৮. নকুলমাতাসুত্তং

৪৮. একং সমযং ভগৱা ভগ্গেসু ৱিহৰতি সুংসুমাৰগিৰে [সুংসুমাৰগিৰে (সী. স্যা. পী.)] ভেসকড়াৱনে মিগদাযে. অথ খো নকুলমাতা গহপতানী যেন ভগৱা তেনুপসঙ্কমি; উপসঙ্কমিত্ৱা…পে…. একমন্তং নিসিন্নং খো নকুলমাতৰং গহপতানিং ভগৱা এতদৱোচ –

‘‘অট্ঠহি খো, নকুলমাতে, ধম্মেহি সমন্নাগতো মাতুগামো কাযস্স ভেদা পৰং মৰণা মনাপকাযিকানং দেৱানং সহব্যতং উপপজ্জতি. কতমেহি অট্ঠহি? ইধ, নকুলমাতে, মাতুগামো যস্স মাতাপিতৰো ভত্তুনো দেন্তি অত্থকামা হিতেসিনো অনুকম্পকা অনুকম্পং উপাদায তস্স হোতি পুব্বুট্ঠাযিনী পচ্ছানিপাতিনী কিঙ্কাৰপটিস্সাৱিনী মনাপচাৰিনী পিযৱাদিনী.

‘‘যে তে ভত্তু গৰুনো হোন্তি – মাতাতি ৱা পিতাতি ৱা সমণব্ৰাহ্মণাতি ৱা – তে সক্কৰোতি গৰুং কৰোতি মানেতি পূজেতি, অব্ভাগতে চ আসনোদকেন পটিপূজেতি.

‘‘যে তে ভত্তু অব্ভন্তৰা কম্মন্তা – উণ্ণাতি ৱা কপ্পাসাতি ৱা – তত্থ দক্খা হোতি অনলসা তত্ৰুপাযায ৱীমংসায সমন্নাগতা অলং কাতুং অলং সংৱিধাতুং.

‘‘যো সো ভত্তু অব্ভন্তৰো অন্তোজনো – দাসাতি ৱা পেস্সাতি ৱা কম্মকৰাতি ৱা – তেসং কতঞ্চ কততো জানাতি অকতঞ্চ অকততো জানাতি, গিলানকানঞ্চ বলাবলং জানাতি খাদনীযং ভোজনীযঞ্চস্স পচ্চংসেন সংৱিভজতি.

‘‘যং ভত্তা আহৰতি ধনং ৱা ধঞ্ঞং ৱা ৰজতং ৱা জাতৰূপং ৱা তং আৰক্খেন গুত্তিযা সম্পাদেতি, তত্থ চ হোতি অধুত্তী অথেনী অসোণ্ডী অৱিনাসিকা.

‘‘উপাসিকা খো পন হোতি বুদ্ধং সৰণং গতা ধম্মং সৰণং গতা সঙ্ঘং সৰণং গতা.

‘‘সীলৱতী খো পন হোতি – পাণাতিপাতা পটিৱিৰতা…পে… সুৰামেৰযমজ্জপমাদট্ঠানা পটিৱিৰতা…পে….

‘‘চাগৱতী খো পন হোতি ৱিগতমলমচ্ছেৰেন চেতসা অগাৰং অজ্ঝাৱসতি মুত্তচাগা পযতপাণিনী ৱোস্সগ্গৰতা যাচযোগা দানসংৱিভাগৰতা.

‘‘ইমেহি খো, নকুলমাতে, অট্ঠহি ধম্মেহি সমন্নাগতো মাতুগামো কাযস্স ভেদা পৰং মৰণা মনাপকাযিকানং দেৱানং সহব্যতং উপপজ্জতী’’তি.

‘‘যো নং ভৰতি সব্বদা, নিচ্চং আতাপি উস্সুকো;

তং সব্বকামদং পোসং, ভত্তাৰং নাতিমঞ্ঞতি.

‘‘ন চাপি সোত্থি ভত্তাৰং, ইস্সাৱাদেন ৰোসযে;

ভত্তু চ গৰুনো সব্বে, পটিপূজেতি পণ্ডিতা.

‘‘উট্ঠাহিকা অনলসা, সঙ্গহিতপৰিজ্জনা;

ভত্তু মনাপং চৰতি, সম্ভতং অনুৰক্খতি.

‘‘যা এৱং ৱত্ততি নাৰী, ভত্তু ছন্দৱসানুগা;

মনাপা নাম তে [মনাপকাযিকা (সী.)] দেৱা, যত্থ সা উপপজ্জতী’’তি. অট্ঠমং;