২. |ও০.০০১১| পৰিনিব্বানকথা

সত্থা পন ততো পঞ্চচত্তালীসৱস্সানি তিপিটকপৰিযত্তিধম্মং দেসেত্ৱা ৱেনেয্যজনে সংসাৰতো চতুঅৰিযমগ্গফলপটিলাভৱসেন উদ্ধাৰেত্ৱা নিব্বানে পতিট্ঠাপেত্ৱা পচ্ছিমে কালে ৱেসালিনগৰং উপনিস্সায চাপালচেতিযং নিস্সায ৱিহৰন্তো মাৰেন পৰিনিব্বানত্থায আৰাধিতো সতো সম্পজানো আযুসঙ্খাৰে ৱিস্সজ্জেসি. তস্স ৱিস্সট্ঠভাৱং আনন্দোযেৱ অঞ্ঞাসি. অঞ্ঞো কোচিপি জানন্তো নাম নত্থি. তস্মা ভিক্খুসঙ্ঘম্পি জানাপেস্সামীতি জেতৱনমহাৱিহাৰং গন্ত্ৱা সব্বং ভিক্খুসঙ্ঘং সন্নিপাতাপেত্ৱা ভিক্খৱে তথাগতস্স ন চিৰস্সেৱ তিণ্ণং মাসানং অচ্চযেন পৰিনিব্বানং ভৱিস্সতি, তুম্হে সত্ততিংসবোধি পক্খিযধম্মেসু সমগ্গা হুত্ৱা একীভাৱা হোথ, তুম্হে ৱিৱাদং মা কৰোথ. অপ্পমাদেন তিস্সো সিক্খা সম্পাদেথাতি ৱত্ৱা পুন দিৱসে ৱেসালিযং পিণ্ডায চৰিত্ৱা পিণ্ডপাতা পটিক্কমিত্ৱা ভণ্ডগামং গতো. ভণ্ডগামতো হত্থিগামং হত্থিগামতো অম্বগামং অম্বগামতো জম্বুগামং জম্বুগামতো নিগ্ৰোধগামং নিগ্ৰোধগামতো ভোগনগৰং ভোগনগৰতো পাৱানগৰং পাৱানগৰতো কুসিনাৰানগৰং পত্তো. তত্থ যমকসালানমন্তৰে ঠীতো আনন্দত্থেৰং আমন্তেত্ৱা উন্তৰসীসকং কত্ৱা মঞ্চকং পঞ্ঞাপেহি কিলন্তোস্মি আনন্দ নিপজ্জিস্সামি’তি আহ. তং সুত্ৱা আনন্দত্থেৰো উত্তৰসীসকং কত্ৱা মঞ্চকং পঞ্ঞাপেত্ৱা চতুগ্গুণং সঙ্ঘাটিং অত্থৰিত্ৱা পঞ্চচত্তালীসৱস্সানি অসযিতবুদ্ধসেয্যং সযন্তো দক্খিণপস্সেন সতো সম্পজানো অনুট্ঠানসঞ্ঞং মনসিকৰিত্ৱা সীহসেয্যং কপ্পেসি.

অতীতমদ্ধান ভৱে চৰন্তো,

অনন্তসত্তে কৰুণাযুপেতো;

কত্ৱান পুঞ্ঞানি অনপ্পকানি,

পত্তো সিৱং লোকহিতায নাথো.

এৱং |ও০.০০১২| হি সো দসবলোপি ৱিহীনথামো,

যমস্স সালান নিপজ্জি মজ্ঝে;

কত্ৱান সঞ্ঞঞ্হি অনুট্ঠহানং,

স ইদ্ধিমা মাৰমুখং পৱিট্ঠো.

