(২৫) ৫. দুচ্চৰিতৱগ্গো

১. পঠমদুচ্চৰিতসুত্তং

২৪১. ‘‘পঞ্চিমে, ভিক্খৱে, আদীনৱা দুচ্চৰিতে. কতমে পঞ্চ? অত্তাপি অত্তানং উপৱদতি; অনুৱিচ্চ ৱিঞ্ঞূ গৰহন্তি; পাপকো কিত্তিসদ্দো অব্ভুগ্গচ্ছতি; সম্মূড়্হো কালং কৰোতি; কাযস্স ভেদা পৰং মৰণা অপাযং দুগ্গতিং ৱিনিপাতং নিৰযং উপপজ্জতি. ইমে খো, ভিক্খৱে, পঞ্চ আদীনৱা দুচ্চৰিতে.

‘‘পঞ্চিমে, ভিক্খৱে, আনিসংসা সুচৰিতে. কতমে পঞ্চ? অত্তাপি অত্তানং ন উপৱদতি; অনুৱিচ্চ ৱিঞ্ঞূ পসংসন্তি; কল্যাণো কিত্তিসদ্দো অব্ভুগ্গচ্ছতি; অসম্মূড়্হো কালং কৰোতি; কাযস্স ভেদা পৰং মৰণা সুগতিং সগ্গং লোকং উপপজ্জতি. ইমে খো, ভিক্খৱে, পঞ্চ আনিসংসা সুচৰিতে’’তি. পঠমং.

২. পঠমকাযদুচ্চৰিতসুত্তং

২৪২. ‘‘পঞ্চিমে, ভিক্খৱে, আদীনৱা কাযদুচ্চৰিতে…পে… আনিসংসা কাযসুচৰিতে…পে…. দুতিযং.

৩. পঠমৱচীদুচ্চৰিতসুত্তং

২৪৩. ‘‘পঞ্চিমে, ভিক্খৱে, আদীনৱা ৱচীদুচ্চৰিতে…পে… আনিসংসা ৱচীসুচৰিতে…পে…. ততিযং.

৪. পঠমমনোদুচ্চৰিতসুত্তং

২৪৪. ‘‘পঞ্চিমে, ভিক্খৱে, আদীনৱা মনোদুচ্চৰিতে…পে… আনিসংসা মনোসুচৰিতে. কতমে পঞ্চ? অত্তাপি অত্তানং ন উপৱদতি; অনুৱিচ্চ ৱিঞ্ঞূ পসংসন্তি; কল্যাণো কিত্তিসদ্দো অব্ভুগ্গচ্ছতি; অসম্মূড়্হো কালং কৰোতি; কাযস্স ভেদা পৰং মৰণা সুগতিং সগ্গং লোকং উপপজ্জতি. ইমে খো, ভিক্খৱে, পঞ্চ আনিসংসা মনোসুচৰিতে’’তি. চতুত্থং.

৫. দুতিযদুচ্চৰিতসুত্তং

২৪৫. ‘‘পঞ্চিমে, ভিক্খৱে, আদীনৱা দুচ্চৰিতে. কতমে পঞ্চ? অত্তাপি অত্তানং উপৱদতি; অনুৱিচ্চ ৱিঞ্ঞূ গৰহন্তি; পাপকো কিত্তিসদ্দো অব্ভুগ্গচ্ছতি; সদ্ধম্মা ৱুট্ঠাতি; অসদ্ধম্মে পতিট্ঠাতি. ইমে খো, ভিক্খৱে, পঞ্চ আদীনৱা দুচ্চৰিতে.

‘‘পঞ্চিমে, ভিক্খৱে, আনিসংসা সুচৰিতে. কতমে পঞ্চ? অত্তাপি অত্তানং ন উপৱদতি; অনুৱিচ্চ ৱিঞ্ঞূ পসংসন্তি; কল্যাণো কিত্তিসদ্দো অব্ভুগ্গচ্ছতি; অসদ্ধম্মা ৱুট্ঠাতি; সদ্ধম্মে পতিট্ঠাতি. ইমে খো, ভিক্খৱে, পঞ্চ আনিসংসা সুচৰিতে’’তি. পঞ্চমং.

