১. তিঠানসুত্তং

২১. ‘‘তীহি, ভিক্খৱে, ঠানেহি উত্তৰকুৰুকা মনুস্সা দেৱে চ তাৱতিংসে অধিগ্গণ্হন্তি জম্বুদীপকে চ মনুস্সে. কতমেহি তীহি? অমমা, অপৰিগ্গহা, নিযতাযুকা, ৱিসেসগুণা [ৱিসেসভুনো (সী. স্যা. পী.)] – ইমেহি খো, ভিক্খৱে, তীহি ঠানেহি উত্তৰকুৰুকা মনুস্সা দেৱে চ তাৱতিংসে অধিগ্গণ্হন্তি জম্বুদীপকে চ মনুস্সে.

‘‘তীহি, ভিক্খৱে, ঠানেহি দেৱা তাৱতিংসা উত্তৰকুৰুকে চ মনুস্সে অধিগ্গণ্হন্তি জম্বুদীপকে চ মনুস্সে. কতমেহি তীহি? দিব্বেন আযুনা, দিব্বেন ৱণ্ণেন, দিব্বেন সুখেন – ইমেহি খো, ভিক্খৱে, তীহি ঠানেহি দেৱা তাৱতিংসা উত্তৰকুৰুকে চ মনুস্সে অধিগ্গণ্হন্তি জম্বুদীপকে চ মনুস্সে.

[কথা. ২৭১] ‘‘তীহি, ভিক্খৱে, ঠানেহি জম্বুদীপকা মনুস্সা উত্তৰকুৰুকে চ মনুস্সে অধিগ্গণ্হন্তি দেৱে চ তাৱতিংসে. কতমেহি তীহি? সূৰা, সতিমন্তো, ইধ ব্ৰহ্মচৰিযৱাসো – ইমেহি খো, ভিক্খৱে, তীহি ঠানেহি জম্বুদীপকা মনুস্সা উত্তৰকুৰুকে চ মনুস্সে অধিগ্গণ্হন্তি দেৱে চ তাৱতিংসে’’তি. পঠমং.