৩. মিত্তসুত্তং

৬৭. ‘‘‘সো ৱত, ভিক্খৱে, ভিক্খু পাপমিত্তো পাপসহাযো পাপসম্পৱঙ্কো, পাপমিত্তে [পাপকে মিত্তে (ক.)] সেৱমানো ভজমানো পযিৰুপাসমানো, তেসঞ্চ দিট্ঠানুগতিং আপজ্জমানো আভিসমাচাৰিকং ধম্মং পৰিপূৰেস্সতী’তি নেতং ঠানং ৱিজ্জতি. ‘আভিসমাচাৰিকং ধম্মং অপৰিপূৰেত্ৱা সেখং ধম্মং পৰিপূৰেস্সতী’তি নেতং ঠানং ৱিজ্জতি. ‘সেখং ধম্মং অপৰিপূৰেত্ৱা সীলানি পৰিপূৰেস্সতী’তি নেতং ঠানং ৱিজ্জতি. ‘সীলানি অপৰিপূৰেত্ৱা কামৰাগং ৱা ৰূপৰাগং ৱা অৰূপৰাগং ৱা পজহিস্সতী’তি নেতং ঠানং ৱিজ্জতি.

‘‘‘সো ৱত, ভিক্খৱে, ভিক্খু কল্যাণমিত্তো কল্যাণসহাযো কল্যাণসম্পৱঙ্কো, কল্যাণমিত্তে সেৱমানো ভজমানো পযিৰুপাসমানো, তেসঞ্চ দিট্ঠানুগতিং আপজ্জমানো আভিসমাচাৰিকং ধম্মং পৰিপূৰেস্সতী’তি ঠানমেতং ৱিজ্জতি. ‘আভিসমাচাৰিকং ধম্মং পৰিপূৰেত্ৱা সেখং ধম্মং পৰিপূৰেস্সতী’তি ঠানমেতং ৱিজ্জতি. ‘সেখং ধম্মং পৰিপূৰেত্ৱা সীলানি পৰিপূৰেস্সতী’তি ঠানমেতং ৱিজ্জতি. ‘সীলানি পৰিপূৰেত্ৱা কামৰাগং ৱা ৰূপৰাগং ৱা অৰূপৰাগং ৱা পজহিস্সতী’তি ঠানমেতং ৱিজ্জতী’’তি. ততিযং.