৮. বলসুত্তং

৭২. ‘‘ছহি, ভিক্খৱে, ধম্মেহি সমন্নাগতো ভিক্খু অভব্বো সমাধিস্মিং [সমাধিম্হি (ক.)] বলতং পাপুণিতুং. কতমেহি ছহি? ইধ, ভিক্খৱে, ভিক্খু ন সমাধিস্স সমাপত্তিকুসলো হোতি, ন সমাধিস্স ঠিতিকুসলো হোতি, ন সমাধিস্স [ন সমাধিম্হা (ক.) উপৰিসত্তকনিপাতে দেৱতাৱগ্গে পন সব্বত্থপি ‘‘সমাধিস্স’’ইত্ৱেৱ দিস্সতি] ৱুট্ঠানকুসলো হোতি, অসক্কচ্চকাৰী চ হোতি, অসাতচ্চকাৰী চ, অসপ্পাযকাৰী চ. ইমেহি খো, ভিক্খৱে, ছহি ধম্মেহি সমন্নাগতো ভিক্খু অভব্বো সমাধিস্মিং বলতং পাপুণিতুং.

‘‘ছহি, ভিক্খৱে, ধম্মেহি সমন্নাগতো ভিক্খু ভব্বো সমাধিস্মিং বলতং পাপুণিতুং. কতমেহি ছহি? ইধ, ভিক্খৱে, ভিক্খু সমাধিস্স সমাপত্তিকুসলো হোতি, সমাধিস্স ঠিতিকুসলো হোতি, সমাধিস্স ৱুট্ঠানকুসলো হোতি, সক্কচ্চকাৰী চ হোতি, সাতচ্চকাৰী চ, সপ্পাযকাৰী চ. ইমেহি খো, ভিক্খৱে, ছহি ধম্মেহি সমন্নাগতো ভিক্খু ভব্বো সমাধিস্মিং বলতং পাপুণিতু’’ন্তি. অট্ঠমং.