৩. |ও০.০০২৪| ধাতুপৰম্পৰাকথা

ধাতুসু পন ৱিভজিত্ৱা দীযমানেসু সত্থুনো নলাটধাতু কোসিনাৰকানং মল্লানং লদ্ধকোট্ঠাসেযেৱ অহোসি. মহাকস্সপত্থেৰো তে উপসঙ্কমিত্ৱা সত্থুনো নলাটধাতু তুম্হাকং কোট্ঠাসে অহোসি, তং গহেতুং আগতো, ভগৱা হি ধৰমানেযেৱ তম্বপণ্ণিদীপস্স অনুজানি, ‘তস্মা তং অম্হাকং দেথা’তি. তং সুত্ৱা মল্লৰাজানো?’এৱং পতিগণ্হথ ভন্তে ধাতু’তি মহাকস্সপত্থেৰস্স অদংসু. সো অত্তনো সদ্ধিৱিহাৰিকং মহানন্দত্থেৰং পক্কোসাপেত্ৱা নলাটধাতুং থেৰস্স নিয্যাদেত্ৱা’ ইমং ধাতুং তম্বপণ্ণি দীপে মহাৱালুকগঙ্গায দক্খিণভাগে সেৰুনাম দহস্স অন্তে ৱৰাহ নাম সোণ্ডিমত্থকে কাকৱণ্ণতিস্সো নাম ৰাজা পতিট্ঠাপেস্সতি, চেতিযং সঙ্ঘাৰামং কাৰাপেস্সতি, ত্ৱং ইমং ধাতুং গহেত্ৱা ৱেসালিযং উপনিস্সায মহাৱনৱিহাৰে কুটাগাৰসালাযং সত্থুনো ৱসিতগন্ধকুটিযং ঠপেত্ৱা ধাতুপূজং কত্ৱা আযুসঙ্খাৰে ওস্সট্ঠে পৰিনিব্বাপযমানে অত্তনো সদ্ধিৱিহাৰিকস্স চন্দগুত্তত্থেৰস্স ধাতুৱংসং কথেত্ৱা অপ্পমত্তো হোহী’তি ৱত্ৱা ধাতুং থেৰস্স দত্ৱা অনুপাদিসেসনিব্বানধাতুযা পৰিনিব্বাযি.

সাৱকো সত্থুকপ্পো সো পভীন্নপটিসম্ভিদো;

গহেত্ৱা মানযী ধাতুং মহানন্দো মহাৱনে.

তস্স থেৰস্স সদ্ধিৱিহাৰিকো চন্দগুত্তত্থেৰো ধাতুং গহেত্ৱা আকাসং উগ্গন্ত্ৱা সাৱত্থীযং জেতৱনমহাৱিহাৰে দসবলেন ৱসিতগন্ধকুটিযং ঠপেত্ৱা ধাতুপূজং কত্ৱা চিৰং ৱিহাসি. সোপি আযুসঙ্খাৰে ওস্সট্ঠে পৰিনিব্বাপযমানে অত্তনো. সদ্ধিৱিহাৰিকং ভদ্দসেনত্থেৰং পক্কোসাপেত্ৱা ধাতুং থেৰস্স নিয্যাদেত্ৱা ধাতুৱংসং কথেত্ৱা অনুসাসিত্ৱা অনুপাদিসেসায নিব্বানধাতুযা পৰিনিব্বাযি.

চন্দগুত্তো মহাপঞ্ঞো ছড়ভিঞ্ঞো ৱিসাৰদো;

ৰম্মে জেতৱনে ধাতুং ঠপেত্ৱা ৱন্দনং অকা.

তস্স |ও০.০০২৫| সিস্সো ভদ্দসেনত্থেৰো ধাতুং গহেত্ৱা আকাসেন গন্ত্ৱা ধম্মচক্কপ্পৱত্তনে ইসিপতনে মহা ৱিহাৰে সত্থুনো ৱসিতগন্ধকুটিযং ঠপেত্ৱা গন্ধমালাদীহি পূজেত্ৱা চিৰং ৱিহাসি. সো পৰিনিব্বাপযমানো অত্তনো সদ্ধিৱিহাৰিকস্স জযসেনত্থেৰস্স ধাতুং নিয্যাদেত্ৱা ধাতুৱংসং কথেত্ৱা অনুপাদিসেসায নিব্বানধাতুযা পৰিনিব্বাযি.

