৬. অৰঞ্ঞাদিৱগ্গ

৬০৫. পব্বতো গিৰি সেলো’দ্দি, নগা’চল, সিলুচ্চযা;

সিখৰী ভূধৰোথ ব্ভ, পাসাণা’স্মো’পলো সিলা.

৬০৬. গিজ্ঝকূটো চ ৱেভাৰো, ৱেপুল্লো’সিগিলী নগা;

ৱিঞ্ঝো পণ্ডৱ ৱঙ্কাদী, পুব্বসেলো তু চো’দযো;

মন্দৰো পৰসেলো’ত্থো, হিমৱা তু হিমাচলো.

৬০৭. গন্ধমাদন কেলাস, চিত্তকূট সুদস্সনা;

কালকূটো তিকূটা’স্স, পত্থো তু সানু নিত্থিযং.

৬০৮. কূটো ৱা সিখৰং সিঙ্গং, পপাতো তু তটো ভৱে;

নিতম্বো কটকো নিত্থী, নিজ্ঝৰো পসৱো’ম্বুনো.

৬০৯. দৰী’ত্থী কন্দৰো দ্ৱীসু, লেণং তু গব্ভৰং গুহা;

সিলাপোক্খৰণী সোণ্ডী, কুঞ্জং নিকুঞ্জ মিত্থি ন.

৬১০. উদ্ধ মধিচ্চকা সেল, স্সাসন্না ভূম্যু পচ্চকা;

পাদো তু’পন্তসেলো থ,

ধাতু’ত্তো গেৰিকাদিকো.

ইতি সেলৱগ্গো.

৬১১. মিগিন্দো কেসৰী সীহো, তৰচ্ছো তু মিগাদনো;

ব্যগ্ঘো তু পুণ্ডৰীকো থ, সদ্দূলো দীপিনী’ৰিতো.

৬১২. অচ্ছো ইক্কো চ ইস্সো তু,

কাড়সীহো ইসো প্যথ;

ৰোহিসো ৰোহিতো চাথ,

গোকণ্ণো গণি কণ্টকা.

৬১৩. খগ্গ খগ্গৱিসাণা তু, পলাসাদো চ গণ্ডকো;

ব্যগ্ঘাদিকে ৱাড়মিগো, সাপদো থ প্লৱঙ্গমো.

৬১৪. মক্কটো ৱানৰো সাখা, মিগো কপি ৱলীমুখো;

পলৱঙ্গো, কণ্হতুণ্ডো,

গোনঙ্গুলো [গোনঙ্গলো (টী.)] তি সো মতো.

৬১৫. সিঙ্গালো [সিগালো (সী.)] জম্বুকো কোত্থু, ভেৰৱো চ সিৱা প্যথ;

বিড়াৰো বব্বু মঞ্জাৰো, কোকো তু চ ৱকো ভৱে.

৬১৬. মহিংসো [মহিসো (সী.)] চ লুলাযো থ,

গৱজো গৱযো সমা;

সল্লো তু সল্লকো থা’স্স,

লোমম্হি সললং সলং.

৬১৭. হৰিণো মিগ সাৰঙ্গা, মগো অজিনযোনি চ;

সূকৰো তু ৱৰোহো থ,

পেলকো চ সসো ভৱে.

৬১৮. এণেয্যো এণীমিগো চ, পম্পটকো তু পম্পকো;

ৱাতমিগো তু চলনী, মূসিকো ত্ৱা’খু উন্দুৰো.

৬১৯. চমৰো পসদো চেৱ, কুৰুঙ্গো মিগমাতুকা;

ৰুৰু ৰঙ্কু চ নীকো চ, সৰভাদী মিগন্তৰা.

৬২০. পিযকো চমূৰু কদলী, মিগাদী চম্মযোনযো;

মিগা তু পসৱো সীহা, দযো সব্বচতুপ্পদা.

৬২১. লূতা তু লূতিকা উণ্ণ, নাভি মক্কটকো সিযা;

ৱিচ্ছিকো ত্ৱা’ড়ি কথিতো, সৰবূ ঘৰগোড়িকা.

৬২২. গোধা কুণ্ডো প্যথো কণ্ণ, জলূকা সতপদ্যথ;

কলন্দকো কাড়কা থ, নকুলো মঙ্গুসো ভৱে.

৬২৩. ককণ্টকো চ সৰটো, কীটো তু পুড়ৱো কিমি;

পাণকো চাপ্যথো উচ্চা,

লিঙ্গো লোমসপাণকো.

৬২৪. ৱিহঙ্গো ৱিহগো পক্খী, ৱিহঙ্গম খগ’ণ্ডজা;

সকুণো চ সকুন্তো ৱি, পতঙ্গো সকুণী দ্ৱিজো.

৬২৫. ৱক্কঙ্গো পত্তযানো চ, পতন্তো নীড়জো ভৱে;

তব্ভেদা ৱট্টকা জীৱ, ঞ্জীৱো চকোৰ তিত্তিৰা.