তস্মিং খণে সমকসালা সুপুপ্ফিতা অহেসুং. ন কেৱলং যমকসালাযেৱ সুপুপ্ফীতা, অথ খো দসসহস্সী লোকধাতু চক্কৱাড়েসু সালৰুক্খাপি পুপ্ফিতা. ন সালৰুক্খাযেৱ সুপুপ্ফিতা, অথ খো যং কিঞ্চি পুপ্ফুপগফলূপগ ৰুক্খজাতং সব্বম্পি পুপ্ফঞ্চ ফলঞ্চ গণ্হি. জলেসু জলপদুমানি থলেসু থলপদুমানি খন্ধেসু খন্ধপদুমানি সাখাসু সাখাপদুমানি লতাসু লতাপদুমানি আকাসে ওলম্বপদুমানি পিট্ঠিপাসাণে হিন্দিত্ৱা সতপত্তপদুমানি সুপুপ্ফিতানি অহেসুং. পথৱিতো যাৱ ব্ৰহ্মলোকো তাৱ দসসহস্সি চক্কৱাড়া একমালাগুণা ৱিয অহেসুং. দেৱা আকাসতো দিব্বমন্দাৰৱপাৰিচ্ছত্তককোৱিড়াৰপুপ্ফানি চ চন্দনচুণ্ণানি চ সমাকিৰন্তি. দিব্বতুৰিযসঙ্গিতিযো চ অন্তলিক্খে পৱত্তন্তি. অনেকানি অচ্ছৰিযসহস্সানি অহেসুং. এৱং পূজাৱিসেসে পৱত্তমানে পঠমযামে সুভদ্দপৰিব্বাজকং ৱিনেত্ৱা মজ্ঝিমযামে দসসহস্সি লোকধাতু দেৱতানং অনুসাসিত্ৱা পচ্ছিমযামাৱসানে পঠমজ্ঝানং সমাপজ্জিত্ৱা ততো ৱুট্ঠায দুতিযজ্ঝানং চতুত্থজ্ঝানং সমাপজ্জি. ততো ৱুট্ঠায আকাসানঞ্চাযতনং ৱিঞ্ঞাণঞ্চাযতনং আকিঞ্চঞ্ঞাযতনং নেৱসঞ্ঞানাসঞ্ঞাযতনং সমাপজ্জিত্ৱা ততো ৱুট্ঠায নিৰোধসমাপত্তিং সমাপজ্জি. ততো ৱুট্ঠায পঠমজ্ঝানং দুতিযজ্ঝানং ততিযজ্ঝানং চতুত্থজ্ঝানঞ্চ সমাপজ্জি. ততো ৱুট্ঠায এত্থন্তৰতো অনুপাদিসেসনিব্বানধাতুযা পৰিনিব্বাযি.

মহামোহতমং হন্ত্ৱা সত্তানং হদযস্সিতং,

ৰৱীৱ জোতমানো সো লোকস্স অনুকম্পকো;

ৱস্সানি |ও০.০০১৩| পঞ্চতালীসং কত্ৱা সত্তহিতং বহুং,

অধুনা অগ্গিক্খন্ধোৱ পৰিনিব্বাযি সো জিনো.

এৱং পন ভগৱতি পৰিনিব্বুতে ৱিস্সকম্মদেৱপুত্তো তথাগতস্স সৰীৰপ্পমাণং ৱৰদোণিং ৰতনেহি মাপেত্ৱা ৱিসুদ্ধকপ্পাসেহি তথাগতস্স সৰীৰং ৱেঠেত্ৱা ৰতনদোণিযং পক্খিপিত্ৱা গন্ধতেলেহি পূৰেত্ৱা অপৰায দোণিযা পিদহিত্ৱা সব্বগন্ধদাৰুচিতকং কত্ৱা যেভুয্যেন দেৱতাযো লোহিতচন্দনঘটিকাযো আদায চিতকাযং পক্খিপিত্ৱা অগ্গিং গাহাপেতুং নাসক্খিংসু. কস্মা? মহাকস্সপত্থেৰস্স অনাগতত্তা. সো আযস্মা মহাকস্সপত্থেৰো যেভুয্যেন বহুন্নং দেৱানং পিযো মনাপো. থেৰস্স হি দানং দত্ৱা সগ্গে নিব্বত্তানং পমাণো নাম নত্থি. তস্মা দেৱতা তস্মিং সমাগমে অত্তনো কুলূপগত্থেৰং অদিস্ৱা অম্হাকং মহাকস্সপত্থেৰো কুহিন্তি ওলোকেন্তো অত্তনো পৰিৱাৰেহি পঞ্চমত্তেহি ভিক্খুসতেহি সদ্ধিং মগ্গং পটিপন্নোতি ঞত্ৱা যাৱ থেৰো ইমস্মিং ন সম্পত্তো চিতকং তাৱ ন পজ্জলতুতি অধিট্ঠহিংসু. তস্মিং কালে থেৰো যেভুয্যেন তেৰসধুতঙ্গধৰেহি পঞ্চমত্তেহি ভিক্খুসতেহি সদ্ধিং আগন্ত্ৱা চিতকং তিক্খত্তুং পদক্খিণং কত্ৱা পাদপস্সে ঠীতো, ভন্তে তুম্হাকং দস্সনত্থায ইতো কপ্পসতসহস্সমত্থকে পদুমুত্তৰসত্থুনো পাদমুলে অভিনীহাৰতো পট্ঠায অৱিজহিত্ৱা আগতো. ইদানি মে অৱসানদস্সনন্তি পাদে গহেত্ৱা ৱন্দিতুং অধিট্ঠাসি.

মহাকস্সপথেৰো সো ভিক্খুসঙ্ঘপুৰক্খতো;

একংসং চীৱৰং কত্ৱা পগ্গহেত্ৱান অঞ্জলিং.