৬. দুতিযকাযদুচ্চৰিতসুত্তং

২৪৬. ‘‘পঞ্চিমে, ভিক্খৱে, আদীনৱা কাযদুচ্চৰিতে…পে… আনিসংসা কাযসুচৰিতে…পে…. ছট্ঠং.

৭. দুতিযৱচীদুচ্চৰিতসুত্তং

২৪৭. ‘‘পঞ্চিমে, ভিক্খৱে, আদীনৱা ৱচীদুচ্চৰিতে…পে… আনিসংসা ৱচীসুচৰিতে…পে…. সত্তমং.

৮. দুতিযমনোদুচ্চৰিতসুত্তং

২৪৮. ‘‘পঞ্চিমে, ভিক্খৱে, আদীনৱা মনোদুচ্চৰিতে…পে… আনিসংসা মনোসুচৰিতে. কতমে পঞ্চ? অত্তাপি অত্তানং ন উপৱদতি; অনুৱিচ্চ ৱিঞ্ঞূ পসংসন্তি; কল্যাণো কিত্তিসদ্দো অব্ভুগ্গচ্ছতি; অসদ্ধম্মা ৱুট্ঠাতি; সদ্ধম্মে পতিট্ঠাতি. ইমে খো, ভিক্খৱে, পঞ্চ আনিসংসা মনোসুচৰিতে’’তি. অট্ঠমং.

৯. সিৱথিকসুত্তং

২৪৯. ‘‘পঞ্চিমে, ভিক্খৱে, আদীনৱা সিৱথিকায [সীৱথিকায (সী. স্যা. কং. পী.)]. কতমে পঞ্চ? অসুচি, দুগ্গন্ধা, সপ্পটিভযা, ৱাড়ানং অমনুস্সানং আৱাসো, বহুনো জনস্স আৰোদনা – ইমে খো, ভিক্খৱে, পঞ্চ আদীনৱা সিৱথিকায.

‘‘এৱমেৱং খো, ভিক্খৱে, পঞ্চিমে আদীনৱা সিৱথিকূপমে পুগ্গলে. কতমে পঞ্চ? ইধ, ভিক্খৱে, একচ্চো পুগ্গলো অসুচিনা কাযকম্মেন সমন্নাগতো হোতি; অসুচিনা ৱচীকম্মেন সমন্নাগতো হোতি; অসুচিনা মনোকম্মেন সমন্নাগতো হোতি. ইদমস্স অসুচিতায ৱদামি. সেয্যথাপি সা, ভিক্খৱে, সিৱথিকা অসুচি; তথূপমাহং, ভিক্খৱে, ইমং পুগ্গলং ৱদামি.

‘‘তস্স অসুচিনা কাযকম্মেন সমন্নাগতস্স, অসুচিনা ৱচীকম্মেন সমন্নাগতস্স, অসুচিনা মনোকম্মেন সমন্নাগতস্স পাপকো কিত্তিসদ্দো অব্ভুগ্গচ্ছতি. ইদমস্স দুগ্গন্ধতায ৱদামি. সেয্যথাপি সা, ভিক্খৱে, সিৱথিকা দুগ্গন্ধা; তথূপমাহং, ভিক্খৱে, ইমং পুগ্গলং ৱদামি.

‘‘তমেনং অসুচিনা কাযকম্মেন সমন্নাগতং, অসুচিনা ৱচীকম্মেন সমন্নাগতং, অসুচিনা মনোকম্মেন সমন্নাগতং পেসলা সব্ৰহ্মচাৰী আৰকা পৰিৱজ্জন্তি. ইদমস্স সপ্পটিভযস্মিং ৱদামি. সেয্যথাপি সা, ভিক্খৱে, সিৱথিকা সপ্পটিভযা; তথূপমাহং, ভিক্খৱে, ইমং পুগ্গলং ৱদামি.

‘‘সো অসুচিনা কাযকম্মেন সমন্নাগতো, অসুচিনা ৱচীকম্মেন সমন্নাগতো, অসুচিনা মনোকম্মেন সমন্নাগতো সভাগেহি পুগ্গলেহি সদ্ধিং সংৱসতি. ইদমস্স ৱাড়াৱাসস্মিং ৱদামি. সেয্যথাপি সা, ভিক্খৱে, সিৱথিকা ৱাড়ানং অমনুস্সানং আৱাসো; তথূপমাহং, ভিক্খৱে, ইমং পুগ্গলং ৱদামি.

