৫. ততিযসত্তকসুত্তং

২৫. ‘‘সত্ত ৱো, ভিক্খৱে, অপৰিহানিযে ধম্মে দেসেস্সামি. তং সুণাথ, সাধুকং মনসি কৰোথ…পে… কতমে চ, ভিক্খৱে, সত্ত অপৰিহানিযা ধম্মা? যাৱকীৱঞ্চ, ভিক্খৱে, ভিক্খূ সদ্ধা ভৱিস্সন্তি; ৱুদ্ধিযেৱ, ভিক্খৱে, ভিক্খূনং পাটিকঙ্খা, নো পৰিহানি.

‘‘যাৱকীৱঞ্চ, ভিক্খৱে, ভিক্খূ হিৰিমন্তো [হিৰীমা (সী.), হিৰিমনা (দী. নি. ২.১৩৮)] ভৱিস্সন্তি…পে… ওত্তপ্পিনো [ওত্তাপীনো (সী.)] ভৱিস্সন্তি… বহুস্সুতা ভৱিস্সন্তি… আৰদ্ধৱীৰিযা ভৱিস্সন্তি… সতিমন্তো ভৱিস্সন্তি… পঞ্ঞৱন্তো ভৱিস্সন্তি; ৱুদ্ধিযেৱ, ভিক্খৱে, ভিক্খূনং পাটিকঙ্খা, নো পৰিহানি. ‘‘যাৱকীৱঞ্চ, ভিক্খৱে, ইমে সত্ত অপৰিহানিযা ধম্মা ভিক্খূসু ঠস্সন্তি, ইমেসু চ সত্তসু অপৰিহানিযেসু ধম্মেসু ভিক্খূ সন্দিস্সিস্সন্তি; ৱুদ্ধিযেৱ, ভিক্খৱে, ভিক্খূনং পাটিকঙ্খা, নো পৰিহানী’’তি. পঞ্চমং.