২. দুতিযঅনুসযসুত্তং

১২. ‘‘সত্তন্নং, ভিক্খৱে, অনুসযানং পহানায সমুচ্ছেদায ব্ৰহ্মচৰিযং ৱুস্সতি. কতমেসং সত্তন্নং? কামৰাগানুসযস্স পহানায সমুচ্ছেদায ব্ৰহ্মচৰিযং ৱুস্সতি, পটিঘানুসযস্স…পে… দিট্ঠানুসযস্স… ৱিচিকিচ্ছানুসযস্স… মানানুসযস্স… ভৱৰাগানুসযস্স… অৱিজ্জানুসযস্স পহানায সমুচ্ছেদায ব্ৰহ্মচৰিযং ৱুস্সতি. ইমেসং খো, ভিক্খৱে, সত্তন্নং অনুসযানং পহানায সমুচ্ছেদায ব্ৰহ্মচৰিযং ৱুস্সতি.

‘‘যতো চ খো, ভিক্খৱে, ভিক্খুনো কামৰাগানুসযো পহীনো হোতি উচ্ছিন্নমূলো তালাৱত্থুকতো অনভাৱংকতো আযতিং অনুপ্পাদধম্মো. পটিঘানুসযো…পে… দিট্ঠানুসযো… ৱিচিকিচ্ছানুসযো… মানানুসযো… ভৱৰাগানুসযো… অৱিজ্জানুসযো পহীনো হোতি উচ্ছিন্নমূলো তালাৱত্থুকতো অনভাৱংকতো আযতিং অনুপ্পাদধম্মো. অযং ৱুচ্চতি, ভিক্খৱে, ভিক্খু অচ্ছেচ্ছি তণ্হং, ৱিৱত্তযি সংযোজনং, সম্মা মানাভিসমযা অন্তমকাসি দুক্খস্সা’’তি. দুতিযং.