পদক্খিণঞ্চ তিক্খত্তুং কত্ৱা ঠত্ৱা পদন্তিকে;

পতিট্ঠহন্তু সীসে মে জিনপাদেতি’ধিট্ঠহি.

সহাধিট্ঠানং চিতকা দুস্সানি চ ৱিভিন্দিয;

নিক্খমিংসু তদা পাদা ঘনমুত্তোৱ চন্দিমা.

উহো হত্থেহি পগ্গয্হ ঠপেত্ৱা অত্তনো সিৰে;

ৱন্দিত্ৱা সত্থুনো পাদে খমাপেত্ৱা ৱিসজ্জযী.

পুণ্ণচন্দো যথা অব্ভং চিতকং পাৱিসি তদা;

ইদং অচ্ছেৰকং দিস্ৱা ৰৱং ৰৱি মহাজনো.

উট্ঠহিত্ৱান পাচীনা ৱন্দো অত্থঙ্গতো যথা;

পাদে অন্তৰধাযন্তে অৰোদিংসু মহাজনা.

তদা মল্লৰাজানো ভগৱতো সৰীৰকিচ্চং কৰিস্সামাতি ৱত্ৱা নানাৱত্থাভৰণানি নিৱাসেত্ৱা পৰিৱাৰযিংসু. ততো ৰাজানো মনুস্সা চ অগ্গিং দাতুং আৰহিংসু. তদা সক্কো? মযি পন পৰিনিব্বুতে সক্কো দেৱৰাজা মণিজোতিৰসং পসাৰেত্ৱা নিক্খন্তঅগ্গিনা মম সৰীৰকিচ্চং কৰিস্সতি. মণিঅগ্গিনো অৱসানে মনুস্সা অগ্গিং কৰিস্সন্তিতি. এৱং বুদ্ধৱচনং পৰিভাৱেত্ৱা নিক্খত্তুং পদক্খিণং কত্ৱা ভগৱতো সৰীৰকিচ্চং কত্ৱা সমন্ততো উট্ঠহতুতি অধিট্ঠহি.

তস্মিং খণে সযমেৱ চিতকং অগ্গি গণ্হি. সৰীৰং পন ভগৱতো ঝাযামানং ছৱিচম্মমংসনহাৰুঅট্ঠিঅট্ঠিমিঞ্জং অসেসেত্ৱা সুমনমকুড়মুত্তাৰাসিসদিসমেৱ ধাতুযো অৱসেসা অহেসুং.

পৰিনিব্বুতকালেপি সকলং কলুনং অহু;

পৰিদেৱো মহা আসি মহী উদ্ৰিযনং যথা.

দেৱতাযানুভাৱেন সত্থুনো চিতকো সযং;

ততো একপ্পহাৰেন পজ্জলিত্থ সমন্ততো.

যঞ্চ অব্ভন্তৰং দুস্সং যং দুস্সং সব্ববাহিৰং

দুস্সে দ্ৱেৱ ন ঝাযিংসু তেসং দুস্সানমন্তৰে;

যথা নিৰুদ্ধতেলস্স ন মসী ন চ ছাৰিকা;

এৱমস্স ন দিস্সতি বুদ্ধগত্তস্স ঝাযতো.

সুমনমকুড়সভাৱা চ ধোতমুত্তাভমেৱ চ;

সুৱণ্ণৱণ্ণসংকাসা অৱসিস্সংসু ধাতুযো.

দাঠা চতস্সো উণ্হীসং অক্খকা দ্ৱে চ সত্তিমা;

ন ৱিকিণ্ণা ততো সেসা ৱিপ্পকিণ্ণাৱ ধাতুযো.

অহোসি তনুকা ধাতু সাসপবীজমত্তিকা;

ধাতুযো মজ্ঝিমা মজ্ঝেভিন্নতণ্ডুলমত্তিকা.

ধাতুযো |ও০.০০১৫| মহতি মজ্ঝে ভিন্নমুগ্গপ্পমাণিকা;

ধাতুৱণ্ণা তযো আসুং বুদ্ধাধিট্ঠানতেজসা.

সাৰিপুত্তস্স থেৰস্স সিস্সো সৰভুনামকো;

আদায জিনগীৱট্ঠিং চিতকাতোৱ ধাতু সো.

সদ্ধিং সিস্সসহস্সেন চেতিযে মহিযঙ্গণে;

ঠপেত্ৱা চেতিযং কত্ৱা কুসিনাৰমগা মুনি.

ছড়ভিঞ্ঞো ৱসিপ্পত্তো খেমো কাৰুণিকো মুনি;

সহসা চিতকাতোৱ ৱামদাঠং সমগ্গহী.

