৮. সপ্পুৰিসসুত্তং

৩৮. ‘‘সপ্পুৰিসো, ভিক্খৱে, কুলে জাযমানো বহুনো জনস্স অত্থায হিতায সুখায হোতি – মাতাপিতূনং অত্থায হিতায সুখায হোতি, পুত্তদাৰস্স অত্থায হিতায সুখায হোতি, দাসকম্মকৰপোৰিসস্স অত্থায হিতায সুখায হোতি, মিত্তামচ্চানং অত্থায হিতায সুখায হোতি, পুব্বপেতানং অত্থায হিতায সুখায হোতি, ৰঞ্ঞো অত্থায হিতায সুখায হোতি, দেৱতানং অত্থায হিতায সুখায হোতি, সমণব্ৰাহ্মণানং অত্থায হিতায সুখায হোতি.

‘‘সেয্যথাপি, ভিক্খৱে, মহামেঘো সব্বসস্সানি সম্পাদেন্তো বহুনো জনস্স অত্থায হিতায সুখায [হিতায…পে… (স্যা. ক.)] হোতি; এৱমেৱং খো, ভিক্খৱে, সপ্পুৰিসো কুলে জাযমানো বহুনো জনস্স অত্থায হিতায সুখায হোতি – মাতাপিতূনং অত্থায হিতায সুখায হোতি, পুত্তদাৰস্স অত্থায হিতায সুখায হোতি, দাসকম্মকৰপোৰিসস্স অত্থায হিতায সুখায হোতি, মিত্তামচ্চানং অত্থায হিতায সুখায হোতি, পুব্বপেতানং অত্থায হিতায সুখায হোতি, ৰঞ্ঞো অত্থায হিতায সুখায হোতি, দেৱতানং অত্থায হিতায সুখায হোতি, সমণব্ৰাহ্মণানং অত্থায হিতায সুখায হোতী’’তি.

‘‘বহূনং [বহুন্নং (সী. পী.)] ৱত অত্থায, সপ্পঞ্ঞো ঘৰমাৱসং;

মাতৰং পিতৰং পুব্বে, ৰত্তিন্দিৱমতন্দিতো.

‘‘পূজেতি সহধম্মেন, পুব্বেকতমনুস্সৰং;

অনাগাৰে পব্বজিতে, অপচে ব্ৰহ্মচাৰযো [ব্ৰহ্মচাৰিনো (স্যা.)].

‘‘নিৱিট্ঠসদ্ধো পূজেতি, ঞত্ৱা ধম্মে চ পেসলো [পেসলে (ক.)];

ৰঞ্ঞো হিতো দেৱহিতো, ঞাতীনং সখিনং হিতো.

‘‘সব্বেসং [সব্বেসু (ক.)] সো [স (স্যা. পী. ক.)] হিতো হোতি, সদ্ধম্মে সুপ্পতিট্ঠিতো;

ৱিনেয্য মচ্ছেৰমলং, স লোকং ভজতে সিৱ’’ন্তি. অট্ঠমং;