৩. নিব্বানসুখসুত্তং

৩৪. একং সমযং আযস্মা সাৰিপুত্তো ৰাজগহে ৱিহৰতি ৱেড়ুৱনে কলন্দকনিৱাপে. তত্ৰ খো আযস্মা সাৰিপুত্তো ভিক্খূ আমন্তেসি – ‘‘সুখমিদং, আৱুসো, নিব্বানং. সুখমিদং, আৱুসো, নিব্বান’’ন্তি. এৱং ৱুত্তে আযস্মা উদাযী আযস্মন্তং সাৰিপুত্তং এতদৱোচ – ‘‘কিং পনেত্থ, আৱুসো সাৰিপুত্ত, সুখং যদেত্থ নত্থি ৱেদযিত’’ন্তি? ‘‘এতদেৱ খ্ৱেত্থ, আৱুসো, সুখং যদেত্থ নত্থি ৱেদযিতং. পঞ্চিমে, আৱুসো, কামগুণা. কতমে পঞ্চ? চক্খুৱিঞ্ঞেয্যা ৰূপা ইট্ঠা কন্তা মনাপা পিযৰূপা কামূপসংহিতা ৰজনীযা, সোতৱিঞ্ঞেয্যা সদ্দা…পে… ঘানৱিঞ্ঞেয্যা গন্ধা… জিৱ্হাৱিঞ্ঞেয্যা ৰসা… কাযৱিঞ্ঞেয্যা ফোট্ঠব্বা ইট্ঠা কন্তা মনাপা পিযৰূপা কামূপসংহিতা ৰজনীযা – ইমে খো, আৱুসো, পঞ্চ কামগুণা. যং খো, আৱুসো, ইমে পঞ্চ কামগুণে পটিচ্চ উপ্পজ্জতি সুখং সোমনস্সং, ইদং ৱুচ্চতাৱুসো, কামসুখং.

‘‘ইধাৱুসো, ভিক্খু ৱিৱিচ্চেৱ কামেহি…পে… পঠমং ঝানং উপসম্পজ্জ ৱিহৰতি. তস্স চে, আৱুসো, ভিক্খুনো ইমিনা ৱিহাৰেন ৱিহৰতো কামসহগতা সঞ্ঞামনসিকাৰা সমুদাচৰন্তি, স্ৱস্স হোতি আবাধো. সেয্যথাপি, আৱুসো, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স তে কামসহগতা সঞ্ঞামনসিকাৰা সমুদাচৰন্তি. স্ৱস্স হোতি আবাধো. যো খো পনাৱুসো, আবাধো দুক্খমেতং ৱুত্তং ভগৱতা. ইমিনাপি খো এতং, আৱুসো, পৰিযাযেন ৱেদিতব্বং যথা সুখং নিব্বানং.

‘‘পুন চপৰং, আৱুসো, ভিক্খু ৱিতক্কৱিচাৰানং ৱূপসমা…পে… দুতিযং ঝানং উপসম্পজ্জ ৱিহৰতি. তস্স চে, আৱুসো, ভিক্খুনো ইমিনা ৱিহাৰেন ৱিহৰতো ৱিতক্কসহগতা সঞ্ঞামনসিকাৰা সমুদাচৰন্তি, স্ৱস্স হোতি আবাধো. সেয্যথাপি, আৱুসো, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স তে ৱিতক্কসহগতা সঞ্ঞামনসিকাৰা সমুদাচৰন্তি. স্ৱস্স হোতি আবাধো. যো খো পনাৱুসো, আবাধো দুক্খমেতং ৱুত্তং ভগৱতা. ইমিনাপি খো এতং, আৱুসো, পৰিযাযেন ৱেদিতব্বং যথা সুখং নিব্বানং.

‘‘পুন চপৰং, আৱুসো, ভিক্খু পীতিযা চ ৱিৰাগা…পে… ততিযং ঝানং উপসম্পজ্জ ৱিহৰতি. তস্স চে, আৱুসো, ভিক্খুনো ইমিনা ৱিহাৰেন ৱিহৰতো পীতিসহগতা সঞ্ঞামনসিকাৰা সমুদাচৰন্তি, স্ৱস্স হোতি আবাধো. সেয্যথাপি, আৱুসো, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স তে পীতিসহগতা সঞ্ঞামনসিকাৰা সমুদাচৰন্তি. স্ৱস্স হোতি আবাধো. যো খো পনাৱুসো, আবাধো দুক্খমেতং ৱুত্তং ভগৱতা. ইমিনাপি খো এতং, আৱুসো, পৰিযাযেন ৱেদিতব্বং যথা সুখং নিব্বানং.

‘‘পুন চপৰং, আৱুসো, ভিক্খু সুখস্স চ পহানা…পে… চতুত্থং ঝানং উপসম্পজ্জ ৱিহৰতি. তস্স চে, আৱুসো, ভিক্খুনো ইমিনা ৱিহাৰেন ৱিহৰতো উপেক্খাসহগতা সঞ্ঞামনসিকাৰা সমুদাচৰন্তি, স্ৱস্স হোতি আবাধো. সেয্যথাপি, আৱুসো, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স তে উপেক্খাসহগতা সঞ্ঞামনসিকাৰা সমুদাচৰন্তি. স্ৱস্স হোতি আবাধো. যো খো পনাৱুসো, আবাধো দুক্খমেতং ৱুত্তং ভগৱতা. ইমিনাপি খো এতং, আৱুসো, পৰিযাযেন ৱেদিতব্বং যথা সুখং নিব্বানং.

