৯. দেৱতাসুত্তং

১৯. ‘‘ইমঞ্চ, ভিক্খৱে, ৰত্তিং সম্বহুলা দেৱতা অভিক্কন্তায ৰত্তিযা অভিক্কন্তৱণ্ণা কেৱলকপ্পং জেতৱনং ওভাসেত্ৱা যেনাহং তেনুপসঙ্কমিংসু; উপসঙ্কমিত্ৱা মং অভিৱাদেত্ৱা একমন্তং অট্ঠংসু. একমন্তং ঠিতা খো, ভিক্খৱে, তা দেৱতা মং এতদৱোচুং – ‘উপসঙ্কমিংসু নো, ভন্তে, পুব্বে মনুস্সভূতানং পব্বজিতা অগাৰানি. তে মযং, ভন্তে, পচ্চুট্ঠিম্হ, নো চ খো অভিৱাদিম্হ. তা মযং, ভন্তে, অপৰিপুণ্ণকম্মন্তা ৱিপ্পটিসাৰিনিযো পচ্চানুতাপিনিযো হীনং কাযং উপপন্না’’’তি.

‘‘অপৰাপি মং, ভিক্খৱে, সম্বহুলা দেৱতা উপসঙ্কমিত্ৱা এতদৱোচুং – ‘উপসঙ্কমিংসু নো, ভন্তে, পুব্বে মনুস্সভূতানং পব্বজিতা অগাৰানি. তে মযং, ভন্তে, পচ্চুট্ঠিম্হ অভিৱাদিম্হ [পচ্চুট্ঠিম্হ চ অভিৱাদিম্হ চ (স্যা.)], নো চ তেসং আসনং অদম্হ. তা মযং, ভন্তে, অপৰিপুণ্ণকম্মন্তা ৱিপ্পটিসাৰিনিযো পচ্চানুতাপিনিযো হীনং কাযং উপপন্না’’’তি.

‘‘অপৰাপি মং, ভিক্খৱে, সম্বহুলা দেৱতা উপসঙ্কমিত্ৱা এতদৱোচুং – ‘উপসঙ্কমিংসু নো, ভন্তে, পুব্বে মনুস্সভূতানং পব্বজিতা অগাৰানি. তে মযং, ভন্তে, পচ্চুট্ঠিম্হ অভিৱাদিম্হ [পচ্চুট্ঠিম্হ চ অভিৱাদিম্হ চ (স্যা.)] আসনং [আসনঞ্চ (সী. স্যা.)] অদম্হ, নো চ খো যথাসত্তি যথাবলং সংৱিভজিম্হ…পে… যথাসত্তি যথাবলং [যথাবলং চ (?)] সংৱিভজিম্হ, নো চ খো উপনিসীদিম্হ ধম্মস্সৱনায…পে… উপনিসীদিম্হ [উপনিসীদিম্হ চ (স্যা.)] ধম্মস্সৱনায, নো চ খো ওহিতসোতা ধম্মং সুণিম্হ…পে… ওহিতসোতা চ ধম্মং সুণিম্হ, নো চ খো সুত্ৱা ধম্মং ধাৰযিম্হ…পে… সুত্ৱা চ ধম্মং ধাৰযিম্হ, নো চ খো ধাতানং ধম্মানং অত্থং উপপৰিক্খিম্হ…পে… ধাতানঞ্চ ধম্মানং অত্থং উপপৰিক্খিম্হ, নো চ খো অত্থমঞ্ঞায ধম্মমঞ্ঞায ধম্মানুধম্মং পটিপজ্জিম্হ. তা মযং, ভন্তে, অপৰিপুণ্ণকম্মন্তা ৱিপ্পটিসাৰিনিযো পচ্চানুতাপিনিযো হীনং কাযং উপপন্না’’’তি.

‘‘অপৰাপি মং, ভিক্খৱে, সম্বহুলা দেৱতা উপসঙ্কমিত্ৱা এতদৱোচুং – ‘উপসঙ্কমিংসু নো, ভন্তে, পুব্বে মনুস্সভূতানং পব্বজিতা অগাৰানি. তে মযং, ভন্তে, পচ্চুট্ঠিম্হ অভিৱাদিম্হ [পচ্চুট্ঠিম্হ চ অভিৱাদিম্হ চ (স্যা.)], আসনং [আসনঞ্চ (সী. স্যা.)] অদম্হ, যথাসত্তি যথাবলং [যথাবলং চ (?)] সংৱিভজিম্হ, উপনিসীদিম্হ [উপনিসীদিম্হ চ (স্যা.)] ধম্মস্সৱনায, ওহিতসোতা চ ধম্মং সুণিম্হ, সুত্ৱা চ ধম্মং ধাৰযিম্হ, ধাতানঞ্চ ধম্মানং অত্থং উপপৰিক্খিম্হ, অত্থমঞ্ঞায ধম্মমঞ্ঞায ধম্মানুধম্মং [ধম্মানুধম্মঞ্চ (?)] পটিপজ্জিম্হ. তা মযং, ভন্তে, পৰিপুণ্ণকম্মন্তা অৱিপ্পটিসাৰিনিযো অপচ্চানুতাপিনিযো পণীতং কাযং উপপন্না’তি. এতানি, ভিক্খৱে, ৰুক্খমূলানি এতানি সুঞ্ঞাগাৰানি. ঝাযথ, ভিক্খৱে, মা পমাদত্থ, মা পচ্ছা ৱিপ্পটিসাৰিনো অহুৱত্থ সেয্যথাপি তা পুৰিমিকা দেৱতা’’তি. নৱমং.