৯. সমণৱগ্গো

১. ভিক্খুসুত্তং

৮৫. [মহানি. ১৮; চূড়নি. অজিতমাণৱপুচ্ছানিদ্দেস ৮] ‘‘সত্তন্নং, ভিক্খৱে, ধম্মানং ভিন্নত্তা ভিক্খু হোতি. কতমেসং সত্তন্নং? সক্কাযদিট্ঠি ভিন্না হোতি, ৱিচিকিচ্ছা ভিন্না হোতি, সীলব্বতপৰামাসো ভিন্নো হোতি, ৰাগো ভিন্নো হোতি, দোসো ভিন্নো হোতি, মোহো ভিন্নো হোতি, মানো ভিন্নো হোতি. ইমেসং খো, ভিক্খৱে, সত্তন্নং ধম্মানং ভিন্নত্তা ভিক্খু হোতী’’তি. পঠমং.

২. সমণসুত্তং

৮৬. সত্তন্নং, ভিক্খৱে, ধম্মানং সমিতত্তা সমণো হোতি…পে…. দুতিযং.

৩. ব্ৰাহ্মণসুত্তং

৮৭. বাহিতত্তা ব্ৰাহ্মণো হোতি…পে…. ততিযং.

৪. সোত্তিযসুত্তং

৮৮. নিস্সুতত্তা [নিস্সুত্তত্তা (স্যা.) ম. নি. ১.৪৩৪ পস্সিতব্বং] সোত্তিযো [সোত্থিকো (সী.), সোত্তিকো (স্যা.)] হোতি…পে…. চতুত্থং.

৫. ন্হাতকসুত্তং

৮৯. ন্হাতত্তা ন্হাতকো [নহাতত্তো নহাতকো (সী. স্যা.)] হোতি…পে…. পঞ্চমং.

৬. ৱেদগূসুত্তং

৯০. ৱিদিতত্তা ৱেদগূ হোতি…পে…. ছট্ঠং.

৭. অৰিযসুত্তং

৯১. আৰকত্তা [অৰহত্তা (সী.), অৰী হতত্তা (ক.) ম. নি. ১.৪৩৪ পাড়ি অট্ঠকথাটীকা পস্সিতব্বা. স্যামপোত্থকে পন সকলম্পি ইদং সত্তমসুত্তং নত্থি] অৰিযো হোতি…পে…. সত্তমং.

৮. অৰহাসুত্তং

৯২. ‘‘আৰকত্তা অৰহা হোতি. কতমেসং সত্তন্নং? সক্কাযদিট্ঠি আৰকা হোতি, ৱিচিকিচ্ছা আৰকা হোতি, সীলব্বতপৰামাসো আৰকো হোতি, ৰাগো আৰকো হোতি, দোসো আৰকো হোতি, মোহো আৰকো হোতি, মানো আৰকো হোতি. ইমেসং খো, ভিক্খৱে, সত্তন্নং ধম্মানং আৰকত্তা অৰহা হোতী’’তি. অট্ঠমং.

৯. অসদ্ধম্মসুত্তং

৯৩. ‘‘সত্তিমে, ভিক্খৱে, অসদ্ধম্মা. কতমে সত্ত? অস্সদ্ধো হোতি, অহিৰিকো হোতি, অনোত্তপ্পী হোতি, অপ্পস্সুতো হোতি, কুসীতো হোতি, মুট্ঠস্সতি হোতি, দুপ্পঞ্ঞো হোতি. ইমে খো, ভিক্খৱে, সত্ত অসদ্ধম্মা’’তি. নৱমং.

১০. সদ্ধম্মসুত্তং

৯৪. ‘‘সত্তিমে, ভিক্খৱে, সদ্ধম্মা. কতমে সত্ত? সদ্ধো হোতি, হিৰীমা হোতি, ওত্তপ্পী হোতি, বহুস্সুতো হোতি, আৰদ্ধৱীৰিযো হোতি, সতিমা হোতি, পঞ্ঞৱা হোতি. ইমে খো, ভিক্খৱে, সত্ত সদ্ধম্মা’’তি. দসমং.

সমণৱগ্গো নৱমো.