৮. ৱিনযৱগ্গো

১. পঠমৱিনযধৰসুত্তং

৭৫. [পৰি. ৩২৭] ‘‘সত্তহি, ভিক্খৱে, ধম্মেহি সমন্নাগতো ভিক্খু ৱিনযধৰো হোতি. কতমেহি সত্তহি? আপত্তিং জানাতি, অনাপত্তিং জানাতি, লহুকং আপত্তিং জানাতি, গৰুকং আপত্তিং জানাতি, সীলৱা হোতি পাতিমোক্খসংৱৰসংৱুতো ৱিহৰতি আচাৰগোচৰসম্পন্নো অণুমত্তেসু ৱজ্জেসু ভযদস্সাৱী সমাদায সিক্খতি সিক্খাপদেসু, চতুন্নং ঝানানং আভিচেতসিকানং দিট্ঠধম্মসুখৱিহাৰানং নিকামলাভী হোতি অকিচ্ছলাভী অকসিৰলাভী, আসৱানং খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. ইমেহি খো, ভিক্খৱে, সত্তহি ধম্মেহি সমন্নাগতো ভিক্খু ৱিনযধৰো হোতী’’তি. পঠমং.

২. দুতিযৱিনযধৰসুত্তং

৭৬. [পৰি. ৩২৭] ‘‘সত্তহি, ভিক্খৱে, ধম্মেহি সমন্নাগতো ভিক্খু ৱিনযধৰো হোতি. কতমেহি সত্তহি? আপত্তিং জানাতি, অনাপত্তিং জানাতি, লহুকং আপত্তিং জানাতি, গৰুকং আপত্তিং জানাতি, উভযানি খো পনস্স পাতিমোক্খানি ৱিত্থাৰেন স্ৱাগতানি হোন্তি সুৱিভত্তানি সুপ্পৱত্তীনি সুৱিনিচ্ছিতানি সুত্তসো অনুব্যঞ্জনসো, চতুন্নং ঝানানং আভিচেতসিকানং দিট্ঠধম্মসুখৱিহাৰানং নিকামলাভী হোতি অকিচ্ছলাভী অকসিৰলাভী, আসৱানং খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. ইমেহি খো, ভিক্খৱে, সত্তহি ধম্মেহি সমন্নাগতো ভিক্খু ৱিনযধৰো হোতী’’তি. দুতিযং.

৩. ততিযৱিনযধৰসুত্তং

৭৭. ‘‘সত্তহি, ভিক্খৱে, ধম্মেহি সমন্নাগতো ভিক্খু ৱিনযধৰো হোতি. কতমেহি সত্তহি? আপত্তিং জানাতি, অনাপত্তিং জানাতি, লহুকং আপত্তিং জানাতি, গৰুকং আপত্তিং জানাতি, ৱিনযে খো পন ঠিতো হোতি অসংহীৰো, চতুন্নং ঝানানং আভিচেতসিকানং দিট্ঠধম্মসুখৱিহাৰানং নিকামলাভী হোতি অকিচ্ছলাভী অকসিৰলাভী, আসৱানং খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. ইমেহি খো, ভিক্খৱে, সত্তহি ধম্মেহি সমন্নাগতো ভিক্খু ৱিনযধৰো হোতী’’তি. ততিযং.

৪. চতুত্থৱিনযধৰসুত্তং

৭৮. [পৰি. ৩২৭] ‘‘সত্তহি, ভিক্খৱে, ধম্মেহি সমন্নাগতো ভিক্খু ৱিনযধৰো হোতি. কতমেহি সত্তহি? আপত্তিং জানাতি, অনাপত্তিং জানাতি, লহুকং আপত্তিং জানাতি, গৰুকং আপত্তিং জানাতি, অনেকৱিহিতং পুব্বেনিৱাসং অনুস্সৰতি, সেয্যথিদং – একম্পি জাতিং, দ্ৱেপি জাতিযো…পে… ইতি সাকাৰং সউদ্দেসং অনেকৱিহিতং পুব্বেনিৱাসং অনুস্সৰতি. দিব্বেন চক্খুনা ৱিসুদ্ধেন অতিক্কন্তমানুসকেন যথাকম্মূপগে সত্তে পজানাতি. আসৱানং খযা অনাসৱং চেতোৱিমুত্তিং পঞ্ঞাৱিমুত্তিং দিট্ঠেৱ ধম্মে সযং অভিঞ্ঞা সচ্ছিকত্ৱা উপসম্পজ্জ ৱিহৰতি. ইমেহি খো, ভিক্খৱে, সত্তহি ধম্মেহি সমন্নাগতো ভিক্খু ৱিনযধৰো হোতী’’তি. চতুত্থং.

