৫. গণ্ডসুত্তং

১৫. ‘‘সেয্যথাপি, ভিক্খৱে, গণ্ডো অনেকৱস্সগণিকো. তস্সস্সু গণ্ডস্স নৱ ৱণমুখানি নৱ অভেদনমুখানি. ততো যং কিঞ্চি পগ্ঘৰেয্য – অসুচিযেৱ পগ্ঘৰেয্য, দুগ্গন্ধংযেৱ পগ্ঘৰেয্য, জেগুচ্ছিযংযেৱ [জেগুচ্ছিযেৱ (ক.)] পগ্ঘৰেয্য; যং কিঞ্চি পসৱেয্য – অসুচিযেৱ পসৱেয্য, দুগ্গন্ধংযেৱ পসৱেয্য, জেগুচ্ছিযংযেৱ পসৱেয্য.

‘‘গণ্ডোতি খো, ভিক্খৱে, ইমস্সেতং চাতুমহাভূতিকস্স [চাতুম্মহাভূতিকস্স (সী. স্যা. পী.)] কাযস্স অধিৱচনং মাতাপেত্তিকসম্ভৱস্স ওদনকুম্মাসূপচযস্স অনিচ্চুচ্ছাদনপৰিমদ্দনভেদনৱিদ্ধংসনধম্মস্স. তস্সস্সু গণ্ডস্স নৱ ৱণমুখানি নৱ অভেদনমুখানি. ততো যং কিঞ্চি পগ্ঘৰতি – অসুচিযেৱ পগ্ঘৰতি, দুগ্গন্ধংযেৱ পগ্ঘৰতি, জেগুচ্ছিযংযেৱ পগ্ঘৰতি; যং কিঞ্চি পসৱতি – অসুচিযেৱ পসৱতি, দুগ্গন্ধংযেৱ পসৱতি, জেগুচ্ছিযংযেৱ পসৱতি. তস্মাতিহ, ভিক্খৱে, ইমস্মিং কাযে নিব্বিন্দথা’’তি. পঞ্চমং.