আকাসতো পতিত্ৱাপি নিক্খমিত্ৱাপি সালতো;

সমন্ততোম্বুমুগ্গন্ত্ৱা নিব্বাপেসুং জলানলং.

মল্লৰাজগণা সব্বে সব্বগন্ধোদকেন তং;

চিতকং লোকনাথস্স নিব্বাপেসুং মহেসিনো.

এৱং পন সব্বলোকে কৰুণাধিকো সম্মাসম্বুদ্ধো ৱেসাখপুণ্ণমুপোসথে অঙ্গাৰদিৱসে পৰিনিব্বুতো. দেৱমনুস্সানং সঙ্গহকৰণত্থায যমকসালানমন্তৰে চিতকং সত্তৰত্তিন্দিৱং ৱসী. ততো ৱীসং হত্থসতিকস্স উপৰি সত্তৰত্তিন্দিৱং ৱসি. যাৱ অগ্গিপৰিনিব্বাপনং সত্তৰত্তিন্দিৱং হোতি.

ততো সত্তদিৱসানি কুসিনাৰাযং মল্লৰাজপুত্তেসু গন্ধোদকেন চিতকং নিব্বাপযমানেসু সালৰুক্খতো উদকধাৰা নিক্খমিত্ৱা চিতকং নিব্বাপযিংসু. ততো দসবলস্স ধাতুযো সুৱণ্ণচঙ্গোটকে পক্খিপিত্ৱা অত্তনো নগৰে সন্থাগাৰে ঠপেত্ৱা সত্তিপঞ্জৰং কত্ৱা ধনুপাকাৰেহি পৰিক্খিপাপেত্ৱা সত্তাহং নচ্চগীতৱাদিতগন্ধমালাদীহি মল্লৰাজপুত্তা সক্কাৰং কৰিংসু.

ততো তে মল্লৰাজানো ৰম্মং দেৱসভোপমং;

সব্বথা মণ্ডুযিত্ৱান সন্থাগাৰং ততো পন.

মগ্গং |ও০.০০১৬| অলঙ্কৰিত্ৱান যাৱ মকুটচেতিযা;

হত্থীক্খন্ধে ঠপেত্ৱান হেমদোণিং সধাতুকং.

গন্ধাদীহিপি পূজেত্ৱা কীড়ন্তা সাধুকীড়িতং;

পৱেসেত্ৱান নগৰং সন্থাগাৰে মনোৰমে.

দসভূমস্মিং পল্লঙ্কে ঠপেত্ৱা জিনধাতুযো;

উস্সযুং তে তদা ছত্তে সন্থাগাৰসমন্ততো.

হত্থীহি পৰিক্খিপাপেসুং ততো অস্সে ততো ৰথে,

অঞ্ঞো’ঞ্ঞং পৰিৱাৰেত্ৱা ততো যোধে ততো ধনু;

ইতি পৰিক্খিপাপেসুং সমন্তা যোজনং কমা,

তদা নচ্চেহি গীতেহি ৱাদিতেহি চ পূজযুং.)

পৰিনিব্বানকথা সমত্তা.

ততো ভগৱতো পৰিনিব্বুতভাৱং সুত্ৱা অজাতসত্তু মহাৰাজা কোসিনাৰকানং মল্লানং সাসনং পেসেসি. অহম্পি খত্তিযো ভগৱাপি খত্তিযো সত্থুনো সৰীৰধাতুনং থূপঞ্চ মহঞ্চ কৰোমীতি. তেনেৱ উপাযেন ৱেসালিযং লিচ্ছৱিৰাজানো চ কপিলৱত্থুম্হি সক্যৰাজানো চ অল্লকপ্পকে বুলযো চ ৰামগামকে কোড়িযা চ ৱেঠদীপকে ব্ৰাহ্মণো চ পাৱাযং পাৱেয্যকা চ সাসনং পেসেত্ৱা সব্বে একতো হুত্ৱা কোসিনাৰকেহি সদ্ধিং ৱিৱাদং উপ্পাদেসুং. তেসং পন আচৰিযো দ্ৰোণব্ৰাহ্মণো নাম. সো তেসং? মা ভোন্তো ৱিগ্গহৱিৱাদং কৰোথ, অম্হাকং ভগৱা খন্তিৱাদীযেৱাতি ৱত্ৱা তাদিসস্স চ খন্তিমেত্তানুদ্দযসম্পন্নস্স সৰীৰভাগে কলহং কাতুং অযুত্তন্তি আহ.

(ৰাজা অজাতসত্তু চ লিচ্ছৱী চ নৰাধিপা;

সক্যা চ অল্লকপ্পা চ কোড়িযাপি চ ৰামকে.

ব্ৰাহ্মণো ৱেঠদীপো চ মল্লপাৱেয্যকাপি চ;

মল্লা চ ধাতু অত্থায অঞ্ঞমঞ্ঞং ৱিৱাদযুং.

