণ্ণং গহেত্ৱা আগতাদেৱাতি ৱা মনুস্সাতি ৱা জানিতুং অসক্কোন্তি. উক্কট্ঠমহাসমাগমো অহোসি. তস্মিম্পি দিৱসে মহাপথৱি আকাসযুগন্ধৰচক্কৱাড়পব্বতুত্তমাদযো কম্পিংসু. তং দিস্ৱা ৰাজা অতিৱিয সোমনস্সপ্পত্তো থেৰে চ অৱসেস মহামত্তাদযো সন্নিপাতেত্ৱা নাটকাদযো চ গহেত্ৱা, ইদানেৱাহং ৱিহাৰদক্খিণং দস্সামি’তি চেতিযঙ্গণং অগমাসি. থেৰোপি ভিক্খুসঙ্ঘং গহেত্ৱা চেতিযঙ্গণে অলঙ্কতমণ্ডপে নিসীদি. ৰাজা ৱাসিতগন্ধোদকসুৱণ্ণভিঙ্কাৰং গহেত্ৱা উদকং থেৰস্স হত্থে আসিঞ্চিত্ৱা দক্খিণং অদাসি. দত্ৱা চ পন এৱমাহ; অয্যা এসা ধাতু ময্হং পিতামহৱংসেন আগতা. ইদানি অম্হাকং অতিৰুচিৰৰমণিযা ৰোহণজনপদা আহৰিত্ৱা সুৱণ্ণেন ধাতুগব্ভং, সত্তৰতনেন ধাতুমণ্ডপং কাৰাপেত্ৱা তস্মিং সুৱণ্ণমযং বুদ্ধপটিমং নিসীদাপেত্ৱা অম্হাকং দসবলস্স নলাটধাতুং |ও০.০০৬৭| নিদহিত্ৱা অয্যস্স চীৱৰাদীনমত্থায ইদানি সোড়সগামৱৰানি দস্সামি’তি গামৱৰানি দত্ৱা সমন্ততো তিগাৱুতপ্পমাণে সেৰুদহে ভেৰিং চৰাপেত্ৱা আৰামিকং কত্ৱা আহ? ভন্তে, তুম্হাকং মযা দিন্নসোড়সগামং অজ্জেৱ গন্তব্বং. গন্ত্ৱা চ পন অজ্জেৱ পৰিগ্গহং কৰোথাতি ৱত্ৱা তত্থেৱ ৱাসুপগতো পুন দিৱসে সমাগন্ত্ৱা সত্তাহং মহাদানং দত্ৱা সত্তমে দিৱসে মহাভিক্খুসঙ্ঘস্স তীচীৱৰপ্পহোনকসাটকং পণীতং ভোজনং দত্ৱা থেৰস্স সন্তিকং আগতো, অয্য ৱিহাৰে কত্তব্বং অপৰিহাপেত্ৱা মযা কতং, গেহং গমিস্সামীতি (নিৱেদেসি). থেৰো তস্স কথং সুত্ৱা সাধু মহাৰাজাতি সম্পটিচ্ছি.

সো পন চেতিযস্স পূজনত্থায পুপ্ফাৰামং কাৰাপেত্ৱা মালাকাৰানং পৰিব্বযং দাপেসি. তথা ভেৰিৱাদকনাটকানম্পি ৱিহাৰসীমন্তে সুৱণ্ণনঙ্গলেন পৰিচ্ছিন্দিত্ৱা আৰামিকানম্পি গামং কাৰাপেসি. ভিক্খুসঙ্ঘস্স ৱেয্যাৱচ্চত্থায অত্তনো সন্তিকে পঞ্চসতঅমচ্চধীতৰো তত্তকে অমচ্চপুত্তে দাসদাসিযো চ দত্ৱা পৰিব্বযত্থায তেসং তেসং পঞ্চসতসহস্সকহাপণে চ দাপেসি. ভিক্খুসঙ্ঘস্স চ ধাতুপুজনত্থায সোড়সসহস্সং কহাপণং দাপেসি.

