৪. সঙ্গণিকাৰামসুত্তং

৬৮. ‘‘‘সো ৱত, ভিক্খৱে, ভিক্খু সঙ্গণিকাৰামো সঙ্গণিকৰতো সঙ্গণিকাৰামতং অনুযুত্তো, গণাৰামো গণৰতো গণাৰামতং অনুযুত্তো, একো পৱিৱেকে অভিৰমিস্সতী’তি নেতং ঠানং ৱিজ্জতি. ‘একো পৱিৱেকে অনভিৰমন্তো চিত্তস্স নিমিত্তং গহেস্সতী’তি নেতং ঠানং ৱিজ্জতি. ‘চিত্তস্স নিমিত্তং অগণ্হন্তো সম্মাদিট্ঠিং পৰিপূৰেস্সতী’তি নেতং ঠানং ৱিজ্জতি. ‘সম্মাদিট্ঠিং অপৰিপূৰেত্ৱা সম্মাসমাধিং পৰিপূৰেস্সতী’তি নেতং ঠানং ৱিজ্জতি. ‘সম্মাসমাধিং অপৰিপূৰেত্ৱা সংযোজনানি পজহিস্সতী’তি নেতং ঠানং ৱিজ্জতি. ‘সংযোজনানি অপ্পহায নিব্বানং সচ্ছিকৰিস্সতী’তি নেতং ঠানং ৱিজ্জতি.

‘‘‘সো ৱত, ভিক্খৱে, ভিক্খু ন সঙ্গণিকাৰামো ন সঙ্গণিকৰতো ন সঙ্গণিকাৰামতং অনুযুত্তো, ন গণাৰামো ন গণৰতো ন গণাৰামতং অনুযুত্তো, একো পৱিৱেকে অভিৰমিস্সতী’তি ঠানমেতং ৱিজ্জতি. ‘একো পৱিৱেকে অভিৰমন্তো চিত্তস্স নিমিত্তং গহেস্সতী’তি ঠানমেতং ৱিজ্জতি. ‘চিত্তস্স নিমিত্তং গণ্হন্তো সম্মাদিট্ঠিং পৰিপূৰেস্সতী’তি ঠানমেতং ৱিজ্জতি. ‘সম্মাদিট্ঠিং পৰিপূৰেত্ৱা সম্মাসমাধিং পৰিপূৰেস্সতী’তি ঠানমেতং ৱিজ্জতি. ‘সম্মাসমাধিং পৰিপূৰেত্ৱা সংযোজনানি পজহিস্সতী’তি ঠানমেতং ৱিজ্জতি. ‘সংযোজনানি পহায নিব্বানং সচ্ছিকৰিস্সতী’তি ঠানমেতং ৱিজ্জতী’’তি. চতুত্থং.