এৱং |ও০.০০১৭| সন্তে তদা দোণো ব্ৰাহ্মণো এতদব্ৰৱী;

সুণন্তু ভোন্তো মে ৱাচং হিতমত্থুপসংহিতং.

খন্তিৱাদী ইসিকালে ধম্মপালকুমাৰকে;

ছদ্দন্তে ভুৰিদত্তে চ চম্পেয্যে সঙ্খপালকে.

মহাকপিজাতকালে অম্হাকং লোকনাযকো;

কোপং অকত্ৱা অঞ্ঞেসু খন্তিমেৱ অকা জিনো.

সিট্ঠাসিট্ঠে সুখে দুক্খে লাভালাভে যসাযসে;

তাদী লক্খণসম্পন্নো খন্তিৱাদেসু কা কথা.

এৱং ভৱতং ৱিৱাদে সম্পহাৰো ন সাধুকো;

সব্বেৱ সহিতা হোথ সমগ্গা মোদমানকা.

তথাগতস্স সাৰীৰং অট্ঠভাগং কৰোমসে;

থূপা ৱিত্থাৰিতা হোন্তু পসন্না হি বহুজ্জনা.

তেন হি ৱিভজেহি ত্ৱং অট্ঠভাগন্তু ব্ৰাহ্মণ;

থূপা ৱিত্থাৰিতা হোন্তু পসন্না হি বহুজ্জনা.

এৱং ৱুত্তে তদা দোণো ব্ৰাহ্মণো গণজেট্ঠকো;

সুৱণ্ণং নাড়িং কত্ৱান সমং ভাজেসি ৰাজুনং.

সোড়সনাড়িযো আসুং সব্বা তা সেসধাতুযো;

একেকপুৰৱাসীনং দ্ৱে দ্ৱে দোণো অদা তদা.

ধাতুযো চ গহেত্ৱান হট্ঠতুট্ঠা নৰাধিপা;

গন্ত্ৱা সকে সকে ৰট্ঠে চেতিযানি অকাৰযুং.

দোণো তুম্বং গহেত্ৱান কাৰেসি তুম্বচেতিযং;

অঙ্গাৰথূপং কাৰেসুং মোৰিযা হট্ঠমানসা.

একা দাঠা তিদসপুৰে একা নাগপুৰে অহু;

একা গন্ধাৰৱিসযে একা কালিঙ্গৰাজিনো.)

তত্থ |ও০.০০১৮| দোণোতি? তদা গণাচৰিযো. সো ধাতুযো ৱিভজন্তো একং দক্খিণদাঠাধাতুং গহেত্ৱা ৱেঠন্তৰে ঠপেসি. তদা সক্কো অজ্জ দক্খিণদাঠাধাতুং কো লভতীতি চিন্তেত্ৱা ৱেঠন্তৰে পস্সি. সো ৰতনচঙ্গোটকং গহেত্ৱা অদিস্সমানকাযেন গন্ত্ৱা ধাতুং গহেত্ৱা তাৱতিংসভৱনে চূড়ামণিচেতিয একযোজনুব্বেধংযেৱ মহন্তং থূপং কত্ৱা ঠপেসি. একং দক্খিণদঠাধাতুং পাদগ্গন্তৰে অক্কমিত্ৱা গণ্হি. এত্তাৱতা তাৱতিংসভৱনদন্তধাতুকথা পৰিপুণ্ণা ৱেদিতব্বা.

তদা জযসেনো নাম নাগৰাজা ভগৱতো পৰিনিব্বুতভাৱং সুত্ৱা অজ্জ পচ্ছিমদস্সনং পস্সিস্সামীতি মহন্তং নাগৰাজসম্পত্তিং গহেত্ৱা কুসিনাৰং গন্ত্ৱা মহাপূজং কত্ৱা একমন্তং ঠত্ৱা পাদগ্গন্তৰে ঠিতং ধাতুং দিস্ৱা নাগেদ্ধিবলেন গহেত্ৱা নাগভৱনং নেত্ৱা নাগপুৰস্স মজ্ঝে ৰতনখচিতে চেতিযে ঠপেসি. তং তম্বপণ্ণিযং কাকৱণ্ণতিস্সৰাজকালে মহাদেৱত্থেৰস্স সিস্সো মহিন্দত্থেৰো নাম নাগভৱনং গন্ত্ৱা দক্খিণদাঠং গহেত্ৱা তম্বপণ্ণিযং সেৰুনগৰং হৰিত্ৱা গিৰিঅভযস্স সেৰুনগৰপব্বতন্তৰে চেতিযং কাৰাপেত্ৱা ঠপেসি.