ততো গিৰিঅভযং পক্কোসাপেত্ৱা, তাত তুম্হে ইধেৱ নিচ্চং ৱসথ. অম্হাকং ৱিহাৰে চ আৰামিকেসু চ অয্যেসু চ অপ্পমত্তো হোহীতি ওৱদিত্ৱা সব্বং তস্স নিয্যাদেসি. থেৰো তস্স এৱমাহ? মহাৰাজ সমন্ততো মহাসীমং বন্ধিতব্বন্তি. বন্ধথ ভন্তেতি ৱুত্তে? মহাৰাজ অকিত্তিতেন নিমিত্তেন সীমং বন্ধিতুং নসক্কা, ৱিহাৰস্স পাচীন পচ্ছিমুত্তৰদক্খিণতো মহাসীমং বন্ধনায নিমিত্তং সল্লক্খেত্ৱা দেহি, মযং সীমং বন্ধিস্সামাতি আহ. ৰাজা তুট্ঠো সত্ত অমচ্চে সব্বালঙ্কাৰেন অলঙ্কৰিত্ৱা সীমানিমিত্তং কিত্তেত্ৱা আগমনত্থং |ও০.০০৬৮| পেসেসি. তে পন সত্ত অমচ্চা চতুসু দিসাসু নিমিত্তং সল্লক্খেত্ৱা পণ্ণে লিখিত্ৱা আহৰিত্ৱা ৰঞ্ঞো অদংসু. ৰাজা একেকং সতকহাপণং দত্ৱা চতুসু দিসাসু আৰক্খং দাপেত্ৱা সীমং বন্ধন্তূতি মহাভিক্খুসঙ্ঘস্স নিৱেদেসি. অথ থেৰো ভিক্খুসঙ্ঘপৰিৱুতো চেতিযঙ্গণে নিসীদিত্ৱা ৱপ্পমাসকাড়পক্খদ্ৱাদসদিৱসে সীমং বন্ধিত্ৱা নিট্ঠপেসি.

তত্থ সীমানিমিত্তং এৱং জানিতব্বং; পুৰিমায দিসায সিগাল পাসাণং গতো. ততো মচ্ছসেলগামস্স ৱাম পস্সেন কোটসীমা নাম গামক্খেত্তং ৱিস্সজ্জেত্ৱা গণদ্ৱাৰগামং গতো. চিত্তৱাপিযা উত্তৰৱান কোটিতো ৱৰগামক্খেত্তে পিট্ঠিপাসাণং গতো. ততো সালিকং নাম মধুকৰুক্খে ঠীতপাসাণথূপস্স গতো. ততো ৱুত্তিক নাম ৱাপিযা দক্খিণৱান কোটিতো কণিকাৰ সেলস্স গতো. ততো ছন্নজ্ঝাপিতসেলস্স গতো. ততো কুক্কুটসিৱ নাম উপাসকস্স মধুকৰুক্খে ঠীতং থূপং গতো. ততো সোণ্ডং নাম সেলং গতো. ততো সবৰং নাম পাসাণং গতো. ততো এলালতিত্থস্স গতো. ততো সোব্ভ মজ্ঝিমেন গন্ত্ৱা অস্সবন্ধনং নাম ঠানং গতো. ততো পাসাণস্স মত্থকে উদক কাকং নাম নিগ্ৰোধং গতো. সো ৰুক্খো উদক কাকানং ৱুসিত ভাৱেন এৱং নাম জাতো. ততো তম্বতিত্থং নাম গন্তা মহাচাৰিকস্সনাম থূপমগ্গস্স গতো. |ও০.০০৬৯| ততো অস্সমণ্ডলপিট্ঠিং গতো. ততো মহা কদম্ব পস্সে ঠীতং পাসাণথূপং গতো. ততো মহা ৰাজুৱাপিযা উত্তৰকোটিযা ঠীতং মহানিগ্ৰোধৰুক্খং গতো. ততো মহাৱনপিট্ঠিং গতো. ততো লোণসাগৰস্স অন্তে ৰজতসেলং গতো. পুন আৱত্তিত্ৱা সিগাল পাসাণেযেৱ ঠীতো. ইমং এত্তকং পদেসং সমন্ততো পৰিচ্ছিন্দাপেত্ৱা ৰাজা অদাসি. ৱিহাৰস্স বহূ আৰামিকে চ (তেসং) ৱিৱিধানি উপকৰণানি (চ) দাপেত্ৱা সব্বে পাকাৰতোৰণাদযো কাৰাপেত্ৱা ৱিহাৰং নিট্ঠাপেত্ৱা ৰোহণমেৱ গতো.

ৰাজা পসন্নহদযো মহাপুঞ্ঞো মহাবলো;

কাৰেত্ৱা উত্তমং থূপং কঞ্চনগ্ঘীক সোভিতং.

বন্ধাপেত্ৱা ততো সীমং ৱট্টগামঞ্চ সোড়স;

দত্ৱা আৰামিকানঞ্চ সব্বুপকৰণানি চ.

ততো সো ৰোহণং গন্ত্ৱা মহাসেনাপুৰক্খতো;

ৱিহাৰদেৱিযা সদ্ধিং মোদমানো ৱসী তহিং.

থেৰো পন তত্থেৱ ৱিহৰন্তো যো ইমস্মিং ৱিহাৰে ৱসন্তো তথাগতস্স একগন্ধকুটিযং ৱুত্থো ৱিয ভৱিস্সতীতি খ্যাকৰিত্ৱা ততো পট্ঠায সীলাচাৰসমাধিসমাপত্তিপটিলদ্ধজড়ভিঞ্ঞাপটিসম্ভিদপ্পত্তেহি খীণাসৱেহি পৰিৱাৰেত্ৱা সব্ব বুদ্ধগুণং অনুস্সৰন্তো চিৰং ৱসিত্ৱা তত্থেৱ অনুপাদিসেসায নিব্বানধাতুযা পৰিনিব্বাযি.