‘‘পুন চপৰং, আৱুসো, ভিক্খু সব্বসো ৰূপসঞ্ঞানং সমতিক্কমা পটিঘসঞ্ঞানং অত্থঙ্গমা নানত্তসঞ্ঞানং অমনসিকাৰা অনন্তো আকাসোতি আকাসানঞ্চাযতনং উপসম্পজ্জ ৱিহৰতি. তস্স চে, আৱুসো, ভিক্খুনো ইমিনা ৱিহাৰেন ৱিহৰতো ৰূপসহগতা সঞ্ঞামনসিকাৰা সমুদাচৰন্তি, স্ৱস্স হোতি আবাধো. সেয্যথাপি, আৱুসো, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স তে ৰূপসহগতা সঞ্ঞামনসিকাৰা সমুদাচৰন্তি. স্ৱস্স হোতি আবাধো. যো খো পনাৱুসো, আবাধো দুক্খমেতং ৱুত্তং ভগৱতা. ইমিনাপি খো এতং, আৱুসো, পৰিযাযেন ৱেদিতব্বং যথা সুখং নিব্বানং.

‘‘পুন চপৰং, আৱুসো, ভিক্খু সব্বসো আকাসানঞ্চাযতনং সমতিক্কম্ম অনন্তং ৱিঞ্ঞাণন্তি ৱিঞ্ঞাণঞ্চাযতনং উপসম্পজ্জ ৱিহৰতি. তস্স চে, আৱুসো, ভিক্খুনো ইমিনা ৱিহাৰেন ৱিহৰতো আকাসানঞ্চাযতনসহগতা সঞ্ঞামনসিকাৰা সমুদাচৰন্তি, স্ৱস্স হোতি আবাধো. সেয্যথাপি, আৱুসো, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স তে আকাসানঞ্চাযতনসহগতা সঞ্ঞামনসিকাৰা সমুদাচৰন্তি. স্ৱস্স হোতি আবাধো. যো খো পনাৱুসো, আবাধো দুক্খমেতং ৱুত্তং ভগৱতা. ইমিনাপি খো এতং, আৱুসো, পৰিযাযেন ৱেদিতব্বং যথা সুখং নিব্বানং.

‘‘পুন চপৰং, আৱুসো, ভিক্খু সব্বসো ৱিঞ্ঞাণঞ্চাযতনং সমতিক্কম্ম, নত্থি কিঞ্চীতি আকিঞ্চঞ্ঞাযতনং উপসম্পজ্জ ৱিহৰতি. তস্স চে, আৱুসো, ভিক্খুনো ইমিনা ৱিহাৰেন ৱিহৰতো ৱিঞ্ঞাণঞ্চাযতনসহগতা সঞ্ঞামনসিকাৰা সমুদাচৰন্তি, স্ৱস্স হোতি আবাধো. সেয্যথাপি, আৱুসো, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স তে ৱিঞ্ঞাণঞ্চাযতনসহগতা সঞ্ঞামনসিকাৰা সমুদাচৰন্তি. স্ৱস্স হোতি আবাধো. যো খো পনাৱুসো, আবাধো দুক্খমেতং ৱুত্তং ভগৱতা. ইমিনাপি খো এতং, আৱুসো, পৰিযাযেন ৱেদিতব্বং যথা সুখং নিব্বানং.

‘‘পুন চপৰং, আৱুসো, ভিক্খু সব্বসো আকিঞ্চঞ্ঞাযতনং সমতিক্কম্ম নেৱসঞ্ঞানাসঞ্ঞাযতনং উপসম্পজ্জ ৱিহৰতি. তস্স চে, আৱুসো, ভিক্খুনো ইমিনা ৱিহাৰেন ৱিহৰতো আকিঞ্চঞ্ঞাযতনসহগতা সঞ্ঞামনসিকাৰা সমুদাচৰন্তি, স্ৱস্স হোতি আবাধো. সেয্যথাপি, আৱুসো, সুখিনো দুক্খং উপ্পজ্জেয্য যাৱদেৱ আবাধায; এৱমেৱস্স তে আকিঞ্চঞ্ঞাযতনসহগতা সঞ্ঞামনসিকাৰা সমুদাচৰন্তি. স্ৱস্স হোতি আবাধো. যো খো পনাৱুসো, আবাধো দুক্খমেতং ৱুত্তং ভগৱতা. ইমিনাপি খো এতং, আৱুসো, পৰিযাযেন ৱেদিতব্বং যথা সুখং নিব্বানং.

‘‘পুন চপৰং, আৱুসো, ভিক্খু সব্বসো নেৱসঞ্ঞানাসঞ্ঞাযতনং সমতিক্কম্ম সঞ্ঞাৱেদযিতনিৰোধং উপসম্পজ্জ ৱিহৰতি, পঞ্ঞায চস্স দিস্ৱা আসৱা পৰিক্খীণা হোন্তি. ইমিনাপি খো এতং, আৱুসো, পৰিযাযেন ৱেদিতব্বং যথা সুখং নিব্বান’’ন্তি. ততিযং.