ভদ্দসেনো মহাথেৰো কতকিচ্চো মহাইসি;

ধাতুং ঠপেত্ৱা ইসিপতনে ৱন্দিত্ৱা নিব্বুতিং গতো.

সো পন জযসেনত্থেৰো তং ধাতুং গহেত্ৱা ৱেলুৱনমহাৱিহাৰে সত্থুনো ৱসিতগন্ধকুটিযং ঠপেত্ৱা গন্ধমালাদীহি পূজেত্ৱা চিৰং ৱসিত্ৱা পৰিনিব্বাপযমানো অত্তনো সদ্ধিৱিহাৰিকস্স মহাসঙ্ঘৰক্খিতত্থেৰস্স ধাতুং নিয্যাদেত্ৱা ধাতুৱংসং কথেত্ৱা অনুপাদিসেসায নিব্বানধাতুযা পৰিনিব্বাযি.

গহেত্ৱান ধাতুৱৰং জযসেনো মহামুনি;

নিধায ৱেলুৱনে ৰম্মে অকা পূজং মনোৰমং.

সো পনাযস্মা সঙ্ঘৰক্খিতত্থেৰো ধাতুং গহেত্ৱা আকাসেন আগন্ত্ৱা কোসম্বিং উপনিস্সায ঘোসিত সেট্ঠিনা কাৰাপিতে ঘোসিতাৰামে ভগৱতো ৱসিতগন্ধকুটিযং ঠপেত্ৱা গন্ধমালাদীহি পূজং কত্ৱা চিৰং ৱিহাসি. সো’পি পৰিনিব্বাপযমানো অত্তনো সদ্ধিৱিহাৰিকং মহাদেৱত্থেৰং পক্কোসাপেত্ৱা ধাতুৱংসং কথেত্ৱা অপ্পমত্তো হোহী’তি ৱত্ৱা অনুপাদিসেসায নিব্বানধাতুযা পৰিনিব্বাযি.

সঙ্ঘৰক্খিতৱ্হযো থেৰো চন্দো ৱিয সুপাকটো;

ঠপেত্ৱা ঘোসিতাৰামে অকা পূজং মনোৰমং.