‘‘তমেনং অসুচিনা কাযকম্মেন সমন্নাগতং, অসুচিনা ৱচীকম্মেন সমন্নাগতং, অসুচিনা মনোকম্মেন সমন্নাগতং পেসলা সব্ৰহ্মচাৰী দিস্ৱা খীযধম্মং [খীযনধম্মং (সী.)] আপজ্জন্তি – ‘অহো ৱত নো দুক্খং যে মযং এৱৰূপেহি পুগ্গলেহি সদ্ধিং সংৱসামা’তি! ইদমস্স আৰোদনায ৱদামি. সেয্যথাপি সা, ভিক্খৱে, সিৱথিকা বহুনো জনস্স আৰোদনা; তথূপমাহং, ভিক্খৱে, ইমং পুগ্গলং ৱদামি. ইমে খো, ভিক্খৱে, পঞ্চ আদীনৱা সিৱথিকূপমে পুগ্গলে’’তি. নৱমং.

১০. পুগ্গলপ্পসাদসুত্তং

২৫০. ‘‘পঞ্চিমে, ভিক্খৱে, আদীনৱা পুগ্গলপ্পসাদে. কতমে পঞ্চ? যস্মিং, ভিক্খৱে, পুগ্গলে পুগ্গলো অভিপ্পসন্নো হোতি, সো তথাৰূপং আপত্তিং আপন্নো হোতি যথাৰূপায আপত্তিযা সঙ্ঘো উক্খিপতি. তস্স এৱং হোতি – ‘যো খো ম্যাযং পুগ্গলো পিযো মনাপো সো সঙ্ঘেন উক্খিত্তো’তি. ভিক্খূসু অপ্পসাদবহুলো হোতি. ভিক্খূসু অপ্পসাদবহুলো সমানো অঞ্ঞে ভিক্খূ ন ভজতি. অঞ্ঞে ভিক্খূ অভজন্তো সদ্ধম্মং ন সুণাতি. সদ্ধম্মং অসুণন্তো সদ্ধম্মা পৰিহাযতি. অযং, ভিক্খৱে, পঠমো আদীনৱো পুগ্গলপ্পসাদে.

‘‘পুন চপৰং, ভিক্খৱে, যস্মিং পুগ্গলে পুগ্গলো অভিপ্পসন্নো হোতি, সো তথাৰূপং আপত্তিং আপন্নো হোতি যথাৰূপায আপত্তিযা সঙ্ঘো অন্তে নিসীদাপেতি. তস্স এৱং হোতি – ‘যো খো ম্যাযং পুগ্গলো পিযো মনাপো সো সঙ্ঘেন অন্তে নিসীদাপিতো’তি. ভিক্খূসু অপ্পসাদবহুলো হোতি. ভিক্খূসু অপ্পসাদবহুলো সমানো অঞ্ঞে ভিক্খূ ন ভজতি. অঞ্ঞে ভিক্খূ অভজন্তো সদ্ধম্মং ন সুণাতি. সদ্ধম্মং অসুণন্তো সদ্ধম্মা পৰিহাযতি. অযং, ভিক্খৱে, দুতিযো আদীনৱো পুগ্গলপ্পসাদে.

‘‘পুন চপৰং, ভিক্খৱে, যস্মিং পুগ্গলে পুগ্গলো অভিপ্পসন্নো হোতি, সো দিসাপক্কন্তো হোতি…পে… সো ৱিব্ভন্তো হোতি…পে… সো কালঙ্কতো হোতি. তস্স এৱং হোতি – ‘যো খো ম্যাযং পুগ্গলো পিযো মনাপো সো কালঙ্কতো’তি. অঞ্ঞে ভিক্খূ ন ভজতি. অঞ্ঞে ভিক্খূ অভজন্তো সদ্ধম্মং ন সুণাতি. সদ্ধম্মং অসুণন্তো সদ্ধম্মা পৰিহাযতি. অযং, ভিক্খৱে, পঞ্চমো আদীনৱো পুগ্গলপ্পসাদে. ইমে খো, ভিক্খৱে, পঞ্চ আদীনৱা পুগ্গলপ্পসাদে’’তি. দসমং.

দুচ্চৰিতৱগ্গো পঞ্চমো.