৯. অভিসন্দসুত্তং

৩৯. ‘‘অট্ঠিমে, ভিক্খৱে, পুঞ্ঞাভিসন্দা কুসলাভিসন্দা সুখস্সাহাৰা সোৱগ্গিকা সুখৱিপাকা সগ্গসংৱত্তনিকা, ইট্ঠায কন্তায মনাপায হিতায সুখায সংৱত্তন্তি. কতমে অট্ঠ? ইধ, ভিক্খৱে, অৰিযসাৱকো বুদ্ধং সৰণং গতো হোতি. অযং, ভিক্খৱে, পঠমো পুঞ্ঞাভিসন্দো কুসলাভিসন্দো সুখস্সাহাৰো সোৱগ্গিকো সুখৱিপাকো সগ্গসংৱত্তনিকো, ইট্ঠায কন্তায মনাপায হিতায সুখায সংৱত্ততি.

‘‘পুন চপৰং, ভিক্খৱে, অৰিযসাৱকো ধম্মং সৰণং গতো হোতি. অযং, ভিক্খৱে, দুতিযো পুঞ্ঞাভিসন্দো…পে… সংৱত্ততি.

‘‘পুন চপৰং, ভিক্খৱে, অৰিযসাৱকো সঙ্ঘং সৰণং গতো হোতি. অযং, ভিক্খৱে, ততিযো পুঞ্ঞাভিসন্দো কুসলাভিসন্দো সুখস্সাহাৰো সোৱগ্গিকো সুখৱিপাকো সগ্গসংৱত্তনিকো, ইট্ঠায কন্তায মনাপায হিতায সুখায সংৱত্ততি.

[কথা. ৪৮০] ‘‘পঞ্চিমানি, ভিক্খৱে, দানানি মহাদানানি অগ্গঞ্ঞানি ৰত্তঞ্ঞানি ৱংসঞ্ঞানি পোৰাণানি অসংকিণ্ণানি অসংকিণ্ণপুব্বানি, ন সংকিযন্তি ন সংকিযিস্সন্তি, অপ্পটিকুট্ঠানি [অপ্পতিকুট্ঠানি (সী.)] সমণেহি ব্ৰাহ্মণেহি ৱিঞ্ঞূহি. কতমানি পঞ্চ? ইধ, ভিক্খৱে, অৰিযসাৱকো পাণাতিপাতং পহায পাণাতিপাতা পটিৱিৰতো হোতি. পাণাতিপাতা পটিৱিৰতো, ভিক্খৱে, অৰিযসাৱকো অপৰিমাণানং সত্তানং অভযং দেতি, অৱেৰং দেতি, অব্যাবজ্ঝং [অব্যাপজ্ঝং (ক.) এৱমুপৰিপি] দেতি. অপৰিমাণানং সত্তানং অভযং দত্ৱা অৱেৰং দত্ৱা অব্যাবজ্ঝং দত্ৱা অপৰিমাণস্স অভযস্স অৱেৰস্স অব্যাবজ্ঝস্স ভাগী হোতি. ইদং, ভিক্খৱে, পঠমং দানং মহাদানং অগ্গঞ্ঞং ৰত্তঞ্ঞং ৱংসঞ্ঞং পোৰাণং অসংকিণ্ণং অসংকিণ্ণপুব্বং, ন সংকিযতি ন সংকিযিস্সতি, অপ্পটিকুট্ঠং সমণেহি ব্ৰাহ্মণেহি ৱিঞ্ঞূহি. অযং, ভিক্খৱে, চতুত্থো পুঞ্ঞাভিসন্দো কুসলাভিসন্দো সুখস্সাহাৰো সোৱগ্গিকো সুখৱিপাকো সগ্গসংৱত্তনিকো, ইট্ঠায কন্তায মনাপায হিতায সুখায সংৱত্ততি.

‘‘পুন চপৰং, ভিক্খৱে, অৰিযসাৱকো অদিন্নাদানং পহায অদিন্নাদানা পটিৱিৰতো হোতি…পে… কামেসুমিচ্ছাচাৰং পহায কামেসুমিচ্ছাচাৰা পটিৱিৰতো হোতি…পে… মুসাৱাদং পহায মুসাৱাদা পটিৱিৰতো হোতি…পে… সুৰামেৰযমজ্জপমাদট্ঠানং পহায সুৰামেৰযমজ্জপমাদট্ঠানা পটিৱিৰতো হোতি. সুৰামেৰযমজ্জপমাদট্ঠানা পটিৱিৰতো, ভিক্খৱে, অৰিযসাৱকো অপৰিমাণানং সত্তানং অভযং দেতি অৱেৰং দেতি অব্যাবজ্ঝং দেতি. অপৰিমাণানং সত্তানং অভযং দত্ৱা অৱেৰং দত্ৱা অব্যাবজ্ঝং দত্ৱা, অপৰিমাণস্স অভযস্স অৱেৰস্স অব্যাবজ্ঝস্স ভাগী হোতি. ইদং, ভিক্খৱে, পঞ্চমং দানং মহাদানং অগ্গঞ্ঞং ৰত্তঞ্ঞং ৱংসঞ্ঞং পোৰাণং অসংকিণ্ণং অসংকিণ্ণপুব্বং, ন সংকিযতি ন সংকিযিস্সতি, অপ্পটিকুট্ঠং সমণেহি ব্ৰাহ্মণেহি ৱিঞ্ঞূহি. অযং খো, ভিক্খৱে, অট্ঠমো পুঞ্ঞাভিসন্দো কুসলাভিসন্দো সুখস্সাহাৰো সোৱগ্গিকো সুখৱিপাকো সগ্গসংৱত্তনিকো, ইট্ঠায কন্তায মনাপায হিতায সুখায সংৱত্ততি. ইমে খো, ভিক্খৱে, অট্ঠ পুঞ্ঞাভিসন্দা কুসলাভিসন্দা সুখস্সাহাৰা সোৱগ্গিকা সুখৱিপাকা সগ্গসংৱত্তনিকা, ইট্ঠায কন্তায মনাপায হিতায সুখায সংৱত্তন্তী’’তি. নৱমং.