এত্তাৱতা নাগভৱনদন্তধাতুকথা পৰিপুণ্ণা ৱেদিতব্বা.

তত্ৰাযং গন্ধাৰৱাসিনোতি? একা ৱামদাঠা দোণো নাম আচৰিযো নিৱত্থ ৱত্থন্তৰে ঠপেত্ৱা গণ্হি. তদা একো গন্ধাৰৱাসী পুব্বে লদ্ধব্যাকৰণো কতাভিনীহাৰো ৱত্থন্তৰে ঠতপিদন্তধাতুং দিস্ৱা কুসলচিত্তেন ততো দন্তধাতুং গহেত্ৱা গন্ধাৰৱাসিকেহি সদ্ধিং অত্তনো ৰট্ঠং গন্ত্ৱা চেতিযৱনে ঠপেসি.

এত্তাৱতা ৱামদন্তধাতুকথা পৰিপুণ্ণা ৱেদিতব্বা.

তত্থ অধো ৱামদন্তধাতুং সাৰিপুত্তত্থেৰস্স সিস্সো খেমো নাম মুনি জালচিতকতোৱ উপ্পতিত্ৱা ৱামদাঠং গহেত্ৱা কালিঙ্গপুৰং নেত্ৱা ব্ৰহ্মদত্তস্স ৰঞ্ঞো সমীপং গন্ত্ৱা |ও০.০০১৯| দন্তধাতুং দস্সেত্ৱা? মহাৰাজ ৱামদন্তধাতুং ভগৱা তমেৱ ইমস্মিং জম্বুদীপে যাৱ গুহসীৱপৰম্পৰা দেৱমনুস্সানং অত্থং কৰিত্ৱা পৰিযোসানে গুহসীৱৰঞ্ঞো পাহেস্সতীতি (নীযাদেতুং) আহাতি নীয্যাদেসি.

অপৰভাগে হেমমালা ৰাজকঞ্ঞা দন্তকুমাৰেন সদ্ধিং ব্ৰাহ্মণৱেসং গহেত্ৱা দন্তধাতুং আদায পলাযিত্ৱা ৱাণিজে আৰোচেত্ৱা নাৱা ৱেগেন গন্ত্ৱা চেৱ নাগসুপণ্ণেহি মহন্তং পূজং কাৰেত্ৱা অনুক্কমেনাগন্ত্ৱা জম্বুকোড়পট্টনং পত্ৱা দিজৱৰস্স আচিক্খিতমগ্গেন অনুৰাধপুৰং পত্ৱা কিত্তিস্সিৰিমেঘস্স পৱত্তিং পুচ্ছিত্ৱা নৱৱস্সআযুসমানো তীসু সৰণেসু পসন্নভাৱং সুত্ৱা মেঘগিৰি মহাথেৰস্স সন্তিকং গন্ত্ৱা ৱন্দিত্ৱা একমন্তং নিসীদিত্ৱা দন্তধাতুং জম্বুদীপতো গহেত্ৱা আগতভাৱং আৰোচেত্ৱা দস্সেসি. দিস্ৱা চ পন পীতিযা ফুটো উভিন্নম্পি সঙ্গহং কত্ৱা মহাৱিহাৰং অলঙ্কাৰেত্ৱা জিনদন্তধাতুং ঠপেত্ৱা একং ভিক্খুং পেসেত্ৱা তং পৱত্তিং ৰঞ্ঞো আৰোচাপেসি. তং সুত্ৱা ৰাজা পীতিপামোজ্জো চক্কৱত্তিস্স সিৰিসম্পত্তো দড়িদ্দো ৱিয তস্স পাটিহাৰিযং দিস্ৱা ৱীমংসিত্ৱা নিক্কঙ্খো হুত্ৱা সকললঙ্কাদীপেন পূজেসি. এতেন নযেন পূজং কত্ৱা একদিৱসেনেৱ নৱলক্খং পূজেসি.

সীহড়িন্দো উভিন্নম্পি বহূনি ৰতনানি চ;

গামে চ ইস্সৰে চেৱ দত্ৱান সঙ্গহং অকা.

এত্তাৱতা অধোদাঠাধাতুকথা পৰিপুণ্ণা ৱেদিতব্বা.

চত্তালীস সমা দন্তা কেসা লোমা চ সব্বসো দেৱা হৰিংসু একেকং চক্কৱাড়পৰম্পৰা.