৬২৬. সাড়িকা কৰৱীকো চ, ৰৱিহংসো কুকুত্থকো;

কাৰণ্ডৱো চ পিলৱো [বিলৱো (টী.)], পোক্খৰসাতকা’দযো.

৬২৭. পতত্তং পেখুণং পত্তং, পক্খো পিঞ্ছং ছদো গৰু;

অণ্ডং তু পক্খিবীজে থ, নীড়ো নিত্থী কুলাৱকং.

৬২৮. সুপণ্ণমাতা ৱিনতা, মিথুনং থীপুমদ্ৱযং;

যুগং তু যুগলং দ্ৱন্দং, যমকং যমলং যমং.

৬২৯. সমূহো গণ সঙ্ঘাতা, সমুদাযো চ সঞ্চযো;

সন্দোহো নিৱহো ওঘো, ৱিসৰো নিকৰো চযো.

৬৩০. কাযো খন্ধো সমুদযো, ঘটা সমিতি সংহতি;

ৰাসি পুঞ্জো সমৱাযো, পূগো জাতং কদম্বকং.

৬৩১. ব্যূহো ৱিতান গুম্বা চ, কলাপো জাল মণ্ডলং;

সমানানং গণো ৱগ্গো,

সঙ্ঘো সত্থো তু জন্তুনং.

৬৩২. সজাতিকানং তু কুলং, নিকাযো তু সধম্মিনং;

যূথো নিত্থী সজাতিয, তিৰচ্ছানানমুচ্চতে.

৬৩৩. সুপণ্ণো ৱেনতেয্যো চ, গৰুড়ো ৱিহগাধিপো;

পৰপুট্ঠো পৰভতো, কুণালো কোকিলো পিকো.

৬৩৪. মোৰো মযূৰো ৱৰহী, নীলগীৱ সিখণ্ডিনো;

কলাপী চ সিখী কেকী, চূড়া তু চ সিখা ভৱে.

৬৩৫. সিখণ্ডো ৱৰহঞ্চেৱ, কলাপো পিঞ্ছ মপ্যথ;

চন্দকো মেচকো চাথ, ছপ্পদো চ মধুব্বতো.

৬৩৬. মধুলীহো মধুকৰো, মধুপো ভমৰো অলি;

পাৰাৱতো কপোতো চ, ককুটো চ পাৰেৱতো.

৬৩৭. গিজ্ঝো গদ্ধোথ কুললো, সেনো ব্যগ্ঘীনসো প্যথ;

তব্ভেদা সকুণগ্ঘি’ত্থী, আটো দব্বিমুখদ্ৱিজো.

৬৩৮. উহুঙ্কাৰো উলূকো চ, কোসিযো ৱাযসাৰি চ;

কাকো ত্ৱ’ৰিট্ঠো ধঙ্কো চ, বলিপুট্ঠো চ ৱাযসো.

৬৩৯. কাকোলো ৱনকাকো থ,

লাপো লটুকিকা প্যথ;

ৱাৰণো হত্থিলিঙ্গো চ, হত্থিসোণ্ডৱিহঙ্গমো.

৬৪০. উক্কুসো কুৰৰো কোল,ট্ঠিপক্খিম্হি চ কুক্কুহো;

সুৱো তু কীৰো চ সুকো, তম্বচূড়ো তু কুক্কুটো.

৬৪১. ৱনকুক্কুটো চ নিজ্জিৱ্হো, অথ কোঞ্চা চ কুন্তনী;

চক্কৱাকো তু চক্কৱ্হো, সাৰঙ্গোতু চ চাতকো.

৬৪২. তুলিযো পক্খিবিড়ালো,

সতপত্তো তু সাৰসো;

বকো তু সুক্ককাকোথ,

বলাকা ৱিসকণ্ঠিকা.

৬৪৩. লোহপিট্ঠো তথা কঙ্কো, খঞ্জৰীটো তু খঞ্জনো;

কলৱিঙ্কো তু চাটকো, দিন্দিভো তু কিকী ভৱে.

৬৪৪. কাদম্বো কাড়হংসোথ, সকুন্তো ভাসপক্খিনি;

ধূম্যাটো তু কলিঙ্গোথ,

দাত্যূহো কাড়কণ্ঠকো.

৬৪৫. খুদ্দাদী মক্খিকাভেদা, ডংসো পিঙ্গলমক্খিকা;

আসাটিকা মক্খিকাণ্ডং, পতঙ্গো সলভো ভৱে.

৬৪৬. সূচিমুখো চ মকসো, চীৰী তু ঝল্লিকা [ঝিল্লিকা (ক.)] থ চ;

জতুকা জিনপত্তা থ, হংসো সেতচ্ছদো ভৱে.

৬৪৭. তে ৰাজহংসা ৰত্তেহি, পাদতুণ্ডেহি ভাসিতা;

মল্লিকা’খ্যা ধতৰট্ঠা, মলীনেহ্য’সিতেহি চ.

৬৪৮. তিৰচ্ছো তু তিৰচ্ছানো, তিৰচ্ছানগতো সিযাতি.

ইতি অৰঞ্ঞাদিৱগ্গো.