তস্স থেৰস্স সদ্ধিৱিহাৰিকো মহাদেৱত্থেৰো ধাতুং গহেত্ৱা দেৱানম্পিযতিস্সস্স মহাৰঞ্ঞো ভাতু মহানাগস্স উপৰাজস্স মহাগামে সেতচ্ছত্তং উস্সাপিতকালে হত্থোট্ঠ নামজনপদে কুক্কুটপব্বতন্তৰে মহাসালৰুক্খমূলে আকাসতো ওতৰিত্ৱা নিসীদি. তস্মিং সমযে মহাকাড়ো নাম উপাসকো অত্তনো পুত্তদাৰেহি সদ্ধিং মালাগন্ধৱিলেপনং ধজপতাকাদীনি গাহাপেত্ৱা দিৱসস্স তিক্খত্তুং মহন্তেহি পূজাৱিধানেহি ধাতুং পৰিহৰিত্ৱা চিৰং ৱসি. মাসস্স অট্ঠ-উপোসথদিৱসে |ও০.০০২৬| ধাতুতো ছব্বণ্ণৰংসিযো উগ্গচ্ছিংসু. তস্মিং সমযে সো পদেসো বুদ্ধস্স ধৰমানকালো ৱিয অহোসি. জনপদৱাসী মনুস্সাপি থেৰস্স সন্তিকে সীলানি গণ্হন্তি, উপোসথৱাসং ৱসন্তি, দানং দেন্তি, চেতিযস্স মহন্তং পূজং কৰোন্তী. ততো অপৰভাগে উপৰাজা মহাগামে ৱিহৰন্তো ভেৰিং চৰাপেসি? যো অম্হাকং দসবলস্স ধাতুং গহেত্ৱা ইধাগতো, তস্স মহন্তং সম্পত্তিং দস্সামীতি. তস্মিং কালে কুটুম্বিকো মহাকাড়ো উপৰাজং পস্সিস্সামীতি তস্স অনুচ্ছৱিকং পণ্ণাকাৰং গহেত্ৱা ৰাজদ্ৱাৰে ঠত্ৱা সাসনং পহিণি. উপৰাজা তং পক্কোসাপেসি. সো গন্ত্ৱা ৱন্দিত্ৱা ঠিতো তং পণ্ণাকাৰং ৰাজপুৰিসানং পটিচ্ছাপেসি. উপৰাজা? মাতুল মহাকাড়, তুম্হাকং জনপদে অম্হাকং সত্থুনো ধাতু অত্থী’তি আহ. মহাকাড়ো উপ ৰাজস্স কথং সুত্ৱা অত্থি দেৱ, ময্হং কুলুপগত্থেৰস্স সন্তিকে আদাসমণ্ডলপ্পমাণং সত্থুনো নলাটধাতু ছব্বণ্ণৰংসীহি আকাসপ্পদেসে সূৰিযসহস্সচন্দসহস্সানং উট্ঠিতকালো ৱিয ওভাসেতি. সো জনপদো বুদ্ধস্স উপ্পন্নকালো ৱিয অহোসীতি আহ. তস্স কুটুম্বিকস্স কথং সুণন্তস্সএৱ ৰঞ্ঞো সকলসৰীৰং পঞ্চৱণ্ণায পীতিযা পৰিপুণ্ণং অহোসি. অতিৱিয সোমনস্সপ্পত্তো ৰাজা ময্হং মাতুলস্স মহাকাড়স্স সতসহস্সং কহাপণানি চ চতুসিন্ধৱযুত্তৰথঞ্চ সুৱণ্ণালঙ্কাৰেহি সুসজ্জিতং একং অস্সঞ্চ উদকফাসুকট্ঠানকে খেত্তঞ্চ পঞ্চদাসীসতঞ্চ দেথা’তি ৱত্ৱা অঞ্ঞঞ্চ পসাদং দাপেসি. সো উপৰাজা এত্তকং কুটুম্বিকস্স দাপেত্ৱা তং দিৱসমেৱ নগৰে ভেৰিং চৰাপেত্ৱা হত্থস্সৰথযানানি গহেত্ৱা কুটুম্বিকং মগ্গদেসকং কত্ৱা অনুপুব্বেন হত্থোট্ঠজনপদং পত্ৱা ৰমণীযে ভূমিপ্পদেসে খন্ধাৱাৰং বন্ধিত্ৱা অমচ্চগণপৰিৱুতো কুটুম্বিকং গহেত্ৱা থেৰস্স ৱসনট্ঠানং গন্ত্ৱা ৱন্দিত্ৱা একমন্তং অট্ঠাসি. সেসা অমচ্চা কুটুম্বিকো চ থেৰং ৱন্দিত্ৱা একমন্তং |ও০.০০২৭| অট্ঠংসু. উপৰাজা থেৰং ৱন্দিত্ৱা সাৰাণীযং কথং কত্ৱা একমন্তং নিসিন্নো পটিসন্থাৰমকাসি. মহাদেৱত্থেৰোপি সম্মোদনীযং কথং কত্ৱা কিস্স ত্ৱং মহাৰাজ ইধাগতোসি আগতকাৰণং মে আৰোচেহী’তি আহ. ভন্তে তুম্হাকং. সন্তিকে অম্হাকং ভগৱতো নলাটধাতু অত্থী কিৰ. তং ৱন্দিস্সামি’তি আগতোম্হী’তি আহ. থেৰো? ভদ্দকং মহা ৰাজ তযা কতন্তি ৱত্ৱা ধাতুঘৰদ্ৱাৰং ৱিৱৰিত্ৱা মহাৰাজ বুদ্ধস্স নলাটধাতু অতিদুল্লভা’তি আহ. ৰাজা সোড়সেহি গন্ধোদকেহি নহাযিত্ৱা সব্বালঙ্কাৰপতিমণ্ডিতো একংসং উত্তৰাসঙ্গং কৰিত্ৱা অঞ্জলিং পগ্গয্হ নমস্সমানো অট্ঠাসি. বুদ্ধাৰম্মণায পীতিযা সকলসৰীৰং ফুটং অহোসি.

(ৰাজা পীতিৱেগেন ইমা গাথা আহ;

নমামি ৱীৰ পাদে তে চক্কঙ্কিত তলে সুভে;

ৱন্দিতে নৰদেৱেহি অমতং দেহি ৱন্দিতে.

লোকনাথ তুৱং একো সৰণং সব্বপাণিনং;

লোকে তযা সমো নত্থি তাৰেহি জনতং বহুং.

