১০. দুতিযইধলোকিকসুত্তং

৫০. ‘‘চতূহি, ভিক্খৱে, ধম্মেহি সমন্নাগতো মাতুগামো ইধলোকৱিজযায পটিপন্নো হোতি, অযংস লোকো আৰদ্ধো হোতি. কতমেহি চতূহি? ইধ, ভিক্খৱে, মাতুগামো সুসংৱিহিতকম্মন্তো হোতি, সঙ্গহিতপৰিজনো, ভত্তু মনাপং চৰতি, সম্ভতং অনুৰক্খতি.

‘‘কথঞ্চ, ভিক্খৱে, মাতুগামো সুসংৱিহিতকম্মন্তো হোতি? ইধ, ভিক্খৱে, মাতুগামো যে তে ভত্তু অব্ভন্তৰা কম্মন্তা…পে… এৱং খো, ভিক্খৱে, মাতুগামো সুসংৱিহিতকম্মন্তো হোতি.

‘‘কথঞ্চ, ভিক্খৱে, মাতুগামো সঙ্গহিতপৰিজনো হোতি? ইধ, ভিক্খৱে, মাতুগামো যো সো ভত্তু অব্ভন্তৰো অন্তোজনো…পে… এৱং খো, ভিক্খৱে, মাতুগামো সঙ্গহিতপৰিজনো হোতি.

‘‘কথঞ্চ, ভিক্খৱে, মাতুগামো ভত্তু মনাপং চৰতি? ইধ, ভিক্খৱে, মাতুগামো যং ভত্তু অমনাপসঙ্খাতং তং জীৱিতহেতুপি ন অজ্ঝাচৰতি. এৱং খো, ভিক্খৱে, মাতুগামো ভত্তু মনাপং চৰতি.

‘‘কথঞ্চ, ভিক্খৱে, মাতুগামো সম্ভতং অনুৰক্খতি? ইধ, ভিক্খৱে, মাতুগামো যং ভত্তা আহৰতি…পে… এৱং খো, ভিক্খৱে, মাতুগামো সম্ভতং অনুৰক্খতি. ইমেহি খো, ভিক্খৱে, চতূহি ধম্মেহি সমন্নাগতো মাতুগামো ইধলোকৱিজযায পটিপন্নো হোতি, অযংস লোকো আৰদ্ধো হোতি.

‘‘চতূহি, ভিক্খৱে, ধম্মেহি সমন্নাগতো মাতুগামো পৰলোকৱিজযায পটিপন্নো হোতি, পৰলোকো আৰদ্ধো হোতি. কতমেহি চতূহি? ইধ, ভিক্খৱে, মাতুগামো সদ্ধাসম্পন্নো হোতি, সীলসম্পন্নো হোতি, চাগসম্পন্নো হোতি, পঞ্ঞাসম্পন্নো হোতি.

‘‘কথঞ্চ, ভিক্খৱে, মাতুগামো সদ্ধাসম্পন্নো হোতি? ইধ, ভিক্খৱে, মাতুগামো সদ্ধো হোতি…পে… এৱং খো, ভিক্খৱে, মাতুগামো সদ্ধাসম্পন্নো হোতি.

‘‘কথঞ্চ, ভিক্খৱে, মাতুগামো সীলসম্পন্নো হোতি? ইধ, ভিক্খৱে, মাতুগামো পাণাতিপাতা পটিৱিৰতো হোতি…পে… সুৰামেৰযমজ্জপমাদট্ঠানা পটিৱিৰতো হোতি. এৱং খো, ভিক্খৱে, মাতুগামো সীলসম্পন্নো হোতি.

‘‘কথঞ্চ, ভিক্খৱে, মাতুগামো চাগসম্পন্নো হোতি? ইধ, ভিক্খৱে, মাতুগামো ৱিগতমলমচ্ছেৰেন চেতসা অগাৰং অজ্ঝাৱসতি…পে… এৱং খো, ভিক্খৱে, মাতুগামো চাগসম্পন্নো হোতি.

‘‘কথঞ্চ, ভিক্খৱে, মাতুগামো পঞ্ঞাসম্পন্নো হোতি? ইধ, ভিক্খৱে, মাতুগামো পঞ্ঞৱা হোতি…পে… এৱং খো, ভিক্খৱে, মাতুগামো পঞ্ঞাসম্পন্নো হোতি. ইমেহি খো, ভিক্খৱে, চতূহি ধম্মেহি সমন্নাগতো মাতুগামো পৰলোকৱিজযায পটিপন্নো হোতি, পৰলোকো আৰদ্ধো হোতী’’তি.

‘‘সুসংৱিহিতকম্মন্তা, সঙ্গহিতপৰিজ্জনা;

ভত্তু মনাপং চৰতি, সম্ভতং অনুৰক্খতি.

‘‘সদ্ধা সীলেন সম্পন্না, ৱদঞ্ঞূ ৱীতমচ্ছৰা;

নিচ্চং মগ্গং ৱিসোধেতি, সোত্থানং সম্পৰাযিকং.

‘‘ইচ্চেতে অট্ঠ ধম্মা চ, যস্সা ৱিজ্জন্তি নাৰিযা;

তম্পি সীলৱতিং আহু, ধম্মট্ঠং সচ্চৱাদিনিং.

‘‘সোড়সাকাৰসম্পন্না, অট্ঠঙ্গসুসমাগতা;

তাদিসী সীলৱতী উপাসিকা, উপপজ্জতি দেৱলোকং মনাপ’’ন্তি. দসমং;

উপোসথৱগ্গো পঞ্চমো.