৫. পঠমৱিনযধৰসোভনসুত্তং

৭৯. ‘‘সত্তহি, ভিক্খৱে, ধম্মেহি সমন্নাগতো [সমন্নাগতো ভিক্খু (সী. স্যা. ক.) অনন্তৰসুত্তদ্ৱেযে পন ইদং পাঠনানত্তং নত্থি. পৰি. ৩২৭] ৱিনযধৰো সোভতি. কতমেহি সত্তহি? আপত্তিং জানাতি, অনাপত্তিং জানাতি, লহুকং আপত্তিং জানাতি, গৰুকং আপত্তিং জানাতি, সীলৱা হোতি…পে… সমাদায সিক্খতি সিক্খাপদেসু, চতুন্নং ঝানানং আভিচেতসিকানং নিকামলাভী হোতি অকিচ্ছলাভী অকসিৰলাভী, আসৱানং খযা…পে… সচ্ছিকত্ৱা উপসম্পজ্জ ৱিহৰতি. ইমেহি খো, ভিক্খৱে, সত্তহি ধম্মেহি সমন্নাগতো ৱিনযধৰো সোভতী’’তি. পঞ্চমং.

৬. দুতিযৱিনযধৰসোভনসুত্তং

৮০. ‘‘সত্তহি, ভিক্খৱে, ধম্মেহি সমন্নাগতো ৱিনযধৰো সোভতি. কতমেহি সত্তহি? আপত্তিং জানাতি, অনাপত্তিং জানাতি, লহুকং আপত্তিং জানাতি, গৰুকং আপত্তিং জানাতি, উভযানি খো পনস্স পাতিমোক্খানি ৱিত্থাৰেন স্ৱাগতানি হোন্তি সুৱিভত্তানি সুপ্পৱত্তীনি সুৱিনিচ্ছিতানি সুত্তসো অনুব্যঞ্জনসো, চতুন্নং ঝানানং…পে… অকসিৰলাভী, আসৱানং খযা…পে… সচ্ছিকত্ৱা উপসম্পজ্জ ৱিহৰতি. ইমেহি খো, ভিক্খৱে, সত্তহি ধম্মেহি সমন্নাগতো ৱিনযধৰো সোভতী’’তি. ছট্ঠং.

৭. ততিযৱিনযধৰসোভনসুত্তং

৮১. ‘‘সত্তহি, ভিক্খৱে, ধম্মেহি সমন্নাগতো ৱিনযধৰো সোভতি. কতমেহি সত্তহি? আপত্তিং জানাতি, অনাপত্তিং জানাতি, লহুকং আপত্তিং জানাতি, গৰুকং আপত্তিং জানাতি, ৱিনযে খো পন ঠিতো হোতি অসংহীৰো, চতুন্নং ঝানানং…পে… অকসিৰলাভী, আসৱানং খযা…পে… সচ্ছিকত্ৱা উপসম্পজ্জ ৱিহৰতি. ইমেহি খো, ভিক্খৱে, সত্তহি ধম্মেহি সমন্নাগতো ৱিনযধৰো সোভতী’’তি. সত্তমং.