মহণ্ণৱে মযং ভন্তে নিমুগ্গা দীঘসম্ভৱে;

অপ্পতিস্সা অপ্পতিট্ঠা সংসৰাম চিৰং তহিং.

এতৰহি তুম্হে আপজ্জ পতিট্ঠং অধিগচ্ছৰে;

তুম্হাকং ৱন্দনং কত্ৱা উত্তিণ্ণম্হ ভৱণ্ণৱা’তি.)

তস্মিং খণে ধাতুতো ৰস্মিযো নিক্খমিংসু. সকল লঙ্কাদীপং সুৱণ্ণৰসধাৰাহি সঞ্ছন্নং ৱিয অহোসি. মহন্তং পীতিসোমনস্সং উপ্পজ্জি. ৰাজা মহন্তং সোমনস্সং পত্তো হুত্ৱা হট্ঠতুট্ঠো অহোসি. সো ধাতুঘৰতো নিক্খমিত্ৱা থেৰেন সদ্ধিং অলঙ্কতমণ্ডপে একমন্তং নিসীদি. একমন্তং নিসিন্নো (নিসজ্জাদোসে ৱজ্জেত্ৱা সেয্যথিদং? অতিদুৰচ্চাসন্ত-উপৰিৱাত-উন্নতপ্পদেস-অতিসম্মুখ-অতিপচছা’তি. |ও০.০০২৮| অতিদূৰে নিসিন্নো সচে কথেতুকামো উচ্চাসদ্দেন কথেতব্বং হোতি. অচ্চাসন্নে নিসিন্নো সঙ্কৰং কৰোতি. উপৰিৱাতে নিসিন্নো সৰীৰগন্ধো ৱাযতি. উন্নতপ্পদেসে নিসিন্নো অগাৰৱং কৰোতি. অতিসম্মুখে নিসিন্নো চক্খুনা চক্খুং পহৰিত্ৱা দট্ঠব্বং হোতি. অতিপচ্ছা নিসিন্নো গীৱং পৰিৱত্তেত্ৱা দট্ঠব্বং হোতি. ইতি নিসজ্জাদোসং ৱজ্জেত্ৱা নিসিন্নো). এৱমাহ. ভন্তে ইমং ধাতুং ময্হং দেথ. মহন্তং পূজাসক্কৰং কত্ৱা পৰিহৰামীতি. ভদ্দকং মহাৰাজ ইমায ধাতুযা সম্মাসম্বুদ্ধো ধৰমানোযেৱ ৱ্যাকৰণং অকাসি. তুম্হাকং ৱংসে জাতো কাকৱণ্ণতিস্সো নাম ৰাজা ইমস্মিং দীপে মহাৱালুকগঙ্গায দক্খিণতীৰে সেৰু নাম দহস্স অন্তে ৱৰাহ নাম সোণ্ডিযা মত্থকে পতিট্ঠপেত্ৱা মহন্তং থূপং কৰিস্সতী’তি ৱত্ৱা সত্থা তত্থ সমাপত্তিং সমাপজ্জিত্ৱা পঞ্চসতখীণাসৱেহি সদ্ধিং তিক্খত্তুং পদক্খিণং কত্ৱা গতো. তস্মা গণ্হথ মহাৰাজা’তি ৱত্ৱা ধাতুং অদাসি.

