৭. সক্খিভব্বসুত্তং

৭১. ‘‘ছহি, ভিক্খৱে, ধম্মেহি সমন্নাগতো ভিক্খু অভব্বো তত্ৰ তত্ৰেৱ সক্খিভব্বতং পাপুণিতুং সতি সতি আযতনে. কতমেহি ছহি? ইধ, ভিক্খৱে, ভিক্খু ‘ইমে হানভাগিযা ধম্মা’তি যথাভূতং নপ্পজানাতি, ‘ইমে ঠিতিভাগিযা ধম্মা’তি যথাভূতং নপ্পজানাতি, ‘ইমে ৱিসেসভাগিযা ধম্মা’তি যথাভূতং নপ্পজানাতি, ‘ইমে নিব্বেধভাগিযা ধম্মা’তি যথাভূতং নপ্পজানাতি, অসক্কচ্চকাৰী চ হোতি, অসপ্পাযকাৰী চ. ইমেহি খো, ভিক্খৱে, ছহি ধম্মেহি সমন্নাগতো ভিক্খু অভব্বো তত্ৰ তত্ৰেৱ সক্খিভব্বতং পাপুণিতুং সতি সতি আযতনে.

‘‘ছহি, ভিক্খৱে, ধম্মেহি সমন্নাগতো ভিক্খু ভব্বো তত্ৰ তত্ৰেৱ সক্খিভব্বতং পাপুণিতুং সতি সতি আযতনে. কতমেহি ছহি? ইধ, ভিক্খৱে, ভিক্খু ‘ইমে হানভাগিযা ধম্মা’তি যথাভূতং পজানাতি, ‘ইমে ঠিতিভাগিযা ধম্মা’তি যথাভূতং পজানাতি, ‘ইমে ৱিসেসভাগিযা ধম্মা’তি যথাভূতং পজানাতি, ‘ইমে নিব্বেধভাগিযা ধম্মা’তি যথাভূতং পজানাতি, সক্কচ্চকাৰী চ হোতি, সপ্পাযকাৰী চ. ইমেহি খো, ভিক্খৱে, ছহি ধম্মেহি সমন্নাগতো ভিক্খু ভব্বো তত্ৰ তত্ৰেৱ সক্খিভব্বতং পাপুণিতুং সতি সতি আযতনে’’তি. সত্তমং.