অনেকগুণসম্পন্নো |ও০.০০৭০| তিস্সত্থেৰো বহুস্সুতো;

জনানং সঙ্গহংকত্ৱা নিব্বুতো সো অনাসৱো.

থেৰাপি তে সীলসমাধিযুত্তা,

বহুস্সুতা সাধুগুণাভিৰামা;

পঞ্ঞাপভাৱাযুপ্পন্নচিত্তা,

গুণাকৰা তানযুতা জনানং.

পহীনভৱসংসাৰা পভিন্নপটিসম্ভিদা;

নামৰূপং সমাসন্তো পেসলা ছিন্নবন্ধনা.

সত্তানং উত্তমং সন্তিং কত্ৱা চ জনসঙ্গহং;

নিব্বুতা তে মহাপঞ্ঞা পদীপোচ সুমানসা.

ইতি অৰিযজনপ্পসাদনত্থায কতে ধাতুৱংসে

ধাতুনিধানাধিকাৰো নাম

পঞ্চমো পৰিচ্ছেদো.

ইমিনা |ও০.০০৭১| কাৰাপিতৱিহাৰা কথেতব্বা; ৱিহাৰদেৱীমহাৱিহাৰং, ছাতপব্বত ৱিহাৰং, সমুদ্দৱিহাৰং, চিত্তলপব্বতৱিহাৰং, ভদ্দপাসাণদ্ৱাৰৱিহাৰং, অচ্ছগল্ল ৱিহাৰং, কোড়ম্বতিস্সপব্বতৱিহাৰং, গণৱিহাৰং, কালকৱিহাৰং, দুক্খপালক ৱিহাৰং, উচ্চঙ্গণৱিহাৰং, কোটিতিস্সৱিহাৰং, তস্স পন একনামং কত্ৱা কাৰাপিতে মহাগামে তিস্সমহাৱিহাৰাদিং কত্ৱা একসতঅট্ঠৱীসৱিহাৰানি কতানি অহেসুং.

অট্ঠৱীসএকসতৱিহাৰঞ্চ মহাৰহং;

ৱিহাৰদেৱিযা সদ্ধিং কাৰাপেসি মহাযসো.

ততো পট্ঠায ৰাজা মহাদানং দত্ৱা পুঞ্ঞানি কত্ৱা ততো চুতো দেৱলোকে নিব্বত্তি.

কত্ৱানি পুঞ্ঞকম্মানি অনেকানি মহাযসো;

অত্থং জনস্স কত্ৱান গন্ত্ৱান তুসিতং পুৰং.

সো তত্থ দিব্বসম্পত্তিং চীৰং ভুঞ্জিয নন্দিতো;

মহাৱীভৱসম্পন্নো দেৱতানং পুৰক্খতো.

তম্পি সম্পত্তিমোহায জীৱৱলোকে মনোৰমে;

লোকুত্তৰং সিৱং খেমং ইচ্ছন্তো আগমিস্সতি.

সো ততো চুতো জম্বুদীপে নিব্বত্তিত্ৱা মেত্তেয্য ভগৱতো পিতা সুব্ৰহ্মা নাম ভৱিস্সতি. ৱিহাৰদেৱী তস্সেৱ মাতা ব্ৰহ্মৱতী নাম ব্ৰাহ্মণী ভৱিস্সতি. অভযগামণীকুমাৰো তস্সেৱ মেত্তেয্যস্স ভগৱতো পঠমগ্গসাৱকো ভৱিস্সতি. কনিট্ঠো সদ্ধাতিস্সো দুতিযগ্গসাৱকো ভৱিস্সতি.

এত্তাৱতা নলাটধাতু সংৱণ্ণনা সমত্তা.

ধাতুৱংসো সমত্তো.

অনেন |ও০.০০৭২| পুঞ্ঞকম্মেন সংসৰন্তো ভৱাভৱে;

সব্বত্থ পণ্ডিতো হোমী সাৰিপুত্তোৱ পঞ্ঞৱা.

অৰিমেদস্স বুদ্ধস্স পব্বজিত্ৱান সাসনে;

নিব্বানং পাপুণিত্ৱান মুঞ্চেমি ভৱবন্ধনা.

অনেন মে সব্বভৱাভৱে’হং,

ভৱেয্যমেকন্তপৰানুকম্পী;

কুলী বলী চেৱ সতী মতী চ,

কৱীহিসন্তেহি সদা সমঙ্গী.

পঞ্ঞাৱন্তানং অগ্গো ভৱতু.