ৰাজা ধাতুং গহেত্ৱা চতুৰস্সপল্লঙ্কে ধাতুকৰণ্ডকং নিদহিত্ৱা কৰণ্ডকে ধাতুং পতিট্ঠাপেত্ৱা তং কুমুদপত্তসন্নিহমঙ্গলসিন্ধৱযুত্তৰথে ঠপেত্ৱা সমন্তা আৰক্খং সংৱিদহিত্ৱা (ৰাজা ধাতুং গহেত্ৱা) পঞ্চঙ্গতুৰিযে পগ্গণ্হাপযমানো পচ্ছা আগচ্ছতু’তি মহাজনস্স সাসনং ৱত্ৱা মহাদেৱত্থেৰস্স সন্তিকং গন্ত্ৱা? তুম্হে ভন্তে, ধাতুযা উপট্ঠানং কৰোন্তো আগচ্ছথা’তি আহ. থেৰো তস্স কথং সুত্ৱা;’মহাৰাজ অযং ধাতু পৰম্পৰা আগতা. অহং ভগৱতো ধম্মভণ্ডাগাৰিকআনন্দত্থেৰো ৱিয ইমং ধাতুং পৰিহৰিস্সামী’তি ৱত্ৱা অত্তনো পচ্চযদাযকং কুটুম্বিকং আপুচ্ছিত্ৱা পত্তচীৱৰমাদায ধাতুং উপট্ঠহিযমানো পচ্ছতো পচ্ছতো গচ্ছতি. ৰাজা ধাতুং গহেত্ৱা অনুপুব্বেন মহাগামং পত্তো মহাসেনগুত্তং পক্কোসাপেত্ৱা নগৰং অলঙ্কৰাপেহী’তি আহ. সো নগৰে ভেৰিং চৰাপেত্ৱা অট্ঠাৰস ৱীথিযো সম্মজ্জন্তু, পুণ্ণঘটে ঠপেন্তু, ধজপতাকাদযো উস্সাপেন্তু, তোৰণানি উস্সাপেন্তু, পঞ্চৱণ্ণানি পুপ্ফানি |ও০.০০২৯| ওকিৰন্তু, সকলনগৰং অলঙ্কৰোন্তু, গন্ধমালাদযো গহেত্ৱা সুদ্ধুত্তৰাসঙ্গা হুত্ৱা সকলনাগৰা পটিপথং আগচ্ছন্তুতি আণাপেসি. ততো মহাজনো সব্বতুৰিযানি ঘোসাপযমানো গন্ধমালাদিহত্থো পটিপথং নিক্খন্তো. দেৱমনুস্সা ভিক্খুভিক্খুনিযো উপাসকোপাসিকা অপ্পমাণা অহেসুং. (গন্ধমালাদি পুণ্ণঘটসমুস্সিতধজাকিণ্ণা) পৰিসা ৱেলুক্খেপসহস্সানি পৱত্তযিংসু. সুগন্ধৱাতাভিঘাতসমুদ্দঘোসো ৱিয সকলনগৰং একনিন্নাদজাতং. সো ৰাজা নগৰে বন্ধনাগাৰে সব্বসত্তে বন্ধনা মুঞ্চন্তু, ধম্মেন সমেন অনুসাসন্তুতি ৱত্ৱা ধাতুং গহেত্ৱা অত্তনো নগৰং পৱেসেত্ৱা অত্তনো ৰাজনিৱেসনং আগন্ত্ৱা নাটকীনং সঞ্ঞমদাসি ধাতুং ৱন্দন্তুতি. নাটকী নানাভৰণেহি পতিমণ্ডিতা ৰাজগেহতো নিক্খমিত্ৱা ধাতুং ৱন্দিত্ৱা অত্তনো অত্তনো হত্থগতানি তুৰিযভণ্ডানি সাধুকং পগ্গণ্হিত্ৱা মহন্তং পূজমকংসু.

ততো ৱড্ঢকিং পক্কোসাপেত্ৱা ৰাজনিৱেসনতো নাতিদূৰে নাচ্চাসন্তে সুভুমিতলে ধাতুঘৰং কাৰাপেত্ৱা মালাকম্মলতাকম্মাদিং পতিট্ঠাপেত্ৱা ধাতুঘৰে ৱিচিত্তমণ্ডপং কাৰাপেত্ৱান সত্তৰতনমযং ধাতুকৰণ্ডকং কাৰাপেত্ৱা ধাতুকৰণ্ডকে ধাতুং ঠপেত্ৱা ৰতনপল্লঙ্ক মত্থকে ধাতুং ঠপেত্ৱা উপৰি ৱিচিত্তৱিতানং বন্ধিত্ৱা সাণিযা পৰিক্খিপাপেত্ৱা মহন্তেন পৰিৱাৰেন মহন্তং ধাতুপূজং অকাসি. মহাজনা গন্ধমালং গহেত্ৱা মাসস্স অট্ঠূপোসথদিৱসে ধাতুযা মহন্তং পূজং অকংসু. ধাতুতো ৰংসিযো সমুগ্গচ্ছন্তি. মহাজনা ৱিম্ভযজাতা সাধুকাৰং কৰোন্তি. সোমনস্সভূতা সকলনগৰৱাসিনো বুদ্ধাৰম্মণ পীতিং গহেত্ৱা দিৱসে দিৱসে ধাতুযা মহন্তং পূজং কৰোন্তা ৱীতিনামেন্তি. পঞ্চসীলানি ৰক্খন্তি, বুদ্ধমামকা ধম্মমামকা সঙ্ঘমামকা হুত্ৱা সৰণানি গচ্ছন্তি. ৰাজা মহাজনস্স ওৱদতি. ‘‘মেত্তং ভাৱেথ, কৰুণং মুদিতং উপেক্খং ভাৱেথ, কুলে জেট্ঠাপচাযনকম্মং কৰোথা‘‘তি. ওৱদিত্ৱা ভিক্খুসঙ্ঘস্সপি চত্তাৰো পচ্চযে গঙ্গায মহো-ঘপ্পৱত্তনকালো |ও০.০০৩০| ৱিয মহাদানং পৱত্তেসি. মাতাপিতুট্ঠানে ঠত্ৱা ভিক্খুসঙ্ঘং সঙ্গণ্হি. মহাজনা তস্স ওৱাদে ঠত্ৱা দানাদীনি পুঞ্ঞানি কত্ৱা যেভুয্যেন তস্মিং কালে মতা সগ্গং গতা.