তত্ৰ ৱচনে, চত্তালীস সমা দন্তাতি? সেসদন্তা চ কেসা চ লোমা চ নখা চ সব্বসোপি মযি পৰিনিব্বুত-কালে |ও০.০০২০| মা ডয্হন্তু লুঞ্চিত্ৱা আকাসে পতিট্ঠন্তু একেকচক্কৱাড়ঞ্চ একেককেসলোমনখদন্তধাতুপৰম্পৰা নেত্ৱা চেতিযং কাৰেত্ৱান দেৱমনুস্সানং অত্থং কৰোতুতি অধিট্ঠহি. তস্মা পৰিনিব্বুতকালতো যাৱ সৰীৰং ন ডয্হতি তাৱ ছব্বণ্ণৰস্মিযো লোমধাতু ন পজহতি. দোণব্ৰাহ্মণোপি ধাতুৱিভজনাৱসানে ৱেঠন্তৰে চ নিৱাসনন্তৰে চ পাদগ্গন্তৰে চ ধাতুনং ৱিনট্ঠভাৱং ঞত্ৱা পথৱিযং উত্তানকোযেৱজাতো. তদা সক্কো দেৱৰাজা দিস্ৱা অযং দেণাচৰিযো ধাতু অত্থায অনুপৰিৱত্তেত্ৱা ৱিনাসং পাপুণেয্য অহং ৱীণাচৰিযৱেসং গহেত্ৱা তস্স সন্তিকং গন্ত্ৱা সোকং ৱিনোদেস্সামীতি সক্কৰূপং জহিত্ৱা ৱীণাচৰিযৱেসং গহেত্ৱা তস্স সন্তিকং গন্ত্ৱা একমন্তং ঠিতো দিব্বগীতং গাযিত্ৱা ৱীণং ৱাদেন্তো নানপ্পকাৰং উদানেসি. যং ধম্মমেতং পুৰিসস্স ৱাদং ছিন্দিস্সামীতি ৱত্ৱা কথায সোতুনং লোভং পৰস্স অত্থং ৱিনাসেত্ৱা অতিলোভেন পুৰিসো পাপকো হোতীতি. হংসৰাজজাতকং দীপেত্ৱা যং লদ্ধং তং সুলদ্ধন্তি আহ. তং সুত্ৱা দোণো অযং ৱীণাচৰিযো ময্হং থেনভাৱং অঞ্ঞাসীতি সোকং ৱিনোদেত্ৱা উট্ঠায আৱজ্জমানো তুম্বং দিস্ৱা যেন ভগৱতো সৰীৰধাতুযো মিতা সোপি ধাতুগতিকোৱ. ইদং থূপং কৰিস্সামীতি চিন্তেত্ৱা তুম্বং গহেত্ৱান চেতিযে ঠপেসি. মোৰিযা অঙ্গাৰং গহেত্ৱা অঙ্গাৰচেতিযং নাম কাৰেসুং.

(নগৰে কপিলৱত্থুম্হি সম্মাদিট্ঠি বহুজ্জনো;

তত্থ সাৰীৰিকং থূপং অকাসি ৰতনামযং.

নগৰে |ও০.০০২১| অল্লকে ৰম্মে বুদ্ধধাতু পতিট্ঠিয;

সিলায মুগ্গৱণ্ণায থূপং সধাতুকং অকা.

জনো পাৱেয্যৰট্ঠস্মিং পতিট্ঠিয সাৰীৰিকং;

সিলায মণিৱণ্ণায পাৱেয্যং চেতিযং অকা.

চীৱৰং পত্তদণ্ডঞ্চ মধুৰাযং অপূজযুং;

নিৱাসনং কুসঘৰে পূজযিংসু মহাজনা.

পচ্চত্থৰণং কপিলে উণ্ণলোমঞ্চ কোসলে;

পূজেসুং পাটলিপুত্তে কৰকং কাযবন্ধনং.

নিসীদনং অৱন্তিসু চম্পাযং’দকসাটকং;

দেৱৰট্ঠে অত্থৰণং ৱিদেহে পৰিস্সাৱনং.

ৱাসি-সূচিঘৰঞ্চাপি ইন্দপত্থে অপূজযুং;

পাসাণকে পদং সেট্ঠং ভণ্ডসেসং পৰন্তকে.

মহিংসু মনুজা ধাতুং অট্ঠদোণমিতং তদা;

ধাতু ৱিত্থাৰিতা আসি লোকনাথস্স সত্থুনো).

