১২. দুতিযনিদ্দসসুত্তং

৪৩. এৱং মে সুতং – একং সমযং ভগৱা কোসম্বিযং ৱিহৰতি ঘোসিতাৰামে. অথ খো আযস্মা আনন্দো পুব্বণ্হসমযং নিৱাসেত্ৱা পত্তচীৱৰমাদায কোসম্বিং পিণ্ডায পাৱিসি. অথ খো আযস্মতো আনন্দস্স এতদহোসি – ‘‘অতিপ্পগো খো তাৱ কোসম্বিযং পিণ্ডায চৰিতুং. যংনূনাহং যেন অঞ্ঞতিত্থিযানং পৰিব্বাজকানং আৰামো তেনুপসঙ্কমেয্য’’ন্তি. অথ খো আযস্মা আনন্দো যেন অঞ্ঞতিত্থিযানং পৰিব্বাজকানং আৰামো তেনুপসঙ্কমি; উপসঙ্কমিত্ৱা তেহি অঞ্ঞতিত্থিযেহি পৰিব্বাজকেহি সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি.

তেন খো পন সমযেন তেসং অঞ্ঞতিত্থিযানং পৰিব্বাজকানং সন্নিসিন্নানং সন্নিপতিতানং অযমন্তৰাকথা উদপাদি – ‘‘যো হি কোচি, আৱুসো, দ্ৱাদস ৱস্সানি পৰিপুণ্ণং পৰিসুদ্ধং ব্ৰহ্মচৰিযং চৰতি, ‘নিদ্দসো ভিক্খূ’তি অলং ৱচনাযা’’তি.

অথ খো আযস্মা আনন্দো তেসং অঞ্ঞতিত্থিযানং পৰিব্বাজকানং ভাসিতং নেৱ অভিনন্দি নপ্পটিক্কোসি. অনভিনন্দিত্ৱা অপ্পটিক্কোসিত্ৱা উট্ঠাযাসনা পক্কামি – ‘‘ভগৱতো সন্তিকে এতস্স ভাসিতস্স অত্থং আজানিস্সামী’’তি. অথ খো আযস্মা আনন্দো কোসম্বিযং পিণ্ডায চৰিত্ৱা পচ্ছাভত্তং পিণ্ডপাতপটিক্কন্তো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা আনন্দো ভগৱন্তং এতদৱোচ –

‘‘ইধাহং, ভন্তে, পুব্বণ্হসমযং নিৱাসেত্ৱা পত্তচীৱৰমাদায কোসম্বিং পিণ্ডায পাৱিসিং. তস্স ময্হং, ভন্তে, এতদহোসি – ‘অতিপ্পগো খো তাৱ কোসম্বিযং পিণ্ডায চৰিতুং. যংনূনাহং যেন অঞ্ঞতিত্থিযানং পৰিব্বাজকানং আৰামো তেনুপসঙ্কমেয্য’ন্তি…পে… তেহি সদ্ধিং সম্মোদিং. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদিং.

‘‘তেন খো পন, ভন্তে, সমযেন তেসং অঞ্ঞতিত্থিযানং পৰিব্বাজকানং সন্নিসিন্নানং সন্নিপতিতানং অযমন্তৰাকথা উদপাদি – ‘যো হি কোচি, আৱুসো, দ্ৱাদসৱস্সানি পৰিপুণ্ণং পৰিসুদ্ধং ব্ৰহ্মচৰিযং চৰতি, নিদ্দসো ভিক্খূতি অলং ৱচনাযা’তি. অথ খ্ৱাহং, ভন্তে, তেসং অঞ্ঞতিত্থিযানং পৰিব্বাজকানং ভাসিতং নেৱ অভিনন্দিং নপ্পটিক্কোসিং. অনভিনন্দিত্ৱা, অপ্পটিক্কোসিত্ৱা উট্ঠাযাসনা পক্কমিং – ‘ভগৱতো সন্তিকে এতস্স ভাসিতস্স অত্থং আজানিস্সামী’তি. সক্কা নু খো, ভন্তে, ইমস্মিং ধম্মৱিনযে কেৱলং ৱস্সগণনমত্তেন নিদ্দসো ভিক্খু পঞ্ঞাপেতু’’ন্তি?

‘‘ন খো, আনন্দ, সক্কা ইমস্মিং ধম্মৱিনযে কেৱলং ৱস্সগণনমত্তেন নিদ্দসো ভিক্খু পঞ্ঞাপেতুং. সত্ত খো ইমানি, আনন্দ, নিদ্দসৱত্থূনি মযা সযং অভিঞ্ঞা সচ্ছিকত্ৱা পৱেদিতানি.

‘‘কতমানি সত্ত? ইধানন্দ, ভিক্খু, সদ্ধো হোতি, হিৰীমা হোতি, ওত্তপ্পী হোতি, বহুস্সুতো হোতি, আৰদ্ধৱীৰিযো হোতি, সতিমা হোতি, পঞ্ঞৱা হোতি. ইমানি খো, আনন্দ, সত্ত নিদ্দসৱত্থূনি মযা সযং অভিঞ্ঞা সচ্ছিকত্ৱা পৱেদিতানি. ইমেহি খো, আনন্দ, সত্তহি নিদ্দসৱত্থূহি সমন্নাগতো ভিক্খু দ্ৱাদস চেপি ৱস্সানি পৰিপুণ্ণং পৰিসুদ্ধং ব্ৰহ্মচৰিযং চৰতি, ‘নিদ্দসো ভিক্খূ’তি অলং ৱচনায; চতুব্বীসতি চেপি ৱস্সানি পৰিপুণ্ণং পৰিসুদ্ধং ব্ৰহ্মচৰিযং চৰতি, ‘নিদ্দসো ভিক্খূ’তি অলং ৱচনায; ছত্তিংসতি চেপি ৱস্সানি পৰিপুণ্ণং পৰিসুদ্ধং ব্ৰহ্মচৰিযং চৰতি, ‘নিদ্দসো ভিক্খূ’তি অলং ৱচনায, অট্ঠচত্তাৰীসং চেপি ৱস্সানি পৰিপুণ্ণং পৰিসুদ্ধং ব্ৰহ্মচৰিযং চৰতি, ‘নিদ্দসো ভিক্খূ’তি অলং ৱচনাযা’’তি. দ্ৱাদসমং.

দেৱতাৱগ্গো চতুত্থো.