১. সতিসম্পজঞ্ঞসুত্তং

৮১. ‘‘সতিসম্পজঞ্ঞে, ভিক্খৱে, অসতি সতিসম্পজঞ্ঞৱিপন্নস্স হতূপনিসং হোতি হিৰোত্তপ্পং. হিৰোত্তপ্পে অসতি হিৰোত্তপ্পৱিপন্নস্স হতূপনিসো হোতি ইন্দ্ৰিযসংৱৰো. ইন্দ্ৰিযসংৱৰে অসতি ইন্দ্ৰিযসংৱৰৱিপন্নস্স হতূপনিসং হোতি সীলং. সীলে অসতি সীলৱিপন্নস্স হতূপনিসো হোতি সম্মাসমাধি. সম্মাসমাধিম্হি অসতি সম্মাসমাধিৱিপন্নস্স হতূপনিসং হোতি যথাভূতঞাণদস্সনং. যথাভূতঞাণদস্সনে অসতি যথাভূতঞাণদস্সনৱিপন্নস্স হতূপনিসো হোতি নিব্বিদাৱিৰাগো. নিব্বিদাৱিৰাগে অসতি নিব্বিদাৱিৰাগৱিপন্নস্স হতূপনিসং হোতি ৱিমুত্তিঞাণদস্সনং. সেয্যথাপি, ভিক্খৱে, ৰুক্খো সাখাপলাসৱিপন্নো. তস্স পপটিকাপি ন পাৰিপূৰিং গচ্ছতি, তচোপি… ফেগ্গুপি… সাৰোপি ন পাৰিপূৰিং গচ্ছতি. এৱমেৱং খো, ভিক্খৱে, সতিসম্পজঞ্ঞে অসতি সতিসম্পজঞ্ঞৱিপন্নস্স হতূপনিসং হোতি হিৰোত্তপ্পং; হিৰোত্তপ্পে অসতি হিৰোত্তপ্পৱিপন্নস্স হতূপনিসো হোতি…পে… ৱিমুত্তিঞাণদস্সনং.

‘‘সতিসম্পজঞ্ঞে, ভিক্খৱে, সতি সতিসম্পজঞ্ঞসম্পন্নস্স উপনিসসম্পন্নং হোতি হিৰোত্তপ্পং. হিৰোত্তপ্পে সতি হিৰোত্তপ্পসম্পন্নস্স উপনিসসম্পন্নো হোতি ইন্দ্ৰিযসংৱৰো. ইন্দ্ৰিযসংৱৰে সতি ইন্দ্ৰিযসংৱৰসম্পন্নস্স উপনিসসম্পন্নং হোতি সীলং. সীলে সতি সীলসম্পন্নস্স উপনিসসম্পন্নো হোতি সম্মাসমাধি. সম্মাসমাধিম্হি সতি সম্মাসমাধিসম্পন্নস্স উপনিসসম্পন্নং হোতি যথাভূতঞাণদস্সনং. যথাভূতঞাণদস্সনে সতি যথাভূতঞাণদস্সনসম্পন্নস্স উপনিসসম্পন্নো হোতি নিব্বিদাৱিৰাগো. নিব্বিদাৱিৰাগে সতি নিব্বিদাৱিৰাগসম্পন্নস্স উপনিসসম্পন্নং হোতি ৱিমুত্তিঞাণদস্সনং. সেয্যথাপি, ভিক্খৱে, ৰুক্খো সাখাপলাসসম্পন্নো. তস্স পপটিকাপি পাৰিপূৰিং গচ্ছতি, তচোপি… ফেগ্গুপি… সাৰোপি পাৰিপূৰিং গচ্ছতি. এৱমেৱং খো, ভিক্খৱে, সতিসম্পজঞ্ঞে সতি সতিসম্পজঞ্ঞসম্পন্নস্স উপনিসসম্পন্নং হোতি হিৰোত্তপ্পং; হিৰোত্তপ্পে সতি হিৰোত্তপ্পসম্পন্নস্স উপনিসসম্পন্নো হোতি…পে… ৱিমুত্তিঞাণদস্সন’’ন্তি. পঠমং.