তে পন ৰাজানো হি অত্তনোলদ্ধধাতুং গহেত্ৱা সকসকনগৰং গন্ত্ৱা চেতিযং কাৰাপেত্ৱা মহন্তং পূজাৱিধানং কৰিংসু. চক্খুমন্তস্স ভগৱতো সৰীৰধাতু অট্ঠদোণমত্তং সুৱণ্ণনাড়িযা একসতঅট্ঠৱীসতিনাড়িকা অহোসি? সত্থা পন উত্তৰাসাড়্হনক্খত্তেন মাতুকুচ্ছিযং পটিসন্ধিং গণ্হি. ৱিসাখনক্খত্তেন মাতুকুচ্ছিতো নিক্খমি. উত্তৰাসাড়্হনক্খত্তেন মহাভিনিক্খমনং নিক্খমি. ৱিসাখনক্খত্তেন বুদ্ধো অহোসি. উত্তৰাসাড়্হনক্খত্তেন ধম্মচক্কং পৱত্তেসি. তেনেৱ যমকপাটিহাৰিযং অকাসি. অস্সযুজনক্খত্তেন দেৱোৰোহণং অকাসি. ৱিসাখনক্খত্তেন পৰিনিব্বাযি. মহাকস্সপত্থেৰা চ অনুৰুদ্ধত্থেৰো চ দ্ৱে মহাথেৰা ভগৱতো সৰীৰধাতুযো ৱিস্সজ্জাপেত্ৱা অদংসু.

তেসং |ও০.০০২২| ৰাজুনং ভগৱতো সৰীৰধাতুং লভিত্ৱা সত্তদিৱসসত্তমাসাধিকানি সত্তৱস্সানি মহাৰহং পূজং কত্ৱা গতকালে মিচ্ছাদিট্ঠিকমনুস্সা? সমণো গোতমো পৰিনিব্বুতো. তস্স ধাতু অত্থায অম্হাকং জীৱিতকপ্পনং নাসেত্ৱা পূজং কৰোতী’তি সম্মাসম্বুদ্ধে পদুস্সন্তি. সক্কো আৱজ্জেন্তো তং কাৰণং ঞত্ৱা মহাকস্সপত্থেৰস্স আৰোচেসি;’ভন্তে মিচ্ছাদিট্ঠিকা মনুস্সা ভগৱতি পদুট্ঠচিত্তেন ইতো চুতা অৱীচিনিৰযং উপ্পজ্জন্তি. বহুতৰা অনাগতে মিচ্ছাদিট্ঠিকা মাতুপিতুঘাতকা ৰাজানো ভৱিস্সন্তি. অজ্জেৱ ধাতুযো নিদহিতুং ৱট্টতী’তি থেৰো ৱিচাৰেত্ৱা অদ্দস.

অনন্তমত্থং ধৰমানকালে কত্ৱান সত্তানমলীনচিত্তো সেসানমত্থায সৰীৰধাতুং ঠপেত্ৱ সো মচ্চুমুখং উপেতো. (কত্ৱা যো বোধিঞাণং ৱিৱিধবলৱৰং বুজ্ঝিতুং পাৰমীযো ৱত্ৱা সঙ্খেয্যপুণ্ণে অপৰিমিতভৱে উত্তৰিত্ৱা সুমুত্তং. আৰোহিত্ৱান সীঘং অৰিযসিৱপদং অচ্চুতং সীতিভাৱং পত্তো সো জাতিপাৰং নিখিলপদহনং দুক্কৰং কাৰযিত্ৱা.

ধাত্ৱন্তৰাযং দিস্ৱান থেৰো কস্সপসৱ্হযো;

নিধানং সব্বধাতুনং কৰোহীত্যাহ ভূপতিং.

সাধূতি সো পটিস্সুত্ৱা মাগধো তুট্ঠমানসো;

ধাতুনিধানং কাৰেসি সব্বত্থ ৱত্তিতাদিয.

কাৰাপেত্ৱান সো ৰাজা কস্সপস্স নিৱেদযী;

ধাতুযো আহৰী থেৰো ইদং কাৰণমদ্দস.

ভুজঙ্গা |ও০.০০২৩| পৰিগণ্হিংসু ৰামগামম্হি ধাতুযো;

চেতিযে ধাৰযিস্সন্তি লঙ্কাদীপে অনাগতে.

তা ধাতুযো ঠপেত্ৱান থেৰো কস্সপসৱ্হযো;

ৰঞ্ঞো অজাতসত্তুস্স অদাসি ধাতুযো তদা.

গেহে চূপকৰণানি চতুসট্ঠিসতানি সো;

অব্ভন্তৰে ঠপেসি ৰাজা সব্বা তা বুদ্ধধাতুযো.

কৰণ্ডাসীতি সংকিণ্ণং চেতিযাসীতিলঙ্কতং;

গেহে বহুসমাকিণ্ণং থূপাৰামপ্পমাণকং.

কাৰেত্ৱা সব্বকৰণং ৱালিকং ওকিৰী তহিং;

নানাপুপ্ফসহস্সানি নানা গন্ধং সমাকিৰি.

অসীতিথেৰৰূপানি অট্ঠচক্কসতানি চ;

সুদ্ধোধনস্স ৰূপম্পি মাযাপজাপতাদিনং.

সব্বানি তানি ৰূপানি সুৱণ্ণস্সেৱ কাৰযি;