৯. পঠমইধলোকিকসুত্তং

৪৯. একং সমযং ভগৱা সাৱত্থিযং ৱিহৰতি পুব্বাৰামে মিগাৰমাতুপাসাদে. অথ খো ৱিসাখা মিগাৰমাতা যেন ভগৱা তেনুপসঙ্কমি…পে…. একমন্তং নিসিন্নং খো ৱিসাখং মিগাৰমাতৰং ভগৱা এতদৱোচ –

‘‘চতূহি খো, ৱিসাখে, ধম্মেহি সমন্নাগতো মাতুগামো ইধলোকৱিজযায পটিপন্নো হোতি, অযংস লোকো আৰদ্ধো হোতি. কতমেহি চতূহি? ইধ, ৱিসাখে, মাতুগামো সুসংৱিহিতকম্মন্তো হোতি, সঙ্গহিতপৰিজনো, ভত্তু মনাপং চৰতি, সম্ভতং অনুৰক্খতি.

‘‘কথঞ্চ, ৱিসাখে, মাতুগামো সুসংৱিহিতকম্মন্তো হোতি? ইধ, ৱিসাখে, মাতুগামো যে তে ভত্তু অব্ভন্তৰা কম্মন্তা – উণ্ণাতি ৱা কপ্পাসাতি ৱা – তত্থ দক্খা হোতি অনলসা তত্ৰুপাযায ৱীমংসায সমন্নাগতা অলং কাতুং অলং সংৱিধাতুং. এৱং খো, ৱিসাখে, মাতুগামো সুসংৱিহিতকম্মন্তো হোতি.

‘‘কথঞ্চ, ৱিসাখে, মাতুগামো সঙ্গহিতপৰিজনো হোতি? ইধ, ৱিসাখে, মাতুগামো যো সো ভত্তু অব্ভন্তৰো অন্তোজনো – দাসাতি ৱা পেস্সাতি ৱা কম্মকৰাতি ৱা – তেসং কতঞ্চ কততো জানাতি অকতঞ্চ অকততো জানাতি, গিলানকানঞ্চ বলাবলং জানাতি খাদনীযং ভোজনীযঞ্চস্স পচ্চংসেন সংৱিভজতি. এৱং খো, ৱিসাখে, মাতুগামো সঙ্গহিতপৰিজনো হোতি.

‘‘কথঞ্চ, ৱিসাখে, মাতুগামো ভত্তু মনাপং চৰতি? ইধ, ৱিসাখে, মাতুগামো যং ভত্তু অমনাপসঙ্খাতং তং জীৱিতহেতুপি ন অজ্ঝাচৰতি. এৱং খো, ৱিসাখে, মাতুগামো ভত্তু মনাপং চৰতি.

‘‘কথঞ্চ, ৱিসাখে, মাতুগামো সম্ভতং অনুৰক্খতি? ইধ, ৱিসাখে, মাতুগামো যং ভত্তা আহৰতি ধনং ৱা ধঞ্ঞং ৱা ৰজতং ৱা জাতৰূপং ৱা তং আৰক্খেন গুত্তিযা সম্পাদেতি, তত্থ চ হোতি অধুত্তী অথেনী অসোণ্ডী অৱিনাসিকা. এৱং খো, ৱিসাখে, মাতুগামো সম্ভতং অনুৰক্খতি. ইমেহি খো, ৱিসাখে, চতূহি ধম্মেহি সমন্নাগতো মাতুগামো ইধলোকৱিজযায পটিপন্নো হোতি, অযংস লোকো আৰদ্ধো হোতি.

‘‘চতূহি খো, ৱিসাখে, ধম্মেহি সমন্নাগতো মাতুগামো পৰলোকৱিজযায পটিপন্নো হোতি, পৰলোকো আৰদ্ধো হোতি. কতমেহি চতূহি? ইধ, ৱিসাখে, মাতুগামো সদ্ধাসম্পন্নো হোতি, সীলসম্পন্নো হোতি, চাগসম্পন্নো হোতি, পঞ্ঞাসম্পন্নো হোতি.

‘‘কথঞ্চ, ৱিসাখে, মাতুগামো সদ্ধাসম্পন্নো হোতি? ইধ, ৱিসাখে, মাতুগামো সদ্ধো হোতি, সদ্দহতি তথাগতস্স বোধিং – ‘ইতিপি সো ভগৱা অৰহং সম্মাসম্বুদ্ধো ৱিজ্জাচৰণসম্পন্নো সুগতো লোকৱিদূ অনুত্তৰো পুৰিসদম্মসাৰথি সত্থা দেৱমনুস্সানং বুদ্ধো ভগৱা’তি. এৱং খো, ৱিসাখে, মাতুগামো সদ্ধাসম্পন্নো হোতি.

‘‘কথঞ্চ, ৱিসাখে, মাতুগামো সীলসম্পন্নো হোতি? ইধ, ৱিসাখে, মাতুগামো পাণাতিপাতা পটিৱিৰতো হোতি…পে… সুৰামেৰযমজ্জপমাদট্ঠানা পটিৱিৰতো হোতি. এৱং খো, ৱিসাখে, মাতুগামো সীলসম্পন্নো হোতি.

‘‘কথঞ্চ, ৱিসাখে, মাতুগামো চাগসম্পন্নো হোতি? ইধ, ৱিসাখে, মাতুগামো ৱিগতমলমচ্ছেৰেন চেতসা অগাৰং অজ্ঝাৱসতি মুত্তচাগা পযতপাণিনী ৱোস্সগ্গৰতা যাচযোগা দানসংৱিভাগৰতা. এৱং খো, ৱিসাখে, মাতুগামো চাগসম্পন্নো হোতি.

‘‘কথঞ্চ, ৱিসাখে, মাতুগামো পঞ্ঞাসম্পন্নো হোতি? ইধ, ৱিসাখে, মাতুগামো পঞ্ঞৱা হোতি…পে… এৱং খো, ৱিসাখে, মাতুগামো পঞ্ঞাসম্পন্নো হোতি. ইমেহি খো, ৱিসাখে, চতূহি ধম্মেহি সমন্নাগতো মাতুগামো পৰলোকৱিজযায পটিপন্নো হোতি, পৰলোকো আৰদ্ধো হোতী’’তি.

‘‘সুসংৱিহিতকম্মন্তা, সঙ্গহিতপৰিজ্জনা;

ভত্তু মনাপং চৰতি, সম্ভতং অনুৰক্খতি.

‘‘সদ্ধা সীলেন সম্পন্না, ৱদঞ্ঞূ ৱীতমচ্ছৰা;

নিচ্চং মগ্গং ৱিসোধেতি, সোত্থানং সম্পৰাযিকং.

‘‘ইচ্চেতে অট্ঠ ধম্মা চ, যস্সা ৱিজ্জন্তি নাৰিযা;

তম্পি সীলৱতিং আহু, ধম্মট্ঠং সচ্চৱাদিনিং.

‘‘সোড়সাকাৰসম্পন্না, অট্ঠঙ্গসুসমাগতা;

তাদিসী সীলৱতী উপাসিকা;

উপপজ্জতি দেৱলোকং মনাপ’’ন্তি. নৱমং;