১১. পঠমনিদ্দসসুত্তং

৪২. অথ খো আযস্মা সাৰিপুত্তো পুব্বণ্হসমযং নিৱাসেত্ৱা পত্তচীৱৰমাদায সাৱত্থিং পিণ্ডায পাৱিসি. অথ খো আযস্মতো সাৰিপুত্তস্স এতদহোসি – ‘‘অতিপ্পগো খো তাৱ সাৱত্থিযং পিণ্ডায চৰিতুং. যংনূনাহং যেন অঞ্ঞতিত্থিযানং পৰিব্বাজকানং আৰামো তেনুপসঙ্কমেয্য’’ন্তি. অথ খো আযস্মা সাৰিপুত্তো যেন অঞ্ঞতিত্থিযানং পৰিব্বাজকানং আৰামো তেনুপসঙ্কমি; উপসঙ্কমিত্ৱা তেহি অঞ্ঞতিত্থিযেহি পৰিব্বাজকেহি সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. তেন খো পন সমযেন তেসং অঞ্ঞতিত্থিযানং পৰিব্বাজকানং সন্নিসিন্নানং সন্নিপতিতানং অযমন্তৰাকথা উদপাদি – ‘‘যো হি কোচি, আৱুসো, দ্ৱাদসৱস্সানি পৰিপুণ্ণং পৰিসুদ্ধং ব্ৰহ্মচৰিযং চৰতি, ‘নিদ্দসো ভিক্খূ’তি অলং ৱচনাযা’’তি.

অথ খো আযস্মা সাৰিপুত্তো তেসং অঞ্ঞতিত্থিযানং পৰিব্বাজকানং ভাসিতং নেৱ অভিনন্দি নপ্পটিক্কোসি. অনভিনন্দিত্ৱা অপ্পটিক্কোসিত্ৱা উট্ঠাযাসনা পক্কামি – ‘‘ভগৱতো সন্তিকে এতস্স ভাসিতস্স অত্থং আজানিস্সামী’’তি. অথ খো আযস্মা সাৰিপুত্তো সাৱত্থিযং পিণ্ডায চৰিত্ৱা পচ্ছাভত্তং পিণ্ডপাতপটিক্কন্তো যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং নিসীদি. একমন্তং নিসিন্নো খো আযস্মা সাৰিপুত্তো ভগৱন্তং এতদৱোচ –

‘‘ইধাহং, ভন্তে, পুব্বণ্হসমযং নিৱাসেত্ৱা পত্তচীৱৰমাদায সাৱত্থিং পিণ্ডায পাৱিসিং. তস্স ময্হং, ভন্তে, এতদহোসি – ‘অতিপ্পগো খো তাৱ সাৱত্থিযং পিণ্ডায চৰিতুং. যংনূনাহং যেন অঞ্ঞতিত্থিযানং পৰিব্বাজকানং আৰামো তেনুপসঙ্কমেয্য’ন্তি. অথ খ্ৱাহং, ভন্তে, যেন অঞ্ঞতিত্থিযানং পৰিব্বাজকানং আৰামো তেনুপসঙ্কমিং; উপসঙ্কমিত্ৱা তেহি অঞ্ঞতিত্থিযেহি পৰিব্বাজকেহি সদ্ধিং সম্মোদিং. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদিং. তেন খো পন, ভন্তে, সমযেন তেসং অঞ্ঞতিত্থিযানং পৰিব্বাজকানং সন্নিসিন্নানং সন্নিপতিতানং অযমন্তৰাকথা উদপাদি – ‘যো হি কোচি, আৱুসো, দ্ৱাদসৱস্সানি পৰিপুণ্ণং পৰিসুদ্ধং ব্ৰহ্মচৰিযং চৰতি, নিদ্দসো ভিক্খূতি অলং ৱচনাযা’তি. অথ খ্ৱাহং, ভন্তে, তেসং অঞ্ঞতিত্থিযানং পৰিব্বাজকানং ভাসিতং নেৱ অভিনন্দিং নপ্পটিক্কোসিং. অনভিনন্দিত্ৱা অপ্পটিক্কোসিত্ৱা উট্ঠাযাসনা পক্কমিং [পক্কামিং (সী. স্যা.)] – ‘ভগৱতো সন্তিকে এতস্স অত্থং আজানিস্সামী’তি. সক্কা নু খো, ভন্তে, ইমস্মিং ধম্মৱিনযে কেৱলং ৱস্সগণনমত্তেন নিদ্দসো ভিক্খু পঞ্ঞাপেতু’’ন্তি?

‘‘ন খো, সাৰিপুত্ত, সক্কা ইমস্মিং ধম্মৱিনযে কেৱলং ৱস্সগণনমত্তেন নিদ্দসো ভিক্খু পঞ্ঞাপেতুং. সত্ত খো ইমানি, সাৰিপুত্ত, নিদ্দসৱত্থূনি মযা সযং অভিঞ্ঞা সচ্ছিকত্ৱা পৱেদিতানি.

[অ. নি. ৭.২০; দী. নি. ৩.৩৩১] ‘‘কতমানি সত্ত? ইধ, সাৰিপুত্ত, ভিক্খু সিক্খাসমাদানে তিব্বচ্ছন্দো হোতি আযতিঞ্চ সিক্খাসমাদানে অৱিগতপেমো, ধম্মনিসন্তিযা তিব্বচ্ছন্দো হোতি আযতিঞ্চ ধম্মনিসন্তিযা অৱিগতপেমো, ইচ্ছাৱিনযে তিব্বচ্ছন্দো হোতি আযতিঞ্চ ইচ্ছাৱিনযে অৱিগতপেমো, পটিসল্লানে তিব্বচ্ছন্দো হোতি আযতিঞ্চ পটিসল্লানে অৱিগতপেমো, ৱীৰিযাৰম্ভে তিব্বচ্ছন্দো হোতি আযতিঞ্চ ৱীৰিযাৰম্ভে অৱিগতপেমো, সতিনেপক্কে তিব্বচ্ছন্দো হোতি আযতিঞ্চ সতিনেপক্কে অৱিগতপেমো, দিট্ঠিপটিৱেধে তিব্বচ্ছন্দো হোতি আযতিঞ্চ দিট্ঠিপটিৱেধে অৱিগতপেমো. ইমানি খো, সাৰিপুত্ত, সত্ত নিদ্দসৱত্থূনি মযা সযং অভিঞ্ঞা সচ্ছিকত্ৱা পৱেদিতানি. ইমেহি খো, সাৰিপুত্ত, সত্তহি নিদ্দসৱত্থূহি সমন্নাগতো ভিক্খু দ্ৱাদস চেপি ৱস্সানি পৰিপুণ্ণং পৰিসুদ্ধং ব্ৰহ্মচৰিযং চৰতি, ‘নিদ্দসো ভিক্খূ’তি অলং ৱচনায; চতুব্বীসতি চেপি ৱস্সানি পৰিপুণ্ণং পৰিসুদ্ধং ব্ৰহ্মচৰিযং চৰতি, ‘নিদ্দসো ভিক্খূ’তি অলং ৱচনায; ছত্তিংসতি চেপি ৱস্সানি পৰিপুণ্ণং পৰিসুদ্ধং ব্ৰহ্মচৰিযং চৰতি, ‘নিদ্দসো ভিক্খূ’তি অলং ৱচনায, অট্ঠচত্তাৰীসং চেপি ৱস্সানি পৰিপুণ্ণং পৰিসুদ্ধং ব্ৰহ্মচৰিযং চৰতি, ‘নিদ্দসো ভিক্খূ’তি অলং ৱচনাযা’’তি. একাদসমং.