কল্যাণৱগ্গম্হি পতিট্ঠিতা জনা,

দানাদি পুঞ্ঞানি কৰিত্ৱ সব্বদা;

চুতা চুতা সব্বজনা সুমানসা,

গতা অসেসং সুগতিং সুভে ৰতা.

ৰাজা ধাতুযা মহন্তং পূজং কৰোন্তো মহগামে ৱিহাসি. তেন পতিট্ঠাপিতৱিহাৰা কথেতব্বা? কথং? লেনৱিহাৰং চন্দগিৰিৱিহাৰং কোটিপব্বতৱিহাৰং নগৰঙ্গণৱিহাৰং সেলকা ৱিহাৰং তলাকাৱিহাৰন্তি এৱমাদযো ৱিহাৰে পতিট্ঠাপেত্ৱা তিপিটকমহাঅৰিট্ঠত্থেৰস্স দক্খিণোদকং দত্ৱা মহাৱিহাৰে নিয্যাদেসি. এৱং সো ৰাজা যাৱজীৱং ধাতুং পৰিহৰিত্ৱা পচ্ছিমে কালে মৰণমঞ্চে নিপন্নো অত্তনো পুত্তং যটালতিস্স কুমাৰং পক্কোসাপেত্ৱা; তাত তিস্স, অম্হেহি পৰিহৰিত নলাটধাতু পূজেহী’তি ধাতুৱংসং কথেত্ৱা পুত্তং অনুসাসিত্ৱা কালং কত্ৱা সগ্গপুৰং গতো.

ৰাজা মহানাগৱৰো যসস্সি,

কত্ৱাপি ৰজ্জং মতিমা সুসদ্ধো;

মানেত্ৱ সঙ্ঘং চতুপচ্চযেহি,

অগা অসোকো ৱৰদেৱলোকং;

তস্স পুত্তো যটালতিস্সকুমাৰো পিতু অচ্চযেন পিতৰা ৱুত্তনিযামেনেৱ ধাতুযা মহন্তং পূজং কাৰেসি. সো’পি দিৱসস্স তযো ৱাৰে ধাতুপট্ঠানং কৰোন্তো ৰজ্জং কাৰেত্ৱা চিৰং ৱিহাসি. ইমিনা’পি পতিট্ঠাপিতৱিহাৰা কথেতব্বা; ধম্মসালৱিহাৰং মহাধম্মসালৱিহাৰং সেলাভযৱিহাৰন্তি এৱমাদযো |ও০.০০৩১| পতিট্ঠাপেত্ৱা-তিপিটকমহাঅৰিট্ঠত্থেৰস্স সদ্ধিৱিহাৰিকো তিপিটকমহাঅভযত্থেৰো উপৰাজস্স মহানাগস্স অয্যকো. তস্স থেৰস্স দক্খিণোদকং অদাসি. সো’পি ৰাজা যাৱজীৱং ধাতুং পৰিহৰিত্ৱা পচ্ছিমে কালে মৰণমঞ্চে নিপন্নো অত্তনো পুত্তং গোঠাভযকুমাৰং পক্কোসাপেত্ৱা’ধাতুযা মহন্তং পূজং কৰোন্তো অপ্পমত্তো হোহী’তি ৱত্ৱা ধাতুৱংসং কথেত্ৱা কালং কত্ৱা সগ্গে নিব্বত্তি.