৮. চতুত্থৱিনযধৰসোভনসুত্তং

৮২. ‘‘সত্তহি, ভিক্খৱে, ধম্মেহি সমন্নাগতো [সমন্নাগতো ভিক্খু (ক.)] ৱিনযধৰো সোভতি. কতমেহি সত্তহি? আপত্তিং জানাতি, অনাপত্তিং জানাতি, লহুকং আপত্তিং জানাতি, গৰুকং আপত্তিং জানাতি, অনেকৱিহিতং পুব্বেনিৱাসং অনুস্সৰতি, সেয্যথিদং – একম্পি জাতিং, দ্ৱেপি জাতিযো…পে… ইতি সাকাৰং সউদ্দেসং অনেকৱিহিতং পুব্বেনিৱাসং অনুস্সৰতি, দিব্বেন চক্খুনা ৱিসুদ্ধেন অতিক্কন্তমানুসকেন…পে… আসৱানং খযা…পে… সচ্ছিকত্ৱা উপসম্পজ্জ ৱিহৰতি. ইমেহি খো, ভিক্খৱে, সত্তহি ধম্মেহি সমন্নাগতো ৱিনযধৰো সোভতী’’তি. অট্ঠমং.

৯. সত্থুসাসনসুত্তং

৮৩. অথ খো আযস্মা উপালি যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা উপালি ভগৱন্তং এতদৱোচ –

‘‘সাধু মে, ভন্তে, ভগৱা সংখিত্তেন ধম্মং দেসেতু, যমহং ভগৱতো ধম্মং সুত্ৱা একো ৱূপকট্ঠো অপ্পমত্তো আতাপী পহিতত্তো ৱিহৰেয্য’’ন্তি. ‘‘যে খো ত্ৱং, উপালি, ধম্মে জানেয্যাসি – ‘ইমে ধম্মা ন একন্তনিব্বিদায ৱিৰাগায নিৰোধায উপসমায অভিঞ্ঞায সম্বোধায নিব্বানায সংৱত্তন্তী’তি; একংসেন, উপালি, ধাৰেয্যাসি – ‘নেসো ধম্মো নেসো ৱিনযো নেতং সত্থুসাসন’ন্তি. যে চ খো ত্ৱং, উপালি, ধম্মে জানেয্যাসি – ‘ইমে ধম্মা একন্তনিব্বিদায ৱিৰাগায নিৰোধায উপসমায অভিঞ্ঞায সম্বোধায নিব্বানায সংৱত্তন্তী’তি; একংসেন, উপালি, ধাৰেয্যাসি – ‘এসো ধম্মো এসো ৱিনযো এতং সত্থুসাসন’’’ন্তি. নৱমং.

১০. অধিকৰণসমথসুত্তং

৮৪. ‘‘সত্তিমে, ভিক্খৱে, অধিকৰণসমথা ধম্মা উপ্পন্নুপ্পন্নানং অধিকৰণানং সমথায ৱূপসমায. কতমে সত্ত? সম্মুখাৱিনযো দাতব্বো, সতিৱিনযো দাতব্বো, অমূড়্হৱিনযো দাতব্বো [পটিঞ্ঞাতকৰণং, যেভুয্যস্সিকা, তস্সপাপিয্যস্সিকা, তিণৱত্থাৰকো (স্যা.) দী. নি. ৩.৩৩২ সঙ্গীতিসুত্তেন চ পাচি. ৬৫৫ ৱিনযেন চ সংসন্দেতব্বং], পটিঞ্ঞাতকৰণং দাতব্বং, যেভুয্যসিকা দাতব্বা, তস্সপাপিযসিকা দাতব্বা, তিণৱত্থাৰকো দাতব্বো [পটিঞ্ঞাতকৰণং, যেভুয্যস্সিকা, তস্সপাপিয্যস্সিকা, তিণৱত্থাৰকো (স্যা.) দী. নি. ৩.৩৩২ সঙ্গীতিসুত্তেন চ পাচি. ৬৫৫ ৱিনযেন চ সংসন্দেতব্বং]. ইমে খো, ভিক্খৱে, সত্ত অধিকৰণসমথা ধম্মা উপ্পন্নুপ্পন্নানং অধিকৰণানং সমথায ৱূপসমাযা’’তি. দসমং.

ৱিনযৱগ্গো অট্ঠমো.