৯. পটিসাৰণীযসুত্তং

৮৯. [চূড়ৱ. ৩৯ থোকং ৱিসদিসং] ‘‘অট্ঠহি, ভিক্খৱে, ধম্মেহি সমন্নাগতস্স ভিক্খুনো আকঙ্খমানো সঙ্ঘো পটিসাৰণীযকম্মং কৰেয্য. কতমেহি অট্ঠহি? গিহীনং অলাভায পৰিসক্কতি, গিহীনং অনত্থায পৰিসক্কতি, গিহী অক্কোসতি পৰিভাসতি, গিহী গিহীহি ভেদেতি, বুদ্ধস্স অৱণ্ণং ভাসতি, ধম্মস্স অৱণ্ণং ভাসতি, সঙ্ঘস্স অৱণ্ণং ভাসতি, ধম্মিকঞ্চ গিহিপটিস্সৱং ন সচ্চাপেতি. ইমেহি খো, ভিক্খৱে, অট্ঠহি ধম্মেহি সমন্নাগতস্স ভিক্খুনো আকঙ্খমানো সঙ্ঘো পটিসাৰণীযং কম্মং কৰেয্য.

‘‘অট্ঠহি, ভিক্খৱে, ধম্মেহি সমন্নাগতস্স ভিক্খুনো আকঙ্খমানো সঙ্ঘো পটিসাৰণীযকম্মং পটিপ্পস্সম্ভেয্য. কতমেহি অট্ঠহি? ন গিহীনং অলাভায পৰিসক্কতি, ন গিহীনং অনত্থায পৰিসক্কতি, ন গিহী অক্কোসতি পৰিভাসতি, ন গিহী গিহীহি ভেদেতি, বুদ্ধস্স ৱণ্ণং ভাসতি, ধম্মস্স ৱণ্ণং ভাসতি, সঙ্ঘস্স ৱণ্ণং ভাসতি, ধম্মিকঞ্চ গিহিপটিস্সৱং সচ্চাপেতি. ইমেহি খো, ভিক্খৱে, অট্ঠহি ধম্মেহি সমন্নাগতস্স ভিক্খুনো আকঙ্খমানো সঙ্ঘো পটিসাৰণীযকম্মং পটিপ্পস্সম্ভেয্যা’’তি. নৱমং.