যট্ঠালকো নাম মহামহীপতি,

মহাজনস্সত্থকৰো গুণালযো;

সো ধাতুপূজং ৱিপুলং অনেকধা,

কত্ৱা গতো দেৱপুৰং অনিন্দিতো.

তস্স পুত্তো গোঠাভযকুমাৰো পিতু অচ্চযেন পিতৰা ৱুত্তনিযামেনেৱ ধাতুযা মহন্তং পূজং কত্ৱা গোঠাভয মহাৰাজা হুত্ৱা ৰজ্জং কৰোন্তো কাচৰগামে দসভাতিকে ৰাজানো ঘাতেত্ৱা দণ্ডকম্মত্থায গোঠাভযমহাথেৰস্স হত্থোট্ঠজনপদে ৱসন্তস্স মত্তিকলেনৱিহাৰং খীৰসাল ৱিহাৰং নাগমহাৱিহাৰং কুম্ভসেলৱিহাৰং চেতিযপব্বতৱিহাৰং সানুপব্বতৱিহাৰং কণিকাৰ সেলৱিহাৰং অম্বসেল ৱিহাৰং তিন্দুকলেন ৱিহাৰং কৰণ্ডকৱিহাৰং গোধসালৱিহাৰং ৱালুকতিত্থৱিহাৰন্তি এৱমাদযো গঙ্গায পৰতীৰে পঞ্চসতৱিহাৰে ওৰিমতীৰে পঞ্চসতৱিহাৰে চা’তি ৱিহাৰসহস্সং কাৰেত্ৱা অত্তনো সদিসনামস্স গোঠাভযত্থেৰস্স দক্খিণোদকং দত্ৱা অদাসি. সো যাৱজীৱং ধাতুপূজং কত্ৱা পচ্ছিমে কালে মৰণমঞ্চে নিপন্নো অত্তনো পুত্তং কাকৱণ্ণতিস্স কুমাৰং পক্কোসাপেত্ৱা আলিঙ্গিত্ৱা;’তাত তিস্স, অযং নলাটধাতু অম্হাকং পৰম্পৰায আগতা. ত্ৱং কিৰ ধাতুং গহেত্ৱা মহাগঙ্গায পস্সে সেৰু নাম দহস্স অন্তে ৱৰাহ নাম সোণ্ডিযা মত্থকে পতিট্ঠাপেত্ৱা সঙ্ঘাৰামং কাৰাপেস্সসী’তি সত্থা জীৱমানো ৱ্যাকৰণমকাসি. তস্মা ত্ৱং ইমং ধাতুং গহেত্ৱা মমচ্চযেন তস্মিং ঠানে পতিট্ঠাপেহী’তি পুত্তং অনুসাসিত্ৱা কালকিৰিযং কত্ৱা সগ্গে নিব্বত্তি.

গোঠাভযো |ও০.০০৩২| নাম মহীপতিস্সৰো,

মহাজনে তোসযি অপ্পমত্তো;

সো ধাতুপূজং ৱিপুলং কৰিত্ৱা,

অগা অসোকো ৱৰদেৱলোকং.

মহানন্দো মহাপঞ্ঞো চন্দগুত্তো বহুস্সুতো;

ভদ্দসেনো মহাথেৰো ভদ্দধম্মে ৱিসাৰদো.

জযসেনো চ সো ৱীৰো থেৰো সো সঙ্ঘৰক্খিতো;

দেৱত্থেৰো চ মেধাৱী ৰক্খকা ধাতু ভদ্দকা.

উপৰাজা মহানাগো যট্ঠালকো মহাবলো;

গোঠাভযো মহাপুঞ্ঞো কাকৱণ্ণো চ ৱীৰিযৱা.

এতে থেৰা চ ৰাজানো পুঞ্ঞৱন্তো সুমানসা;

ধাতু পৰম্পৰানীতা ধাতা ধাতুসুকোৱিদা.

কস্সপাদীনথেৰানং পৰম্পৰাযমাগতা;

মহানাগাদি হত্থতো যাৱ তিস্সমুপাগতা.

ইতি অৰিযজনপ্পসাদনত্থায কতে ধাতুৱংসে

ধাতুপৰম্পৰা কথা নাম

ততিযো পৰিচ্ছেদো.